ޗައިނާގައި އުފެއްދި ފުރަތަމަ މަތިންދާ ބޯޓު އުފުލާ މަނަވަރު އިފްތިތާހުކޮށްފިއެވެ.
ޗައިނާ ހިމެނޭ ސަރަހައްދުގައި ހަަލަބޮލިކަން އުފެދިފައިވާއިރު ޗައިނާއިން އިފްތިތާހު ކުރި މަނަވަރަކީ އެގައުމުގެ ކަނޑުގެ ސިފައިންގެ ފްލީޓަށް ލިބުނު އެފަދަ ދެވަނަ މަނަވަރެވެ.
އިފްތިތާހް ކުރި މަނަވަރުގެ ނަމެއް ޗައިނާއިން ހާމަކޮށްފައިނުވާއިރު މަނަވަރު އިފްތިތާހު ކުރީ ޗައިނާގެ ކަނޑުގެ ސިފައިންގެ ލަޝްކަރު އެކުލަވައިލިތާ 68 އަހަރު ފުރުން ފާހަގަކުރިތާ އެއްދުވަސް ފަހުންނެވެ. ކުރިން ރިޕޯޓުތައް ބުނެފައިވަނީ އިފްތިތާހު ކުރި މަނަވަރުގެ އޮޕަރޭޝަން ފެށޭނީ 2020 ގައި ކަމަށެވެ.
ޗައިނާއިން އިފްތިތާހް ކުރި މަނަވަރު އުފައްދަން ފަށާފައި ވަނީ 2013 ގައެވެ. ޗައިނާގެ އާ މަނަވަރަކީ 50000 ޓަނުގެ ބުރަދަން އުފުލޭ، އެގައުމުގައި އުފައްދައި ބޭނުންކުރަމުން އަންނަ ޝެންޔަން -15 މަރުކާގެ ހަނގުރާމަމަތީ މަތިންދާބޯޓް އޮޕަރޭޓް ކުރެވޭނެ މަނަވަރެކެވެ.
އެމެރިކާ އާއި އުތުރު ކޮރެއާގެ ގުޅުން އާދަޔާ ހިލާފަށް ގޯސްވެފައިވާއިރު އެމެރިކާ އިން ވަނީ ދެކޮރެއާ ސަރަހައްދަށް ހަނގުރާމަމަތީ ބޯޓުތައް ފޮނުވާފައެވެ. މިކަމާ ބެހޭގޮތުން ޗައިނާއިން ބުނެފައި ވަނީ ހުރިހާ ފަރާތްތަކުން ސުލްހަ އިސްކުރުމަށެވެ.
