ބައިނަލްއަގްވާމީ ޕްރެސް ފްރީޑަމް އިންޑެކްސް، އެއީ ބަލައިގަންނަ ރިޕޯޓެއް ނޫން: ބްރޯޑްކޮމް
ނޫސްވެރިކަމުގެ މިނިވަންކަން އެއްވެސް ވަރަކަށް ނެތް ގައުމުތަކުގެ ލިސްޓުގައި ރާއްޖެ މިވަނީ ހިމެނިފައި
ބްރޯޑްކާސްޓިންގ ކޮމިޝަން | ޓްވިޓަރ
ބައިނަލްއަގްވާމީ "ޕްރެސް ފްރީޑަމް އިންޑެކްސް" އަކީ މޯލްޑިވްސް ބްރޯޑްކާސްޓިންގ ކޮމިޝަން (ބްރޯޑްކޮމް) އިން ގަބޫލު ކުރާ އެއްޗެއް ނޫން ކަމަށް އެކޮމިޝަނުން ބުނެފިއެވެ.
ބްރޯޑްކާސްޓިންގ ދުވަހުގެ މުނާސަބަތުގައި ބްރޯޑްކޮމް އިން ބޭއްވި ނޫސްވެރިންގެ ބައްދަލުވުުގައި އެ ކޮމިޝަނުގެ ރައީސް މުހައްމަދު ޝަހީބު ވިދާޅުވީ ދުނިޔޭގެ ނޫސްވެރިކަމުގެ މިނިވަންކަމުގެ އިންޑެކްސް އެ ކޮމިޝަނުން ބަލައިނުގަންނަނީ، އެ ކޮމިޝަނުގެ ފަރާތުން އެއްވެސް މައުލޫމާތެއް އޮޅުންފިލުވުމެއް ނެތި އެ ރިޕޯޓް ޝާއިއުކުރަމުންދާތީ ކަމަށެވެ.
"ޕްރެސް ފްރީޑަމް އިންޑެކްސްއޭ ކިޔާފަ ކޮންމެ އަހަރަކު ޝާއިއުކުރޭ ރިޕޯޓެއް. އެހެން ނަމަވެސް އެ ރިޕޯޓަކީ އަޅުގަނޑުމެން ބްރޯޑްކާސްޓިންގ ކޮމިޝަނުން ގަބޫލުކުރާ އަދި ބަލައިގަންނަ ރިޕޯޓެއް ނޫން. މިހެން މިދަންނަވާ ސަބަބަކީ ރާއްޖޭގެ މީޑިއާ ދާއިރާގެ އެންމެ ބޮޑު އެއް މުއައްސަސާ އަކީ ބްރޯޑްކާސްޓިންގ ކޮމިޝަން. އަޅުގަނޑުމެންގެ ދަށުގައި އެންމެ ގިނަ މީޑިއާ ޗެނަލްތައް ރެޖިސްޓްރީކޮށްފައި މި އޮތީ ވެސް. އެހެން ނަމަވެސް ތި ވިދާޅުވާ ރިޕޯޓެއް ކޮންމެ އަހަރަކު ޝާއިއުކުރަމުން އަންނައިރު، ދުވަހަކު ވެސް އަޅުގަނޑުމެންނަށް ގުޅާ މައުލޫމާތު ސާފުކޮށްލާފައެއް ނެތް،" ޝަހީބު ވިދާޅުވިއެވެ.
ނޫސްވެރިކަމުގެ މިނިވަންކަން ރާއްޖެއިން ދުވަހެއް ދުވަހަކަށް ދަށަށް ގޮސް މިހާރު މިވަނީ ނޫސްވެރިކަމުގެ މިނިވަންކަން އެއްވެސް ވަރަކަށް ނެތް ގައުމުތަކުގެ ލިސްޓްގައި ފުރަތަމަ ފަހަރަށް ރާއްޖެ ވަނީ މިދިޔަ އަހަރު ހިމެނިފައެވެ.
އެމެރިކާ ސަރުކާރުން ފަންޑުކޮށްގެން ހިންގާ ފްރީޑަމް ހައުސް އިން ނެރުނު "ފްރީޑަމް އޮފް ދަ ޕްރެސް 2017" ގައި ބުނެފައިވާ ގޮތުގައި ނޫސްވެރިކަމުގެ މިނިވަންކަން އެއްވެސް ވަރަކަށް ނެތް ގައުމުތަކުގެ ތެރޭގައި ރާއްޖެ ހިމެނުނީ މީޑިއާތަކުގެ ކޮންޓްރޯލް ހޯދުމަށް ސަރުކާރުން ފާއިތުވެދިޔަ އަަހަރުގެ ތެރޭގައި ކޮށްފައިވާ ކަންތައްތަކުގެ ސަބަބުންނެވެ.
އެ ގޮތުން އަބުރާ ބެހުން ޖިނާއީ ކުށެއްގެ ގޮތުގައި ކަނޑައަޅައި، 2016 ވަނަ އަހަރު ފާސްކުރި "އަބުރު ރައްކާތެރިކޮށްދިނުމާ ޚިޔާލުފާޅުކުރުމުގެ މިނިވަންކަމުގެ ގާނޫނު" އަކީ ނޫސްވެރިކަމުގެ މިނިވަންކަން ގެއްލުމަށް ދިމާވި މައިގަނޑު އެއް ސަބަބުގެ ގޮތުގައި އެ ޖަމިއްޔާއިން ސިފަކޮށްފައި ވެއެވެ. އަދި ފުލުހުންގެ ފަރާތުން ނޫސްވެރިންނާއި މީޑީއާތަކަށް ކުރިމަތި ވަމުންދާ ގޮންޖެހުންތަކާއި ގާނޫނުތަކާއި އިޖުރާއަތުތަކާ ޚިލާފަށް ނޫސްވެރިން ހައްޔަރުކޮށް ދައުވާ ކުރުމަކީ ރާއްޖޭގައި ނޫސްވެރިކަމަށް ކުރިމަތިވާ އެންމެ ބޮޑު ގޮންޖެހުންތަކުގެ ގޮތުގައި ސިފަކޮށްފައި ވެއެވެ.
ނޫސްވެރިކަމުގެ މިނިވަންކަން ނެތް ގައުމުގެ ތެރޭގައި ރާއްޖެ ހިމެނުނު އިރު، ފާއިތުވެދިޔަ އަހަރުތަކަކީ އެކި ގޮތްގޮތުން ރާއްޖޭގެ މީޑިއާތަކާއި ނޫސްވެރިންނަށް ގޮންޖެހުންތަަކާ ކުރިމަތިލާންޖެހުނު އަހަރެކެވެ. އެގޮތުން ރާއްޖެޓީވީގެ ހަތަރު ނޫސްވެރިއެއްގެ މައްޗަށް ޖިނާއީ ދައުވާ ކުރުމާއި، އަބުރުގެ ގާނޫނު ފާސްކުރުމާއި، އެންމެ ގިނަ ދުވަސްވީ ނޫސް "ހަވީރު" ހުއްޓާލަން ޖެހުމާއި، ޗެނަލް ނިއުސް މޯލްޑިވްސް (ސީއެންއެމް) ބަންދުކުރަން ޖެހުން ފަދަ އެތައް ގޮންޖެހުންތަކާ ކުރިމަތިލާންޖެހިފައި ވެއެވެ.
