ޕީޕީއެމްގެ ޖަލްސާ އަންގާރަ ދުވަހަށް ފަސްކޮށްފި
16 ސެޕްޓެމްބަރު 2018 | އާދީއްތަ 10:04އަންގާރަ ދުވަހަކީ ބަންދު ދުވަހެއް ކަމަށް ސަރުކާރުން ވަނީ ކަނޑައަޅާފައި
އެންމެ ފަހުން ޕީޕީއެމުން ކާނިވާ ސަރަހައްދުގައި ބޭއްވި ޖަލްސާ
ހޯމަ ދުވަހު "ސައިޒު ދައްކާލަން" ޕީޕީއެމުން ބާއްވަން ހަމަޖެހިފައިވާ ޖަލްސާ އަންނަ އަންގާރަ ދުވަހަށް ބަދަލު ކޮށްފިއެވެ.
ޕީޕީއެމުން ބޭއްވި ނޫސްވެރިންގެ ބައްދަލުވުމެއްގައި އެޕާޓީގެ ނާއިބު ރައީސް އަބްދުއްރަހީމް ވިދާޅުވީ ޖަލްސާ ލަސްކުރީ އެކި ރަށްރަށުގެ ރައްޔިތުންގެ އެދުމުގެ މަތިން ކަމަށެވެ. ޕީޕީއެމްގެ އެ ޖަލްސާއަށް އަތޮޅުތަކުން މީހުން ގެންނަން ހަމަޖެހިފައިވާ ކަމަށް އޭނާ ވިދާޅުވިއެވެ.
"މުޅި ރާއްޖެއިން ރައީސް ޔާމީނަށް ތާއީދު ކުރައްވާ ހުރިހާ ބޭފުޅުންނަށް ޕީޕީއެމް ޖަލްސާއަށް އައުމަށް ދައުވަތު އަރުވަން،" އަބްދުއްރަހީމް ވިދާޅުވިއެވެ.
ސަރުކާރު ހިންގާ ޕީޕީއެމުން ޖަލްސާ ބާއްވާ ދުވަސް ބަދަލު ކޮށްފައިވާއިރު ސަރުކާރުން ވަނީ އެދުވަހަކީ ރަސްމީ ބަންދު ދުވަހެއްގެ ގޮތުގައި ކަނޑައަޅާފައެވެ. ސަރުކާރުން ބުނެފައި ވަނީ އެ ދުވަސް ބަންދު ދުވަހެއްގެ ގޮތުގައި ކަނޑައެޅީ ސަރަހައްދީ ފުޓްބޯޅަ މުބާރާތް، ސާފް ސުޒުކީ ކަޕްގެ ޗެމްޕިއަންކަން ހޯދި ރާއްޖޭގެ ގައުމީ ފުޓްބޯޅަ ޓީމަށް މަރުހަބާ ކިޔުމަށް ކަމަށެވެ.
ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޕީޕީއެމްގެ ޕާލިމަންޓްރީ ގްރޫޕްގެ ލީޑަރު އަހުމަދު ނިހާނު ހުސެއިން މަނިކު ވިދާޅުވީ އަންގާރަ ދުވަހަށް ޖަލްސާ ބާއްވާ ދުވަސް ބަދަލުކުރުމުން ޖަލްސާގެ އުފާވެރިކަން ބޮޑު ކަމަށެވެ. ނިހާނު ވިދާޅުވީ އެއީ ގައުމީ ޓީމް ރާއްޖެ އަންނާތީ ކަމަށެވެ.
އަންގާރަ ދުވަހުގައި ބާއްވާ ޖަލްސާގައި އެ ޕާޓީގެ މެނިފެސްޓޯ އާންމު ކުރައްވާނެ ކަމަށް ރައީސް އަބްދުﷲ ޔާމީން ވަނީ ވިދާޅުވެފައެވެ.
