ފިޔައިތޮށި ކުލައަކީ ޕީޕީއެމްއަށް ޚާއްސަ ކުލައެއް ކަމަށާއި އިދިކޮޅު އެއްވެސް ޕާޓީއެއްގެ ހަރަކާތުގައި އެ ކުލަ ބޭނުން ނުކުރުމަށް އެ ޕާޓީން އަންގައިފިއެވެ.
ޕީޕީއެމް އޮފީހުން ހޯމަ ދުވަހުގެ ރޭ ނެރުނު ބަޔާނުގައި ބުނެފައިވާ ގޮތުގައި ގުޅިފައިވާ ޕާޓީތަކުގެ ކެންޑިޑޭޓް އިބްރާހިމް މުހައްމަދު ސޯލިހްގެ ކެމްޕެއިން ޕޯސްޓަރުތަކުގައި ފިޔައިތޮށި ކުލަ ހިމެނޭ ކަމަށާއި އެކަން ވަގުތުން ވަގުތަށް ހުއްޓާލުމަށް އެދޭކަމަށެވެ.
"އެނގިވަޑައިގަންނަވާނޭ ފަދައިން، މެޖެންޓާ ނުވަތަ ފިޔާތޮށި ކުލައަކީ މިޕާޓީގެ މައްޗަށް ރަޖިސްޓަރީ ކުރެވިފައިވާ އަދި މިޕާޓީއަށް ނިސްބަތްވާ ކުލަ. އަދި މިޕާޓީގެ މައްޗަށް މިކުލަ ރަޖިސްޓަރީވުމުގެ ނަތީޖާއެއްގެ ގޮތުން، ސިޔާސީ މައިދާނުގައި މިކުލަ ބޭނުންކުރެވޭނީ މިޕާޓީއަށް،" ޕީޕީއެމްގެ ދެންނެވުމުގައި ވެއެވެ.
ޕީޕީއެމްގެ ކުލަ ރިޔާސީ އެހެން ކެންޑިޑޭޓެއްގެ ކެމްޕޭނުގައި ބޭނުންކުރުމަކީ ގާނޫނީގޮތުން އެފަރާތްތަކަށް ލިބިފައިވާ ހައްގެއް ނޫން އެ ޕާޓީން ބުނެ އެވެ އެ ކުލަ ބޭނުން ކުރުމުގެ ސަބަބުން އެ ޕާޓީގެ ރިޔާސީ ކެންޑިޑޭޓް، ރައީސް ޔާމީންގެ އިންތިޚާބީ ހައްގުތަކަށް އުނިކަން އަންނަ ކަމަށް ވެސް ބަޔާނުގައިވެ އެވެ.
"ވީމާ، މިޕާޓީގެ ރިޔާސީ ކެންޑިޑޭޓް ފިޔަވައި، އެހެން ކެމްޕޭންތަކުގެ، ކެމްޕޭނުގެ ޕޯސްޓަރުތަކުގަޔާއި، ޖަލްސާތަކުގައި އަދި ކެމްޕޭނުގެ އެހެނިހެން ހަރަކާތްތަކުގައި މި ޕާޓީއަށް ރަޖިސްޓަރީ ކޮށްދީފައިވާ ކުލަ ބޭނުން ކުރުން ހުއްޓާލުމަށް ދަންނަވަމެވެ" ޕީޕީއެމްގެ ބަޔާނުގައި ބުނެފައިވެއެވެ.
ޕީޕީއެމްގެ މައްޗަށް ރަޖިސްޓްރީ ކޮށްފައިވާ ފިޔާތޮށި ކުލައިގެ ޝޭޑްއަކީ މެޖެންޓާ ޕިންކް ނުވަތަ އަސުރުމާ ކުލަ އެވެ. އެ ޕާޓީގެ އަސާސީ ގަވާއިދުގައި ވެސް ޕާޓީގެ ކުލައިގެ ގޮތުގައި ބުނެފައިވަނީ އަސުރުމާ ކުލަ ވާހަކަ އެވެ.
ޕީޕީއެމްއިން ކަންބޮޑުވުން ފާޅުކޮށްފައި މިވަނީ ޕީޕީއެމްގެ ބާނީ ކުރީގެ ރައީސް މައުމޫން އަބްދުލް ގައްޔޫމް، ރައީސް ޔާމީނަށް ކުރައްވަމުން ގެންދެވި ތާއިދު އަނބުރައި ގެންދަވައި ކުރިއަށް އޮތް އިންތިހާބުގައި ގުޅިފައިވާ ޕާޓީތަކުގެ ކެންޑިޑޭޓަށް ތާއިދުކުރައްވަމުން ގެންދަވަނިކޮށެވެ.
މައުމޫން ރިފޯމް މޫވްމެންޓް (އެމްއާރުއެމް) ގެ ނަމުގައި ސިޔާސީ ހަރަކާތް ހިންގަވަމުން ގެންދަވާއިރު، އެ މޫވްމެންޓްގެ ކުލަ އަކީ ފިޔައިތޮށިކުލަ އެވެ.
