ޖަލަށް ލާފައި ހުންނެވި ކުރީގެ ރައީސް މައުމޫން އަބްދުލް ގައްޔޫމްގެ ހާލުކޮޅު ސީރިއަސް ވެފައިވާއިރު، އެމަނިކުފާނު އާއިލާއަށް ނުހަނު ބޭނުންފުޅުވެ ވަޑައިގަންނަވާ ކަމަށާއި އެހެންވެ އެމަނިކުފާނު ގެއަށް ބަދަލުކޮށްދެއްވުމަށްމ، ގުޅިފައިވާ ސިޔާސީ ޕާޓީތަކުގެ ކެންޑިޑޭޓް އިބްރާހީމް މުހައްމަދު ސޯލިހުގެ ތަރުޖަމާނު މާރިޔާ އަހުމަދު ދީދީ ގޮވާލައްވައިފިއެވެ.
މާރިޔާ ބުދަ ދުވަހު ކުރެއްވި ޓްވީޓެއްގައި ވިދާޅުވީ ރައީސް ޔާމީން، އެ މަނިކުފާނުގެ އެއްބަފާ ބޭބޭފުޅު ރައީސް މައުމޫނާމެދު އަނިޔާވެރިވަމުންދާކަމަށެވެ. އެހެން ނަމަވެސް ރައީސް މައުމޫނަކީ، ރައީސް ޔާމީން ވެރިކަމަށް ގެންނެވުމަށް މަސައްކަތް ކުރި ބޭފުޅާކަމަށާއި ރައީސް ޔާމީނަށް ވެރިކަމަށް ވަޑައިގެންނެވުނު ސަބަބަކީވެސް ބޭބޭފުޅު ކަމަށް މާރިޔާ ވިދާޅުވިއެވެ.
މައުމޫނުގެ ހާލުކޮޅު އިތުރަށް ގޯސްވެ އެމަނިކުފާނަށް ފަރުވާ ދިނުމަށް މާލެއިން މާފުށީ ޖަލަށް ޑޮކްޓަރުން ގެންގޮސް އީދު ދުވަހު ވަނީ ފަރުވާ ދެއްވައިފަ އެވެ.
މާރިޔާ ވިދާޅުވީ ރައީސް މައުމޫނު އާލާސްކަންފުޅާ އުޅުއްވާތީ އެމަނިކުފާނުގެ އާއިލާއަށް ނުހަނު ބޭނުންފުޅުވެ ވަޑައިގެން ހުންނެވިކަމަށާއި ކުޑަމިނުން އެމަނިކުފާނު ގޭބަންދަށް ބަދަލުކޮށްދެއްވުމަށް ރައީސް ޔާމީންގެ ކިބައިން އެދިވަޑައިގަންނަވާކަމަށެވެ.
#DearPrezYameen you are being cruel to your elder brother @maumoonagayoom He appointed you to his cabinet & was the single most factor that helped you become Prez. He is elderly, unwell & needs his family with him now. Ps have the decency to at least transfer him home.
— Mariya Didi (@MariyaDidi) August 22, 2018
ރައީސް މައުމޫން ޖަލަށް ލާފައިވަނީ މިސަރުކާރުން ފެބްރުއަރީ ފަސް ވަނަ ދުވަހު ކުއްލި ނުރައްކަލުގެ ހާލަތު އިއުލާނުކޮށް އެމަނިކުފާނު ހައްޔަރު ކުރުމަށްފަހު، އަދުލު އިންސާފަށް ހުރަސްއެޅި ކަމަށް ބުނެ، އެމަނިކުފާނުގެ މައްޗަށް ދައުލަތުން އުފުލި ދައުވާ ސާބިތުވާ ކަމަށް ކަނޑައެޅުމަށް ފަހު އެވެ. އެމަނިކުފާނަށް ވަނީ އެއް އަހަރާއި ހަތް މަހުގެ ޖަލު ހުކުމެއް އިއްވައިފަ އެވެ.
