ޗައިނާގައި އެއިޑްސް ބަލިޖެހިފައިވާ މީހުންގެ އަދަދު 14 އިންސައްތަ މައްޗަށް!
މިހާތަނަށް އެންމެ ގިނައިން މި ބަލި ފެތުރެމުން ގޮސްފައި ވަނީ ބަލި ޖެހިފައިވާ މީހުންގެ ލޭ އެހެން މީހުންގެ ގަޔަށް އެޅުމުގެ ސަބަބުން
އެއިޑްސް ބައްޔަށް ހޭލުންތެރި ކުރުމަށް ޗައިނާގައި ގިނަ މަސައްކަތްތަކެއް ކުރޭ
ޗައިނާގައި އެޗްއައިވީ/އެއިޑްސް ބަލި ޖެހިފައިވާ މީހުންގެ އަދު 14 އިންސައްތަ މައްޗަށް އުފުލިފައިވާ ކަމަށް އެ ޤައުމުން ބުނެފިއެވެ.
ޗައިނާގައި އެއިޑްސް ބަލި ޖެހިފައިވާ 820،000 މީހުން ތިބިއިރު، މި އަހަރުގެ ދެވަނަ ކުއާޓަރުގައި އެކަނި ވެސް އެޗްއައިވީ/އެއިޑްސްގެ އައު 40،000 ކޭސް ރިޕޯޓްކޮށްފައިވާ ކަމަށް ޗައިނާ އިން ވަނީ ބުނެފައެވެ.
ޗައިނާގެ ކަމާއި ބެހޭ ފަރާތްތަކުން ހާމަކޮށްފައިވާ ގޮތުގައި އެ ޤައުމުގައި މިހާތަނަށް އެންމެ ގިނަ އިން މި ބަލި ފެތުރެމުން ގޮސްފައި ވަނީ ބަލި ޖެހިފައިވާ މީހުންގެ ލޭ އެހެން މީހުންގެ ގަޔަށް އެޅުމުގެ ސަބަބުން ނަމަވެސް، ފަހަކަށް އައިސް އެ ޤައުމުގައި މި ބަލި ފެތުރިފައި ވަނީ ޖިންސީ ގުޅުން ހިންގުމުގެ ސަބަބުންނެވެ.
ބަލި ފެތުރޭ ގޮތް ބަދަލުވެފައިވާ އިރު، ލޭ އެޅުމުގެ ސަބަބުން މި ބަލި ޖެހޭ މީހުންގެ އަދަދު އެއްކޮށް ހެން ނައްތާލެވިފައިވާ ކަމަށް ވެސް ޗައިނާގެ އޮފިޝަލުން ވަނީ ބުނެފައެވެ.
ޗައިނާގައި އެއިޑްސް ބަލި ފެތުރޭ މިންވަރު އިތުރުވެފައިވާއިރު، ޗައިނާ ސަރުކާރުން ވަނީ އެއިޑްސް ބައްޔަށް ދޭ ބޭސް އެންމެންނަށް ވެސް ހިލޭ ލިބޭނެ މަގު ފަހިކޮށްދީފައެވެ.
