ތޫފާން މަންޚޫތު އަރައި 25 މީހުން މަރުވެއްޖެ
16 ސެޕްޓެމްބަރު 2018 | އާދީއްތަ 03:54ތޫފާން މަންޚޫތު ފިލިޕީންސްއަށް އަރާފައި ވަނީ ހޮނިހިރު ދުވަހު
ތޫފާން މަންޚޫތު ފިލިޕީންސްއަށް އަރާފައި
ފިލިޕީންސަށް މިއަހަރު މިހާތަނަށް އަރާފައިވާ އެންމެ ބާރުގަދަ ތޫފާން ކަމަށްބުނާ ތޫފާން މަންޚޫތު އަރައި މަދުވެގެން 25 މީހުން މަރުވެފައިވާކަމަށް ޚަބަރުތައް ބުނެފިއެވެ.
ފިލިޕީންސްގެ ރައީސްގެ އެޑްވައިޒަރާއި ހަވާލާދީ ރޮއިޓާސްއިން ބުނީ ގިނައިން މީހުން މަރުވެފައި ވަނީ ފަރުބަދަމަތީގެ ސަރަހައްދުތަކުގެ ބިންގަނޑު ކަނޑައިގެން ދިއުމުގެ ސަބަބުން ކަމަށެވެ.
މި ތޫފާނުގެ ސަބަބުން އެކި ހިސާބުތަކުގައި ކަރަންޓް ކެނޑިފައިވާއިރު އެކި އިމާރާތްތަކަށް ވަނީ ބޮޑެތި ގެއްލުން ލިބިފައެވެ. މީގެ އިތުރުން ދަނޑުބިންތައް ބޭނުންނުކުރެވޭ ވަރަށް ވަނީ ހަލާކުވެފައެވެ. އަދި ކޯރުތައް ބަންޑުންވެ ގިނަ ހިސާބުތަކެއްގައި ފެންބޮޑުވެފައިވެއެވެ.
މީހުން ސަލާމަތް ކުރުމުގެ މަސައްކަތްތައް ކުރަމުންދާއިރު ރައްކާތެރި ހިސާބުތަކަށް މީހުން ގެންދިއުމުގެ މަސައްކަތް ކަމާބެހޭ ފަރާތްތަކުން ދަނީ ކުރަމުންނެވެ.
މި ތޫފާނު ފިލިޕީންސަށް އަރާނެކަމަށް ދުރާލައި ވަނީ އިންޒާރު ދީފައެވެ. ތޫފާން މަންޚޫތު ފިލިޕީންސަށް މި ތޫފާން އަރާފައި ވަނީ ހޮނިހިރު ދުވަހުއެވެ.
