ހުޅުލެއާއި މާލެއާއި ދެމެދު އަޅާފައިވާ ސިނަމާލެ ބްރިޖާއި ގުޅިފައިވާ މާލޭގެ މަގުތަކުގައި ތާރު އަޅަން ފަށައިފި އެވެ.
ހައުސިން މިނިސްޓްރު ޑރ މުހައްމަދު މުއިއްޒު ކުރެއްވި ޓްވީޓެއްގައި ވިދާޅުވީ ބުރިޖް ނިންމެންވާއިރަށް ބޮޑުތަކުރުފާނުމަގު ތާރުއަޅަން ނިންމާފައިވާ ބައި ތާރުއެޅުމުގެ މަސައްކަތް ބުރާސްފަތި ދުވަހު ފަށާފައިވާ ކަމަށެވެ. އަދި މިމަސައްކަތް ކުރިއަށް ގެންދިއުމަށް އާންމުންގެ ފަރާތުން ލިބޭ އެއްބާރުލުމަށް މިނިސްޓަރު ވަނީ ޝުކުރު އަދާކުރައްވާފައެވެ.
ހުޅުމާލެ ޓާމިނަލުން ފެށިގެން މެރީބްރައުންއާ ހަމައަށް ތާރުއަޅަން ނިންމާފައިވާއިރު މިހާރު ތާރުއަޅަނީ ހުޅުމާލެ ފެރީ ޓާމިނަލް ކައިރިން ފެށިގެން ގާދޫ ބިލްޑިންނާ ހަމައަށެވެ. އަދި ތާރުއެޅުމުގެ މަސައްކަތް ބާރު ސްޕީޑްކުރިއަށްދާނެ ކަމަށާއި، ބުރިޖް ހުޅުވެންވާއިރަށް މިމަސައްކަތް ނިންމޭނެ ކަމަށް ހައުސިން މިނިސްޓްރީން މައުލޫމާތުދެއެވެ.
މަގު ހެދުމުގެ މަޝްރޫއުގެ ދަށުން މާލޭގެ އިރުމަތީ ފަރާތާއި ދެކުނު ފަރާތުން ބޮޑުތަކުރުފާނުގެ މަގުގައި ހަތަރު ލޭން ހިމެނޭ ގޮތަށް 16 މީޓަރަށް ފުޅާކުރަން ވެސް ވަނީ ނިންމައިފައެވެ. ބްރިޖަށް ދަތުރުކުރާ މައި މަގުތައް ފުޅާ ކުރާ އިރު މަގުގެ ކޮންމެ ފަރާތެއްގައި ދެ މީޓަރުގެ ޕޭވްމަންޓެއް އޮންނާނެ އެވެ.
މި މަގު ތަރައްގީ ކުރުމުގެ މަސައްކަތާ އެކު އާޓިފިޝަލް ބީޗުގެ ސްޓޭޖް ނަގާ އެސަރަހައްދުގެ ހުރިހާ ގަހެއް ވެސް ވަނީ ކަނޑާލާފައެވެ. އެކަމަކު މިމަގުގެ ހެދުމުގެ މަޝްރޫއު ނިމުމުން ގަސް އިންދާނެ ކަމަށް ހައުސިން މިނިސްޓްރީން ވަނީ ބުނެފައެވެ.
