އެއީ 'ސެލްފީ ސިޔާސީ ބަހުސް' އެއް: މާރިއާ
17 ސެޕްޓެމްބަރު 2018 | ހޯމަ 13:44ލާމަރުކަޒީ ނިޒާމަކީ ރައީސް ޔާމީން އަމަލު ކުރަން ބޭނުން ނުވާ ނިޒާމެއް ނަމަވެސް އަމަލު ކުރަންޖެހޭ ނިޒާމެއް
ގުޅިފައިވާ ސިޔާސީ ޕާޓީތަކުގެ ކެންޑިޑޭޓް އިބްރާހީމް މުހައްމަދު ސޯލިހުގެ ތަރުޖަމާނު މާރިއާ އަހުމަދުދީދީ
ދިވެހިރާއްޖޭގެ ގައުމީ ޔުނިވާރސިޓީ (އެމްއެންޔޫ) އިން ރިޔާސީ ބަހުސެއް ބާއްވަން މަސައްކަތް ކުރެއްވިނަމަވެސް ރިޔާސީ ބަހުސެއް ބޭއްވިފައިނުވާ ކަމަށާއި ބޭއްވި ފައިވަނީ ވަކި ބޭފުޅަކާ އެކު ކުރިއަށް ގެންދިޔަ ސިޔާސީ ބަހުސެއް ކަމަށް ގުޅިފައިވާ ޕާޓީ ތަކުން ބުނެފި އެވެ.
ގުޅިފައިވާ ސިޔާސީ ޕާޓީތަކުގެ ރިޔާސީ ކެންޑިޑޭޓް އިބްރާހިމް މުހައްމަދު ސޯލިހު (އިބޫ)ގެ ތަރުޖަމާނު މާރިއާ އަހުމަދުދީދީ ހޯމަ ދުވަހު ބޭއްވި ނޫސްވެރިންގެ ބައްދަލުވުމުގައި ވިދާޅުވީ ގައުމީ ޔުނިވަސިޓީގެ ރިޔާސީ ބަހުސްގައި ބައިވެރިވެވަޑައިގަތުމުގެ ޝައުގުވެރިކަން އިބޫވެސް ފާޅު ކުރެއްވި ކަމަށެވެ. ނަމަވެސް ބަހުސް ގައި ބައިވެރިވެވަޑައި ނުގެންނުވުމަށް، ފަހުން ނިންމެވީ ބޮޑު ޑްރާމާއަކަށް އެކަން ހައްދަވާ، އަދި އެބަހުސް ބާއްވާނެ ތާރީހަކާއި ވަގުތެއް ދެއްވުމަށް ތަކުރާރުކޮށް އެދިވަޑައިގެންނެވުމުން ވެސް އެކަން އަންގާދީފައިނުވުމުން ކަމަށެވެ. އަދި ރާއްޖެޓީވީގެ ރިޔާސީ ބަހުސްގައި ބައިވެރިވެވަޑައިނުގަތުމަށް ރައީސް އަބްދުﷲ ޔާމީން ނިންމެވުމުން، ގައުމީ ޔުނިވާރސިޓީން ބާއްވާ ރިޔާސީ ބަހުސްގައި ބައިވެރި ނުވުމަށް ނިންމެވީ ކަމަށްވެސް މާރިއާ ވިދާޅުވި އެވެ. މާރިއާ ވިދާޅުވީ ދުނިޔޭގެ އެހެން ގައުމުތަކުގައި އަދި ޔުނިވާރސިޓީތަކުން ވެސް ރިޔާސީ ބަހުސްތައް އިންތިޒާމު ކުރަނީ ކެންޑިޑޭޓުންގެ މެނިފެސްޓޯތައް ބަލައި ދިރާސާކުރުމަށްފަހު މެނިފެސްޓޯގައިވާ ސިޔާސަތުތަކާ ގުޅޭގޮތުން ކަމަށެވެ. ނަމަވެސް ގައުމީ ޔުނިވަސިޓީން ރައީސް ޔާމީންގެ ނަފްސަށް އަމާޒުވާ ގޮތަށް "ސެލްފީ ސިޔާސީ ބަހުސް" ކުރިއަށް ގެންދިޔައިރު ރައީސް ޔާމީންގެ މެނިފެސްޓޯ ވެސް އާންމުކޮށްފައި ނުވާ ކަމަށް ވިދާޅުވެ، މާރިއާ ވަނީ ވަރަށް ބޮޑަށް ފާޑު ވިދާޅުވެފަ އެވެ. ލާމަރުކަޒީ ނިޒާމަކީ ރައީސް ޔާމީން ގަބޫލުކުރައްވާ ނިޒާމެއް ނޫން ކަަމަށް، ގައުމީ ޔުނިވާރސިޓީން ބޭއްވި އެ ހަފްލާގައި ރައީސް ޔާމީނު ވިދާޅުވެފައިވާތީ، މާރިއާ ވިދާޅުވީ ލާމަރުކަޒީ ނިޒާމަކުން ގައުމު ހިންގުމާއި، ހިޔާލުފާޅުކުރުމުގެ މިނިވަންކަމަކީ ގާނޫނުއަސާސީގައި ކަށަވަރުކޮށްދީފައިވާ ކަންތައްތަކަކަށް ވާތީ ރައީސުލްޖުމްހޫރިއްޔާ ވެރިކަން ކުރައްވަންޖެހިވަޑައިގަންނަވާނީ ގާނޫނީ އިމުގެ ތެރެއިން ކަމަށެވެ.
ގާނޫނުއަސާސީގައި ކަންތައްތަކެއް ކުރަން ލާޒިމުކުރުމުން ރައީސް ޔާމީން ބޭނުންވާ ކަމެއް ކުރެއްވުމަށްފަހު ބޭނުން ނުވާ ކަމެއް ނުކުރައްވާ ދޫކޮށްލެއްވުމުގެ އިހްތިޔާރު ރައީސް ޔާމީނަށް ލިބިވަޑައިނުގަންނަވާ ކަމަށްވެސް މާރިއާ ވިދާޅުވި އެވެ.
