12 މެންބަރުންގެ ގޮނޑި ނުގެއްލޭ ކަމަށް އީސީއިން ނިންމި ނިންމުން ބާޠިލް: ސުޕްރީމް ކޯޓު
4 އޮކްޓޯބަރު 2018 | ބުރާސްފަތި 11:57އީސީއިން ވަނީ ބައި-އިލެކްޝަންތައް ނުބާއްވަން ނިންމާފަ
ގޮނޑިގެއްލިފައިވާ ކަމަށްބުނާ ބައެއް މެންބަރުން
ރައްޔިތުންގެ މަޖިލީހުގެ 12 މެންބަރެއްގެ މެންބަރުކަމާއި މެދު ޚިލާފު އުފެދިފައިވަނިކޮށް، ބުދަ ދުވަހު އިލެކްޝަންސް ކޮމިޝަނުން އެ މެންބަރުންނާއި މެދު ނިންމި ނިންމުމަކީ ބާޠިލް ނިންމުމެއް ކަމަށް ދިވެހިރާއްޖޭގެ ސުޕްރީމް ކޯޓުން ނިންމައިފިއެވެ.
ރައްޔިތުންގެ މަޖިލީހުގެ 12 ދާއިރާއެއްގެ މެންބަރުން ތިއްބެވި ޕާޓީއިން ވަކިވުމާއި، ޕާޓީއިން ވަކިކުރުމާއި ގުޅިގެން އިލެކްޝަނުން ކުރިން ނިންމާފައި ވަނީ އެ މެންބަރުންގެ ގޮނޑި ގެއްލިފައިވާ ކަމަށެވެ. އަދި އެ ދާއިރާތަކުގައި ބައި-އިލެކްޝަން ބާއްވާނެކަން ވެސް އެ ކޮމިޝަނުން ވަނީ އިޢުލާނުކޮށްފައެވެ.
ބުދަ ދުވަހުގެރޭ ސުޕްރީމް ކޯޓުން ނެރުނު އަމުރެއްގައި ބުނެފައި ވަނީ ރައްޔިތުންގެ މަޖިލީހުގެ މެންބަރެއްގެ ގޮނޑި ހުސްވެއްޖެ ކަމާމެދު ޚިލާފު އުފެދިގެން، ކަމާބެހޭ ފަރާތްތަކުން އެ މައްސަލަ ދިވެހިރާއްޖޭގެ ސުޕްރީމް ކޯޓަށް ހުށަހެޅުމުން އެ މައްސަލައަކާ މެދު، ދުސްތޫރީ ނަޒަރަކުން ބަލައި އެ މައްސަލައަކާ މެދު ފައިޞަލާކޮށް ގޮތެއް ކަނޑައެޅުމަކީ ދިވެހިރާއްޖޭގެ ޖުމްހޫރިއްޔާގެ ޤާނޫނު އަސާސީއިން އެއްވެސް އިސްތިސްނާއެއް ނެތި ހަމައެކަނި ދިވެހި ރާއްޖޭގެ ސުޕްރީމް ކޯޓަށް ލިބިދީފައިވާ އަޞްލީ އިޚްތިޞާޞެއް ކަން އެނގެން އޮތް ކަމަށެވެ.
އަދި އެހެންކަމުން، ރައްޔިތުންގެ މަޖިލީހުގެ މެންބަރުކަން ގެއްލިފައިވާ ކަމަށް ބުނާ 12 މެންބަރުން ސުޕްރީމް ކޯޓަށް ހުށަހަޅާފައިވާ މައްސަލައިގައި ސުޕްރީމް ކޯޓުން ގޮތެއް ނިންމުމުގެ ކުރިން އެ ދާއިރާތަކުގެ ގޮނޑިތަކާއިމެދު ބަހުސްކޮށް ވަކި ގޮތެއް ނިންމުމަކީ، އިލެކްޝަންސް ކޮމިޝަނަށް ނުވަތަ ދައުލަތުގެ އެހެން އެއްވެސް އިދާރާއަކަށް ވިޔަސް ޤާނޫނު އަސާސީ އިން ލިބިދީފައިވާ ބާރަކާއި އިޚްތިޞާޞެއް ނޫންކަން ސާފުކޮށް އެނގެން އޮންނަ ކަމަށެވެ.
އަދި މި މައްސަލައިގައި ސުޕްރީމް ކޯޓުން ގޮތެއް ނުނިންމަނީސް މައްސަލައިގެ މައުޟޫޢާމެދު ބަހުސްކޮށް ގޮތެއް ނިންމުމަކީ ފަނޑިޔާރުންގެ މަސައްކަތާ ބެހި ނުފޫޒުފޯރުވުމުގެ ޢަމަލެއްކަމަށް ބެލެވޭ ކަމަށާއި، އެފަދަ ނުފޫޒެއް ފޯރާފަދަ އެއްވެސް ކަމެއް ކުރުމަކީ ޤާނޫނު އަސާސީގައި މަނާކޮށްފައި އޮތް ކަމެއް ކަމަށެވެ.
މި ކަންކަން މިހެން ހުރުމުން، 3 އޮކްޓޯބަރ 2018 ވަނަ ދުވަހު އިލެކްޝަންސް ކޮމިޝަނުން ބޭއްވި އެ ކޮމިޝަނުގެ 442 ވަނަ ޖަލްސާގައި، ބަޔާންކުރެވުނު 12 ފަރާތާމެދު ނިންމާފައިވާ ނިންމުންތަކަކީ ބާޠިލް ނިންމުންތަކެއް ކަމަށް ސުޕްރީމް ކޯޓުގެ އަމުރުގައި ވަނީ ކަނޑައަޅާފައެވެ. އަދި މި މައްސަލައިގައި ސުޕްރީމް ކޯޓުން ގޮތެއް ނިންމުމުގެ ކުރިން އެ 12 މެންބަރުން ހިމަނައިގެން ރައްޔިތުންގެ މަޖިލީހުގެ ޖަލްސާއެއްގައި ނުވަތަ ކޮމިޓީއެއްގައި ނިންމާ ކޮންމެ ނިންމުމަކީ ވެސް ޣައިރު ދުސްތޫރީ ނިންމުންތަކެއް ކަމަށް ސުޕްރީމް ކޯޓުން ވަނީ ނިންމާފައެވެ.
އިލެކްޝަންސް ކޮމިޝަނުން އަންގާރަ ދުވަހު ކުރި ޓްވީޓެއްގައި ބުނެފައި ވަނީ ރައްޔިތުންގެ މަޖިލީހުގެ 12 ދާއިރާއެއްގެ ބައި އިލެކްޝަން ބޭއްވުމަށް އެ ކޮމިޝަނުން ނިންމި ނިންމުން ބާތިލު ކުރީ ސުޕްރީމް ކޯޓުން ގޮނޑީގެ މައްސަލާގައި ވަކި ގޮތެއް ކަނޑައަޅަންދެން ކަމަށެވެ. އަދި އީސީން ކުރިން ނިންމި ނިންމުން ބާތިލުކޮށް އެކަން މަޖިލީހަށާއި ކަމާ ބެހޭ ފަރާތްތަކަށް އެންގުމަށް ނިންމާފައިވާ ކަމަށެވެ.
ރައްޔިތުންގެ މަޖިލީހުގެ ޖަލްސާގައި 12 މެމްބަރުން ބައިވެރި ކުރުން ހުއްޓުވާފައި ވަނީ މިދިޔަ އަހަރުގެ ޖުލައި މަހުގެ 13 ދުވަހުން ފެށިގެންނެވެ. އެ ދުވަހުން ފެށިގެން މިހާތަނަށް އެ މެމްބަރުންގެ މުސާރަ އާއި އިނާޔަތްތަކާއި އިމްތިޔާޒުތައް ހިފަހައްޓާފައިވާތާ މިހާތަނަށް އެއް އަހަރާއި ދެ މަހާއި 20 ދުވަސް ވަނީ ވެފައެވެ.
ރައްޔިތުންގެ މަޖިލީހުގެ 12 މެމްބަރުންގެ ގޮނޑިއާމެދު ސުވާލު އުފައްދައި އަސްކަރިއްޔާ މެދުވެރިކޮށް އެ މެމްބަރުން މަޖިލީހަށް ވެއްދުން މަނާކުރީ ސަރުކާރު ހިންގާ ޕީޕީއެމަށް މަޖިލީހުގެ މެޖޯރިޓީ ގެއްލުމުންނެވެ. އެއަށްފަހު މަޖިލިސް ބާއްވާފައި ވަނީ ހަމައެކަނި ސަރުކާރުން ބޭނުންވާ ބިލެއް ފާސްކުރުމަށާއި މިނިވަން މުއައްސާސާތަކަށް ރައީސް ޔާމީން އައްޔަން ކުރަން ބޭނުންވާ ބޭފުޅުން އެ މުއައްސަސާތަކަށް އައްޔަން ކުރުމަށެވެ.
