ބާސެލޯނާ އާއެކު ހަދާފައިވާ ކޮންޓްރެކްޓް އާކުރުމަށް އެޓީމަށް ކުޅެމުން އަންނަ އާޖެންޓީނާގެ ކެޕްޓަން ލިއޮނަލް މެސީ އެއްބަސްވެއްޖެ ކަމަށް މީޑިއާ ރިޕޯޓަތައް ބުނެފިއެވެ.

އަންނަ ސީޒަނަށްފަހު ބާސާ އާއި އެކު މެސީ ހަދާފައިވާ ކޮންޓްރެކްޓް ހަމަވާއިރު، ފާއިތުވި އަހަރުގެ ޖޫން މަހުން ފަށައިގެން ބާސާއިން އަންނަނީ މެސީއާއެކު ކޮންޓްރެކްޓް އިތުރު ކުރުމާމެދު މަޝްވަރާ ކުރަމުންނެވެ. ނަމަވެސް ކޮންޓްރެކްޓްއާ ކުރުމަށް މެސީ ވަނީ މީގެ ކުރިން ދެކޮޅު ހަދާފައެވެ.

މީޑިއާތަކުން ރިޕޯޓްކޮށްފައިވާ ގޮތުގައި، ކޮންރެކްޓް އާ ކުރުމަށް މެސީ ދެކޮޅުހަދާފައިވަނީ، ބާސާއިން އޭނާއަށް ހުށާއަޅާފައިވާ އާ ކޮންޓްރެކްޓްގައި އޭނާ ބޭނުންވާ ބައެއް ކަންތައްތައް ހިމަނާފައި ނުވާތީއެވެ. އެގޮތުން މެސީ ބޭނުންވަނީ، 5 އަހަރުގެ މި އެއްބަސްވުމުގެ ފުރަތަމަ 3 އަހަރު ނިމުމުން ބާކީ އޮތް 2 އަހަރު ޔޫރަޕްގެ އެހެން ކްލަބަކަށްބަދަލުވެވޭ ގޮތަށް ބޭއްވުމަށެވެ. 

ނަމަވެސް ބޭރުގެ ކުޅިވަރު ހަބަރު ފަތުރާ މީޑިއާތަކުން ރިޕޯޓްކޮށްފައިވާ ގޮތުގައި ބާސާއަށް މިހާރު ވަނީމެސީއާއެކު އެއްބަސްވުމަކަށް އާދެވިފައެވެ. ރިޕޯޓްތަށް ބުނާގޮތުން މެސީ އަށް އަހަރަކު 30 މިލިއަން ޔޫރޯ ލިބޭ ގޮތަށް 2021 ވަނަ އަހަރުގެ ނިޔަލަށް އެއްބަސްވުން އާ ކުރުމަށް ދެ ފަރާތުން މިހާރުވަނީ އެއްބަސްވެފައެވެ. އަދި ކޮންޓްރެކްޓް އެކުލަވާލެވޭނީ 400 މިލިއަން ޔޫރޯ ދައްކައިގެން ކަމަށްވެސް ރިޕޯޓްތައް ބުނެ އެވެ. މިހާރު އޭނާއަށް ލިބެނީ އަހަރަކު 21 މިލިއަން ޔޫރޯއެވެ. މިމަހުގެ 30 ވަނަ ދުވަހު އާ ކޮންޓްރެކްޓްގައި މެސީ ސޮއިކުރާނެކަމަށް ބެލެވޭއިރު ދާދިފަހުން މެސީ ވެސް ވަނީ ބާސާގައި މަޑުކުރަން ބޭނުންވާކަމަށް ބުނެފައެވެ.

ބޭރުގެ ކުޅިވަރު ޙަބަރު ފަތުރާ މީޑިއާއަކަށް ދާދިފަހުން މެސީ ދިން އިންޓަވިއުއެއްގައި އޭނާ ބުނެފައިވަނީ، ކެރިއަރު ނިންމާލަން އޭނާ ބޭނުންވަނީ ބާސާގައި  ކަމަށާއި، އެއީ އަބަދު ވެސް އޭނާ ދެކެމުން އައި ހުވަފެނެއް ކަމަށެވެ. ބާސެލޯނާގެ ޔޫތު އެކަޑަމީއިން ތަމްރީން ވެފައިވާ މެސީ ވަނީ މިހާތަނަށް އެ ކުލަބާއެކު ސްޕެނިޝް ލީގު 8 ފަހަރު، ސްޕެނިޝް ކަޕް 5 ފަހަރު، އަދި ޗެމްޕިއަންސް ލީގު 4 ފަހަރު ކާމިޔާބުކޮށްފައެވެ.