ހުދުރަންފުށި ރިސޯޓުގެ 3 ވޯޓާ ވިލާ އާއި އެއް ކޮޓަރި އަނދައިފި
9 އޮކްޓޯބަރު 2018 | އަންގާރަ 13:06މި ހާދިސާގައި މީހަކަށް ގެއްލުން ލިބުނު ކަމަށް އެމްއެންޑީއެފުން ބުނެފައެއް ނުވޭ
ހުދުރަންފުށީގައި ހިނގި އަލިފާނުގެ ހާދިސާގައި އަނދާފައިވާ ސަރަހައްދު
މާލެ އަތޮޅުގައި އޮންނަ އަދާރަން ހުދުރަންފުށި ރިސޯޓުގައި އާދީއްތަ ދުވަހުގެ ރޭ މެންދަމު އަލިފާނުގެ ހާދިސާއެއް ހިނގައިފިއެވެ.
އެމްއެންޑީއެފްގެ މީޑިއާ އޮފިޝަލް އިބްރާހިްމ އާޒިމް ވިދާޅުވި ގޮތުގައި އެ ހާދިސާގައި އެ ރިސޯޓްގެ ތިން ވޯޓާ ވިލާ އާއި އެއް ކޮޓަރިއަށް އެކި ވަރުގެ ގެއްލުން ލިބިފައިވެ އެވެ.
އެ ހާދިސާގައި އެއްވެސް މީހަކަށް ގެއްލުން ލިބުނު ކަމަކަށް އެމްއެންޑީއެފުން ނުބުނެ އެވެ.
އަލިފާނުގެ ހާދިސާ ހިނގި ކަމުގެ ރިޕޯޓް އެމްއެންޑީއެފަށް ލިބިފައި ވަނީ އާދީއްތަ ދުވަހުގެ ރޭ މެންދަމު 2:00 ހާއިރު އެވެ. މާލެ އާއި 22 ކިލޯ މީޓަރު ދުރުގައި އޮންނަ އެ ރިސޯޓަށް ސިފައިންގެ ފަޔަރ އެންޑް ރެސްކިއު ޓީމެއް ގޮސް އަލިފާންގަނޑު ކޮންޓްރޯލްކުރެވުނީ 4:30 ހާއިރު ކަމަށް އެމްއެންޑީއެފްގެ މީޑިއާ އޮފިޝަލް ވިދާޅުވި އެވެ.
މި ހާދިސާ ހިނގަން ދިމާވި ސަބަބެއް އެނގިފައިނުވާއިރު، ފުލުހުން ދަނީ މައްސަލަ ތަހްގީގުކުރަމުންނެވެ.
