މިދިޔަ އަހަރުގެ ޖެނުއަރީ މަހުން ފެށިގެން އޮގަސްޓް މަހާ ހަމައަށް ރާއްޖެއަށް ޒިޔާރަތްކުރި ފަތުރުވެރިންގެ އަދަދާ އަޅާ ބަލާއިރު މިއަހަރު އެ މުއްދަތުގައި ރާއްޖެއަށް ޒިޔާރަތް ކުރި ފަތުރުވެރިންގެ އަދަދު ވަނީ 9.1 އިންސައްތަ އިތުރުވެފައެވެ.

ޓޫރިޒަމް މިނިސްޓްރީން އާންމުކޮށްފައިވާ ތަފާސް ހިސާބުތަކުން ދައްކާ ގޮތުގައި އޮގަސްޓް މަހުގެ ނިޔަލަށް ރާއްޖެއަށް 972،839 ފަތުރުވެރިން ޒިޔާރަތްކޮށްފައި ވެއެވެ. އަދި މިދިޔަ އަހަރުގެ އެ މުއްދަތުގައި ރާއްޖެއަށް ޒިޔާރަތްކޮށްފައި ވަނީ 892،025 ފަތުރުވެރިންނެވެ.

މިދިޔަ މަހު ރާއްޖެއަށް އެންމެ ގިނަ ފަތުރުވެރިން ޗައިނާއިން ޒިޔާރާތްކޮށްފައި ވާއިރު އެ މުއްދަތުގައި ޗައިނާ އިން ރާއްޖެއަށް 33،472 ފަތުރުވެރިން ޒިޔާރަތްކޮށްފައި ވެއެވެ. ދެވަނަ އަށް އެންމެ ގިނަ ފަތުރުވެރިން ރާއްޖެއަށް ޒިޔާރަތްކުރީ އިނގިރޭސިވިލާތުންނެވެ. އެ ޤައުމުން ރާއްޖެއަށް 9،249 ފަތުރުވެރިން ޒިޔާރަތް ކޮށްފައިވެއެވެ.

މިއަހަރުގެ އޮގަސްޓް މަހު ރާއްޖެއަށް 123،992 ފަތުރުވެރިން ޒިޔާރަތްކޮށްފައި ވާއިރު މިއީ 2017 ވަނަ އަހަރުގެ އޮގަސްޓް މަހު ރާއްޖެއަށް ޒިޔާރަތްކުރި ފަތުރުވެރިންގެ ނިސްބަތުން 2.2 އިންސައްތަ އިތުރުވުމެކެވެ.

މި އަހަރުގެ ފުރަތަމަ ތިން މަސް ދުވަހުގެ ތެރޭގައި ރާއްޖެއަށް ޒިޔާރަތްކުރި ފަތުރުވެރިންގެ ނިސްބަތް އިތުރުވެ ރާއްޖެ އަށް 993.5 މިލިއަން ޑޮލަރު ލިބިފައިވާނެ ކަމަށް މަރުކަޒީ ބޭންކް އެމްއެމްއޭ. އިން ވަނީ ކުރިން ލަފާކޮށްފައެވެ.

މި މަހުގެ ތެރޭގައި ރާއްޖެ އިން ވަނީ އެއް މިލިއަން ވަނަ ފަތުރުވެރިޔާ އަށް މަރުހަބާ ކިޔާފައެވެ.