ފ އަތޮޅާ ގުޅޭ ގޮތުން ނިއު ޔޯކް ޓައިމްސްއަށް ސަރުކާރުން ރައްދުދީފި
ސަރުކާރުން ވަނީ 10 ބިލިއަން ޑޮލަރުގެ އިންވެސްޓެއް ކުރާނެ ކަަމަށް ބުނެފަ
ސަރުކާރުން ފ. އަތޮޅު ވިއްކާލަން އުޅެނީ ކަމަށް ބުނެ، މާޗް މަހު އެއަތޮޅު ބިލެތްދޫގައި މުޒާހަރާ ކުރަނީ.
ސައުދީ އަރަބިއްޔާއިން ރާއްޖޭގައި 10 ބިލިއަން ޑޮލަރުގެ އިންވެސްޓްމެންޓެއް ކުރުމާ ގުޅޭ ގޮތުން އެމެރިކާގެ ނޫހެއްގައި ޝާއިޢުކޮށްފައިވާ ލިޔުމަކާ ގުޅިގެން ދިވެހި ސަރުކާރުން ރައްދުދީފި އެވެ.
އެމެރިކާއަށް ރާއްޖެއިން ކަނޑައަޅާފައިވާ ސަފީރު އަހުމަދު ސަރީރު ނިއުޔޯކް ޓައިމްސް އަށް ރައްދު ދީ ވަނީ ލިޔުމެއް ފޮނުވާފަ އެވެ. އެ ލިޔުން އެ ނޫހުންވަނީ، ޝާއިއު ކޮށްފަ އެވެ.
އަހުމަދު ސަރީރު ފޮނުވާފައިވާ ރައްދުގައި ބުނެފައިވަނީ " އިންހެބިޓެންސް އޮފް މޯލްޑިވްސް އެޓޯލް ފިޔަރ 10 މިލިއަން ޑޮލަރ ސައުދީ އިންވެސްޓްމެންޓް"ގެ ނަމުގައި ނިއުޔޯކް ޓައިމްސްގައި މިދިއަ މަރޗު މަހުގައި ލިޔެފައިވާ ލިޔުމަކީ، ހަގީގާތަކާ ހިލާފު މައުލޫމާތު ހިމެނޭ، އޮޅުން އަރާގޮތަށް ލިޔެފައިވާ ލިޔުމެއް ކަމަށެވެ. ފ އަތޮޅަށް ކުރާ އިންވެސްޓްމެންޓަކީ ސަރުކާރުން ސިއްރުކޮށްފައިވާ އިންވެސްޓްމެންޓެއް ނޫން ކަމަށާއި އެކަމާ ގުޅޭ އެންމެ ފުރަތަމަ ސްޓޭޖުގެ މަޝްވަރާތައް ކުރަމުންދާ ކަމަށް ސަރީރު ފޮނުވި ލިޔުމުގައި ބުނެ އެވެ.
ސަރީރު މިހެން ވިދާޅުވި ނަމަވެސް، އެ މަޝްރޫއުގެެ ތަފްސީލެއް ސަރުކާރުން ހާމަކޮށްފައެއް ނެތެވެ.
ސަރީރު ފޮނުވާފައިވާ ލިޔުމުގައި އިތުރަށް ވިދާޅުވެފައި ވަނީ، ނިއުޔޯކް ޓައިމްސްގައި މާޗް 26، 2017 ގައި ޝާއިޢުކުރި ލިޔުމުގައި، ރާއްޖެފަދަ ކުދި ޖަޒީރާ ގައުމުތަކަށް ތަރައްގީ ބޭނުންވާ މުހިއްމުކަން ހާމަކޮށްފައިނުވާ ކަމަށެވެ،
ރާއްޖޭއަކީ ހަމައެކަނި ރީތި ގޮނޑުދޮށްތަކެއް އޮތް ގައުމެއް ނޫން ކަމަށާއި މިއީ ހަތަރު ލައްކަ މީހުންގެ އާބާދީއެއް ދިރިއުޅެމުންދާ ގައުމެއް ކަމަށާއި އެހެންވެ، ރައްޔިތުންނަށް ދިރިއުޅުމުގެ ފުރިހަމަ ނިޒާމެއްގެ އިތުރުން ވަޒީފާގެ ފުރުސަތުތައް ފަހިވެފައި އޮންނަން ޖެހޭނެ ކަމަށް ސަރީރުގެ ރައްދުގައި ވިދާޅުވެފައިވެ އެވެ.
ކުދި ރަށްތަކުން ރައްޔިތުން އެހެން ރަށްރަށަށް ބަދަލުކުރުމުގެ އެއްވެސް އަމަލެއް ސަރުކާރުން ހިންގާފައިނުވާ ކަމަށާއި، ރައްޔިތުން އެހެން ރަށްރަށަށް ބަދަލުވަނީ އެ ރަށެއްގައި ދިރިއުޅޭ ރައްޔިތުންގެ އަމިއްލަ ބޭނުން ވެގެން ނުވަތަ މަޖުބޫރުން ނޫންކަމަށް ސަރީރުގެ ލިޔުމުގައި ބުނެ އެވެ. އެހެން ނަމަވެސް އެއްފަސްވުމަކީ ސަރުކާރުން ރައްޔިތުންނަށް ރަގަޅު ހިދުމަތެއް ފޯރުކޮށްދިނުމަށް ބާރު އަޅާ ކަމެއް ކަމަށް ސަރީރު ނިއުޔޯކް ޓައިމްސްއަށް ފޮނުވާފައިވާ ލިޔުމުގައިވެ އެވެ.
ކޮންމެ ގައުމެއް އެގައުމެއްގެ ރައްޔިތުންނަށް އެންމެ އެކަށޭނަ ތަރައްގީވެފައިވާ ދިރިއުޅުމެއް ހޯދާދިނުމުގެ ފުރުސަތު ބޭނުންވާނެ ކަމަށާއި ރާއްޖެއަށް އަންނަ ހުރިހާ އިންވެސްޓްމެންޓަކީ، ގާނޫނުއަސާސީއާ އެއްގޮތަށް ކުރިއަށްގެންދާ އިންވެސްޓްމެންޓްގެ ފުރުސަތުތައް ކަމަށް ވެސް ދިވެހި ސަރުކާރުން ބުނެ އެވެ.
ސައުދީން ފާފު އަތޮޅަށް ކުރާ އިންވެސްޓްމެންޓުގައިވެސް އެހެން އާއްމުކޮށްކުރާ އިންވެސްޓްމެންޓާ ތަފާތުތަކެއް ނުހުންނާނެ ކަމަށް ދިވެހި ސަރުކާރުން ބުނެ އެވެ.
ނިއުޔޯކް ޓައިމްސް އިން ޝާއިއުކޮށްފައިވާ އަރޓިކަލްގައި ވަނީ ސަރުކާރުން ސައުދީ އިންވެސްޓް ފެށުމުގެ މަސައްކަތް ފާފު އަތޮޅުގައި ފަށާ އިރު އެކަމާ ރައްޔިތުންގެ ކަންބޮޑުވުންތަކެއް ހުރިކަން ފާހަގަކޮށްފަ އެވެ.
އެގޮތުން އެމީހުން ދިރިއުޅޭ ރަށުން ބޭރުވަން ޖެހިދާނެތީ ރަށްރަށުގެ ރައްޔިތުން ކަންބޮޑުވާކަން ވަނީ ފާހަގަކޮށްފަ އެވެ.
ސައުދީ ޝާހީ އައިލާއިން ފާފު އަތޮޅުގައި އިންވެސްޓްކުރުމާއި ގުޅޭ ގޮތުން ތަފާތު އެކި ވާހަކަތައް ދެކެވިފައިވާ އިރު މަޖިލީސް މެންބަރު ޕީޕީއެމް ޕާލިމެންޓްރީ ގްރޫޕުގެ ލީޑަރު އަހުމަދު ނިހާން ހުސެއިން މަނިކު ކަމަށް ބެލެވޭ މީހަރުގެ އޯޑިއޯގައި ވަނީ ފާފު އަތޮޅު އޮތް ޖޯގްރަފިކް ލޮކޭޝަން ފެނިވަޑައިގަތުމުން ވަލީއަޚުދު ނިންމެވީ އެ ސަރަހައްދު ތަރައްގީ ކުރުމަށް ކަމަށެވެ. ނަމަވެސް، 99 އަހަރަށް އެތަން ބޭނުންފުޅުނުވާ ކަމަށާއި ވަލީއަޚުދު ބޭނުންފުޅުވަނީ ވާރުތަވާ މުދަލެއްގެ ގޮތުގައި އެތަން ބޭއްވުމަށް ކަމަށް ވެސް ނިހާނު ވިދާޅުވެފައިވެ އެވެ.
ގާނޫނު އަސާސީ ބަދަލުކޮށް ކުރި ކަންތައް ނުވަތަ ޖެހި މަޅި ރައްޔިތުންނަށް ނޭނގޭނެ ކަމަށާއި ރައްޔިތުންނަށް މިވީގޮތް އެނގޭނީ މިލްކުކުރަނީ ފ. އަތޮޅުކަން އެނގޭ ދުވަހަކުން ކަމަށެވެ. އެ ސަރަހައްދުގެ ފަޅުތައް ސައުދީ ޝާޚީ އާއިލާގެ އަމިއްލަ ޚަރަދުގައި ހިއްކާނެ ކަމަށެވެ. އަދި 30 އިންސައްތަ ދިވެހިންނަށްދީ ބާކީ 70 އިންސައްތަ މިލްކުކުރާނެ ކަމަށް ނިހާނު ވިދާޅުވެފައިވެ އެވެ.
