ގުޅިފައިވާ ސިޔާސީ ޕާޓީތަކުން ކާނިވަލުގައި ބޭއްވި ޖަލްސާގައި ބައިވެރިވި މީހުން ފެނިފައި، ރަސްމީ ސައިޒު ދައްކަން ޕީޕީއެމުން ބޮޑު ޖަލްސާއެއް ބޭއްވުމުގެ ތައްޔާރީތައް ވަމުންދާ ކަމަށް ސަރުކާރަށް ނިސްބަތްވާ ޕީޕީއެމް ޕާލަމެންޓްރީ ގްރޫޕްގެ ލީޑަރު އަހުމަދު ނިހާނު ހުސައިން މަނިކު ވިދާޅުވެފައި ވާތީ ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެމްބަރު އަހުމަދު މަހްލޫފް ރައްދު ދެއްވައިފިއެވެ.
ގުޅިފައިވާ ސިޔާސީ ޕާޓީތަކުގެ ތަރުޖަމާނުގެ ގޮތުގައި ހުންނަވަނިކޮށް، މުޒާހަރާއަކަށް މާސްކް ބެހި ކަމަށް ބުނާ މައްސަލައެއްގައި ޖަލުގައި ބަންދު ކުރުމަށް ފަހު މިހާރު ގޭބަންދުގައި ހުންނެވި މަހްލޫފް ކުރެއްވި ޓްވީޓެއްގައި ނިހާނަށް އިހުތިރާމު ކުރެއްވުމާ އެކު މްހްލޫފް ވިދާޅުވީ ގުޅިފައިވާ ޕާޓީތަކުގެ ރަސްމީ ސައިޒް ސެޕްޓެމްބަރު 23 ވަނަ ދުވަހު ދައްކާލާނެ ކަމަށެވެ.
Brother @ahmed_nihan, alhugandumenge rasmee size dhahkaalaanee Allah iraadhafulhaaeku 23 September ga. https://t.co/pAvcD4yuML
— Ahmed Mahloof (@AhmedMahloof) September 10, 2018
ގުޅިފައިވާ ސިޔާސީ ޕާޓީތަކުން މާލޭގައި ބޮޑު ޖަލްސާއެއް ބޭއްވުމަށް މީގެ ތިން އަހަރު ދުވަސް ކުރިން ކުރަމުންދިޔަ މަސައްކަތް ކާމިޔާބުވީ މިދިޔަ ހޮނިހިރު ދުވަހުގެ ރޭ ބޭއްވި ހާއްސަ ބޮޑު ޖަލްސާއާ އެކުގައެވެ. ގުޅިފައިވާ ސިޔާސީ ޕާޓީތަކުން ސަރުކާރުގެ ކަމާބެހޭ އިދާރާތަކަށް ލިޔުމުން ހުށަހެޅުމުން ވެސް ޖަލްސާއެއް މާލެގައި ބޭއްވުމުގެ ފުރުސަތެއް އިދިކޮޅު ފަރާތަކަށް ލިބިފައެއް ނުވެއެވެ. ނަމަވެސް ސަރުކާރަށް ނިސްބަތްވާ ޕީޕީއެމުން ބޭނުން ދުވަހު މާލޭގައި ޖަލްސާތަކާއި ހަރަކާތްތައް ގެންދިޔައީ ހިންގަމުންނެވެ.
ގުޅިފައިވާ ސިޔާސީ ޕާޓީތަކުން ހޮނިހިރު ދުވަހު ރޭ، ކާނިވާ ސަރަހައްދުގައި ބޮޑު ޖަލްސާއެއް ބާއްވާފައިވާ އިރު، ހުކުރު ދުވަހުގެ ރޭ ޕީޕީއެމުން ވެސް ވަނީ ހަމަ އެސަރަހައްދުގައި ބޮޑު ޖަލްސާއެއް ބާއްވާފައެވެ. އެ ދެ ޖަލްސާގެ ތަފާތު ފެނިފައި ނިހާނު ވިދާޅުވެފައި ވަނީ ޕީޕީއެމްގެ "ރަސްމީ ސައިޒު" ދައްކާލުމަށް ބޮޑު ޖަލްސާއެއްް ބޭއްވުމަށް މަސައްކަތް ކުރަމުންދާ ކަމަށެވެ.
އެނގިފައިވާ ގޮތުގައި ޕީޕީއެމްގެ އެޖަލްސާ ބޭއްވުމަށް ނިންމާފައި ވަނީ އަންނަ ހޯމަ ދުވަހުގެ ރެއެވެ.
