ދުވާފަރު ކައުންސިލްގެ ރައީސް ޕީޕީއެމުން ވަކިވެ، އެމްޑީޕީއަށް ސޮއި ކުރައްވައިފި
ނަސީރު ވިދާޅުވީ ރައީސް ޔާމިން ވެވަޑައިގެންނެވި ވައުދުތައް ނުފުއްދަވާކަމަށް
ދުވާފަރު ކައުންސިލްގެ ރައީސް އިބްރާހިމް ނަސީރު އެމްޑީޕީއަށް ސޮއިކުރެއްވުމަށްފަހު ފޯމް ހަވާލުކުރައްވަނީ
ދުވާފަރު ކައުންސިލްގެ ރައީސް އިބްރާހިމް ނަސީރު ޕީޕީއެމް އިން ވަކިވެ, އެމްޑީޕީއަށް ސޮއިކުރައްވައިފި އެވެ.
އިބްރާހިމް ނަސީރު ޕީޕީއެމްގެ ޓިކެޓްގައި ކައުންސިލް ގޮނޑި ކާމިޔާބު ކުރެއްވީ 2016 ވަނަ އަހަރު އެވެ. އެ ފަހަރު ކައުންސިލްގެ ގޮނޑި ނަސީރު ކާމިޔާބުކުރެއްވީ އެންމެ ވޯޓެއްގެ ތަފާތަކުންނެވެ.
ނަސީރު އެމްޑީޕީއަށް އަށް ސޮއި ކުރެއްވީ ހުކުރު ދުވަހުގެރޭ ދުވާފަރުގައި ބޭއްވި ޖަލްސާގައެވެ. އޭނާއާއެކު، އޭނާގެ އަނބިކަނބަލުން ވެސް އެމްޑީޕީއާ ގުޅިގެންގެންނެވި އެވެ. ނަސީރު އަކީ ކުރިން ޑީއާރުފީގައި އަދި ފަހުން ޕީޕީއެމްގައި ވެސް އިސްކޮށް މަސައްކަތްކުރެއްވި ބޭފުޅެކެވެ.
ސޮއިކުރެއްވުމަށްފަހު ވާހަކަދައްކަވަމުން ނަސީރު ވިދާޅުވީ ކައުންސިލްގެ މަސައްކަތްތަކަށް ޕީޕީއެމް އިން ހުރަސް އެޅިކަމަށެވެ. އޭނާ ވިދާޅުވީ ރައީސް ޔާމިން ދެކެ ބިރު ނުގަންނަ ކަމަށާއި އަނބިދަރިން "ކުދިކޮށް، ޗިސް، ޗިސް ކޮށްލިޔަސް" އެކަމަށް ބިރެއް ނެތް ކަމަށެވެ.
އޭނާ ވިދާޅުވީ ރައީސް ޔާމިން ދުވާފަރަށް ވީ ވައުދުތައް ނުފުއްދަވާ ކަމަށެވެ. އެގޮތުން ރަށުގެ މަގުތަކުތަކުގައި ތާރުއަޅާދޭނެ ކަމަށް ވީ ވައުދުތައް ނުފުއްދަވާ ކަމަށް އޭނާ ވިދާޅުވި އެވެ. އަދި އެހެންމެ ރައްޔިތުންގެ ރަޖިސްޓްރީ ދުވާފަރަށް ބަދަލު ކުރުމަށް ކުރި މަސައްކަތައް ސަރުކާރުން އިޖާބަ ނުދިން ކަމަށްވެސް އޭނާ ވިދާޅުވި އެވެ.
އޭނާ ވަނީ މި ރިޔާސީ އިންތިހާބު ކާމިޔާބު ކުރުމަށް ގަދައަޅާ މަސައްކަތް ކުރުމަށް ގޮވާލާފަ އެވެ.
