ގުޅިފައިވާ ސިޔާސީ ޕާޓީތަކުގެ ސިޔާސަތުތައް ހިމެނޭ މެނިފެސްޓޯ ރައްޔިތުންނަށް ހާމަކޮށްދިނުމަށް ގުޅިފައިވާ ސިޔާސީ ޕާޓީތަކުން މާލޭގައި ހަރަކާތްތެރިވާން ވަށައިފިއެވެ.
ގުޅިފައިވާ ސިޔާސީ ޕާޓީތަކުގެ މެނިފެސްޓޯ "ޖަޒީރާ ރާއްޖެ"ގެ މެނިފެސްޓޯގެ އެކިއެކި ސިޔާސަތުތައް ހިމެނޭ އަތްމަތީ ފޮތްތަކެއްގެ ގޮތުގައި ޗާޕްކޮށްގެން، އެ ފޮތްތައް ރައްޔިތުންނަށް ބެހުމަށާއި ސިޔާސަތުތައް އޮޅުންފިލުވައި ދިނުމަށް ސިޔާސީ ޕާޓީތަކަށް ނިސްބަތްވާ އިސްބޭފުޅުންނާއި ކެމްޕެއިންގައި ހަރަކާތްތެރިވާ ފަރާތްތައް ހޮނިހިރު ދުވަހު މާލޭގައި ހަރަކަތްތެރިވާން ފަށާފައިވާއިރު، އެވައުދުތަކުގެ ވާހަކަތައް މީގެ ކުރިން އެކިއެކި ޖަލްސާތަކުގައި ވަނީ ހާމަ ކޮށްފައެވެ.
ހޮނިހިރު ދުވަހު އެ ހަރަކާތުގައި އިސްކޮށް ހަރަކާތްތެރިވެ ވަޑައިގެންނެވި ގުޅިފައިވާ ސިޔާސީ ޕާޓީތަކުގެ ރިޔާސީ ކެންޑިޑޭޓް އިބްރަހީމް މުހައްމަދު ސޯލިހުގެ ތަރުޖަމާނު މާރިއާ އަހުމަދުދީދީ ވިދާޅުވީ އެ ހަރަކާތްތަކަކީ ގުޅިފައިވާ ސިޔާސީ ޕާޓީތަކުގެ ސިޔާސަތުތައް އިތުރަށް ރައްޔިތުންނަށް އޮޅުން ފިލުވައިދިނުމަށް ކުރާ ކަމެއް ކަމަށެވެ.
އެ ހަރަކާތް ފަށާފައި ވަނީ މަސްވެރިންގެ މާރުކޭޓް ސަރަހައްދާއި ލޯކަލް މާރުކޭޓް ހިމެނޭ ގޮތަށް ބާޒާރު މަތިންނެވެ.
ގުޅިފައިވާ ސިޔާސީ ޕާޓީތަކުން ވަނީ މެނިފެސްޓޯގައިވާ ސިޔާސަތުތައް ވަކިވަކި އަތްމަތީ ފޮތްތަކެއްގެ ގޮތުގައި، މަސްވެރިންށާއި ދަނޑުވެރިންނަށާއި، އަދި ބާޒާރު މަތީގައި ތިބި މީހުންނަށް ބަހާ އޭގައިވާ މައުލޫމާތުތައް އިތުރަށް ތަފްސީލުކޮށްދީފައެވެ.
އެ ހަރާކާތުގައި އުޅުއްވި ރައްޔިތުންގެ މަޖިލީހު މަކުނުދޫ ދާއިރާގެ މެމްބަރު އަދި އަދާލަތު ޕާޓީގެ ޕާލަމެންޓް މެމްބަރު އަނާރާ ނައީމު ވިދާޅުވީ ގުޅިފައިވާ ސިޔާސީ ޕާޓީތަކުން ކުރަމުންދާ މަސައްކަތަކީ ރައްޔިތުންނަށް ބޭނުންވާ ކަންކަން، ހާއްސަކޮށް މީހުން ދިރިއުޅޭ ހުރިހާ ރަށަކަށް ބޭނުންވާ އަސާސީ ހިދްމަތްތައް ފޯރުކޮށްދިނުމަށް ކުރަމުންދާ މަސައްކަތެއް ކަމަށާއި ގައުމު ހަމަ މަގަށް އަޅުވާ، ރައްޔިތުންނަށް އުފާ ފާގަތި ދިރިއުޅުމެއް ހޯދައިދިނުމަށް ކުރަމުންދާ މަސައްކަތެއް ކަމަށެވެ.
މާރިއާ އަދި އަނާރާ ވެސް ވަނީ ވޯޓުލުމުގެ ހައްގު ލިބިގެންވާ ހުރިހާ ރައްޔިތުން މި މަހުގެ 23 ވަނަ ދުވަހު ވޯޓު ލުމަށް ވީހާ ވެސް އަވަހަކަށް ނުކުންނެވުމަށް ގޮވާލައްވާފަވެ.
