މަހްލޫފްގެ މައްސަލައިގާ ހުރި ކަންބޮޑުވުންތައް އެމްޑީޕީން އައިޕީޔޫއަށް ހުށަހަޅައިފި
8 ފެބުރުއަރީ 2017 | ބުދަ 18:37ހަ މަހުގެ ޖަލު ހުކުމް ތަންފީޒުކޮށް ނިމުނުއިރު ވެސް އިސްތިއުނާފް ޝަރީއަތް ހައި ކޯޓުން ފަށާފައެއް ނެތް
އަހުމަދު މަހްލޫފް: ފުރަތަމަ ހުކުމުގެ ތަންފީޒްކޮށް ނިމުނުއިރު އިސްތިއުނާފްގެ ޝަރީއަތް ނުފެށޭ
ފުލުހުންގެ ދައުރު އަދާކުރަން ދަތި ކުރިކަމަށް ބުނެ ޖަލަށްލާފައިވާ ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެމްބަރު އަހުމަދު މަހްލޫފްގެ މައްސަލައިގައި ހުރި ކަންބޮޑުވުންތައް އެމްޑީޕީގެ ފަރާތުން އިންޓަ ޕާލިމެންޓްރީ ޔޫނިއަން (އައިޕީޔޫ) އަށް ހުށަހަޅައިފި އެވެ.
އެމްޑީޕީގެ ޕީޖީ ގްރޫޕުގެ ލީޑަރު އިބްރާހިމް މުހައްމަދު ސޯލިހް(އިބޫ) ސޮއި ކުރައްވައި، އައިޕީޔޫގެ އިންސާނީ ހައްގުތަކާބެހޭ ކޮމެޓީގެ ރައީސް ފަޒްލޭ ކަރީމް ޗައުދަރީއަށް ފޮނުވި ސިޓީގައި، މަހްލޫފްގެ މައްސަލާގައި އެކި މުއައްސަސާތަކުން އަމަލުކުރާ ގޮތާ މެދު ކަންބޮޑުވުން ފާޅުކޮށްފައިވެ އެވެ.
އެގޮތުން މަހްލޫފަށް އިއްވި ހަ މަހުގެ ޖަލު ހުކުމް ތަންފީޒުކޮށް ނިމުނުއިރުވެސް އިސްތިއުނާފް ޝަރީއަތް ހައިކޯޓުން ފަށާފައި ނެތުމާއި އެ ހުކުމް ތަންފީޒު ކުރުން ފަސް ކުރުމުގެ އަމުރެއް ނެރެދޭން ހައި ކޯޓުން ދެކޮޅު ހެދިކަން އެ ސިޓީގައި ފާހަގަކޮށްފައިވެ އެވެ.
އައިޕީޔޫއަށް ފޮނުވި ސިޓީގައި އިބޫ ވިދާޅުވެފައިވަނީ މަހްލޫފްގެ ހުކުމް ތަންފީޒުކޮށް ނިމެންދެން އިސްތިއުނާފް ޝަރީއަތް ފެށުން ގަސްދުގައި ހައިކޯޓުން ލަސްކުރާކަން ވަރަށް ސާފުކޮށް އެނގޭ ކަމަށެވެ.
ހަ މަހުގެ ޖަލު ހުކުމް ތަންފީޒުކޮށް ނިމިފައިވާއިރުވެސް އޭނާއަށް ޕެރޯލްގެ ފުރުސަތު ވެސް ނުލިބުނު ކަމަށާއި އެ ހުކުމް ތަންފީޒުކޮށް ނިމެންދެން ކަރެކްޝަނަލް ސާވިސް އިން އެ މައްސަލަ ޕެރޯލް ބޯޑަށް ނުފޮނުވާ ތިބީ ކަމަށް އެ ސިޓީގައިވެ އެވެ.
މަހްލޫފްގެ މައްސަލާގައި ހޯމް މިނިސްޓަރާއި ހިއުމަން ރައިޓްސް ކޮމިޝަނާ ބައްދަލުކުރަން މަހްލޫފްގެ އަނބިކަނބަލުން އެދުނަސް އެއިން އެއްވެސް ފަރާތަކުން އެކަމަށް އިޖާބަ ނުދޭ ކަމަށް އެ ސިޓީގައިވެ އެވެ. އެ ސިޓީގައި އައިޕީޔޫގެ ކިބައިން އެދިފައިވަނީ ސަރުކާރާ މަޝްވަރާ ކޮށްގެން މަހްލޫފް ގެއަށް ބަދަލުކޮށްދެވޭނެ އިންތިޒާމެއް ހަމަޖައްސައި ދިނުމަށެވެ.އެ ހުކުމާ މަހްލޫފްގެ ގޮނޑި ނުގެއްލުނަސް ހުކުމުގެ މުއްދަތުގައި އޭނާއަށް މަޖިލީހުގެ ޖަލްސާތަކަށް ހާޒިރެއް ނުވެވޭނެ އެވެ.
