ހޯސޭ މޮރީނިއޯ ވަކިކޮށް ކޯޗުގެ މަގާމަށް ޒަައިނުއްދީން ޒިދާން ގެނައުމުގެ ހިޔާލެއް މެންޗެސްޓާ ޔުނައިޓެޑުން ނުގެންގުޅޭ ކަމަށް އެކްލަބްގެ ބޯޑުން ބުނެފިއެވެ.

ޕްރިމިއާ ލީގުގައި އެންމެފަހުން ކުޅުނު މެޗުން ބްރައިޓަން އަތުން 3-2 ގެ ނަތީޖާތަކުން ޔުނައިޓެޑް ބަލިވުމާއެކު މޮރިނީއޯއަށް ވަރަށް ބޮޑު ފާޑުކިޔުންތަކެއް އަމާޒުވިއެވެ. ޕްރިމިއާ ލީގުގެ ޓީމަކުން ކޯޗަކު މަގާމުން ވަކިކުރާނަމަ އެއީ މޮރީނިއޯ ކަމަށް ބެލެވޭ ކަމަަށް މީޑިއާ ރިޕޯޓްތައް ބުނާއިރު އޭނާގެ ބަދަލުގައި ރެއާލް މެޑްރިޑްގެ ކުރީގެ ކޯޗު ޒައިނުއްދީން ޒިދާން އެ މަގާމަށް ގެންނަން އުޅޭ ކަމުގެ އަޑުތަކެއް ވެސް މިދުވަސްކޮޅު ވަނީ ފެތުރިފައެވެ. 

ނަމަވެސް އެ ކްލަބްގެ ބޯޑާއި ގާތް މީހަކު ބީބީސީއަށް ބުނެފައި ވަނީ މޮރީނިއޯ މަގާމުގައި ދެމި ހުންނާނެ ކަމުގެ ޔަގީންކަން އޮތުމާއެކު ޒިދާންގެ ނަން އެއްވެސް މަޝްވަރާއެއްގައި އައިސްފައި ނުވާ ކަމަށެވެ. 

މި ޓްރާންސްފާ މާކެޓުގައި ޔުނައިޓެޑުން ކުޅުންތެރިން ގެނައުމަށް ކުރި މަސައްކަތްތަކާ ގުޅިގެން މޮރީނިއޯ ހިތްހަމަނުޖެހުން ފާޅުކޮށްފައިވާ ކަމަށް ރިޕޯޓްތައް ބުނެއެވެ. އެގޮތުން އެޓީމުން ގެނެސްފައި ވަނީ ބްރެޒިލްގެ މިޑްފީލްޑަރު ފްރެޑްގެ އިތުރުން ޒުވާން ޑިފެންޑަރު ޑިއޭގޯ ޑަލޯއެވެ. މޮރީނިއޯ ވަނީ އިތުރު ޑިފެންޑަރަކާއި ފޯވާޑެއް ބޭނުންވާ ކަމަށް ބުނެފައެވެ. 

މޮރީނިއޯ ޔުނައިޓެޑާއެކު ހަދާފައިވާ އެއްބަސްވުން ހަމަވާނީ 2020 ވަނަ އަހަރުއެވެ.