ޑރ. އަފްރާޝީމާއި އަނަސް ފަދައިން މަރާލެވިފައިވާ ފަރާތްތަކުގެ އާއިލާތަކަށް އިންސާފު ހޯދައިދޭނަން: ފައިސަލް
ދެފުށްފެންނަ ތަހުގީގުތަކެއްކޮށް އިންސާފު ގާއިމުކޮށްދޭނަން
ގުޅިފައިވާ ސިޔާސީ ޕާޓީތަކުގެ ރިޔާސީ ކެނޑިޑޭޓް އިބްރާހިމް މުހައްމަދު ސޯލިހުގެ ރަނިންގ މޭޓް ފައިސަލް ނަސީމް ރ މީދޫގައި ވާހަކަ ދައްކަވަނީ
ރަހުމުކުޑަކޮށް އަވަހާރަކޮށްލާފައިވާ އުނގޫފާރު ދާއިރާގެ ކުރީގެ މެމްބަރު ޑރ. އަފްރާޝީމް އަލީ އާއި މަރާލާފައިވާ ޒުވާނާ މުހައްމަދު އަނަސް ފަދައިން މަރާލާފައިވާ ފަރާތްތަކުގެ އާއިލާތަކަށް އިންސާފު ހޯދައި ދެއްވާނެ ކަމަށް، ގުޅިފައިވާ ސިޔާސީ ޕާޓީތަކުގެ ރަނިންގ މޭޓް ފައިސަލް ނަސީމް ވިދާޅުވެއްޖެ އެވެ.
ގުޅިފައިވާ ސިޔާސީ ޕާޓީތަކުން ރ. މީދޫގައި އާދިއްތަ ދުވަހުގެ ރޭ ބޭއްވި ޖަލްސާގައި ވާހަކަ ދައްކަވަމުން ފައިސަލް ވިދާޅުވީ އެތަކެއް ޒުވާނުންތަކެއްގެ ލޭ އޮހޮރުވާ މަރާލާފައިވާ ކަމަށާއި އެކަމުގެ ސަބަބުން ވަރަށް ހިތްދަތި ކުރުވާ ކަމަށެވެ.
މިދިޔަ އަހަރުގެ ޖުލައި މަހުގެ ތެރޭގައި މަރާލި ރ. މީދޫގެ ޒުވާނާ އަނަސްއާއި، ރ. އުނގޫފާރަށް ނިސްބަތްވެވަޑައިގަންނަވާ ޑރ. އަފްރާޝީމްގެ ނަން ފާހަގަކުރައްވަމުން ފައިސަލް ވިދާޅުވީ އެފަދައިން މަރާލެވިފައިވާ ފަރާތްތަކުގެ އާއިލާތަކަށް އިންސާފު ހޯދައިދެވެންޖެހޭ ކަމަށާއި، އިބްރާހިމް މުހައްމަދު ސޯލިހުގެ ވެރިކަމެއްގައި ދެފުށްފެންނަ ތަހުގީގުތަކެއްކޮށް މިފަދަ އާއިލާތަކަށް އިންސާފު ހޯދައި ދެއްވާނެ ކަމަށެވެ.
ފައިސަލް ވިދާޅުވީ ސިޔާސީ ފަރާތެއްގެ މައްސަލައެއް ނަމަ ހަފްތާއެއް ނުވަނީސް މައްސަލަ ނިންމައި ފޮނުވަންޖެހޭ ތާކަށް ފޮނުވޭ ކަމަށާއި އެހެން ނަމަވެސް މިފަދަ ބޮޑެތި މައްސަލަތައް އެ ސްޕީޑުގައި ކުރިއަށް ނުގެންދެވޭ ކަމަށެވެ. އެކަން ފާހަގަކުރައްވައި ފައިސަލް ވަނީ މިފަދަ މައްސަލަތައް ތަހުގީގު ކުރުމުގައި ސަރުކާރުގެ ނިޔަތް ހުރީ ކިހިނެއްތޯއާ މެދު ސުވާލު އުފައްދަވާފައެވެ.
މީގެއިތުރުން ފައިސަލް ވިދާޅުވީ ރާއްޖޭގައި އަމާންކަމާއި ރައްކާތެރިކަން ގާއިމްކުރަންޖެހޭ ކަމަށާއި އެންމެ ބޮޑު އަމާޒަކަށް ވާނީ ރާއްޖެއަކީ އަމާންކަމާއި ރައްކާތެރިކަމާއެކު އުޅެވޭނެ މާހައުލެއް ގާއިމްކުރުން ކަމަށެވެ. ގާނޫނީ އިމުގެ ތެރެއިން މަސައްކަތް ކުރުމަށް ފުލުހުންނަށް ގޮވާލައްވަމުން ފައިސަލް ވިދާޅުވީ އިބްރާހިމް މުހައްމަދު ސޯލިހުގެ ވެރިކަމެއްގައި ފުލުހުންނަށް އަބުރުވެރިކަމާއި ޝަރަފުވެރިކަމާއެކު އުޅެވޭނެ މާހައުލެއް ގާއިމްކޮށްދެއްވާނެ ކަމަށެވެ.
ރ. މީދޫ ރައްޔިތުންނާއި މުޚާތަބު ކުރައްވަމުން ފައިސަލް ވިދާޅުވީ މީދޫ ކައިރީގައި ގިނަ އަދަދެއްގެ ރިސޯޓުތައް އެބަހުރި ކަމަށާއި އެ ރިސޯޓުތަކުގެ ވަޒީފާތަކަށް ޒުވާނުން ތަމްރީނުކުރައްވާނެ ކަމަށެވެ. އެގޮތުން، މީދޫގައި ހޮސްޕިޓަލިޓީ ޓްރެއިނިންގ ސެންޓަރެއް ގާއިމްކުރައްވާނެ ކަމަށް ފައިސަލް ވިދާޅުވިއެވެ.
މީގެ ކުރިން ޕީޕީއެމްގެ މެޖޯރިޓީ ރަށެއްގެ ގޮތުގައި ފާހަގަކުރެވުނު މީދޫއިން ވަނީ ފައިސަލްއަށް ހޫނު މަރުހަބާއެއް ދަންނަވާފައެވެ. އެގޮތުން މީދޫގެ ކުދިބޮޑު ގިނަ ރައްޔިތުންތަކެއް ފައިސަލް އަށް މަރުހަބާ ދެންނެވުމަށް ނިކުމެފައިވެއެވެ.
