މޮޑްރިޗްގެ އަގަކީ 750 މިލިއަން ޔޫރޯ
އޭނާ ރެއާލް އާއެކު ހަދާފައިވާ އެއްބަސްވުން ހަމާވާނީ 2020 ވަނަ އަހަރު
ރެއާލް މެޑްރިޑްގެ މިޑްފީލްޑަރު ލޫކާ މޮޑްރިޗް
ރެއާލް މެޑްރިޑަށް ކުޅެމުން އަންނަ ކްރޮއޭޝިއާގެ މިޑްފީލްޑަރު ލޫކާ މޮޑްރިޗްގެ އަގަކީ 750 މިލިއަން ޔޫރޯ ކަމަށް ރެއާލް މެޑްރިޑްގެ ރައީސް ފްލޮރެންޓީނޯ ޕެރޭޒް ވިދާޅުވެއްޖެއެވެ.
މިއަހަރުގެ ވާރލްޑް ކަޕްގެ ފައިނަލުން ކްރޮއޭޝިއާ ޖާގަ ހޯދިއިރު މުބާރާތުގެ އެންމެ މޮޅު ކުޅުންތެރިޔަކަށް ހޮވުނީ މޮޑްރިޗްއެވެ. މިކަމާއި ގުޅިގެން އޭނާ ހޯދުމަށް ޔޫރަޕުގެ އެންމެ ބޮޑު ޓީމުތަކުން ދަނީ މަސައްކަތްކުރަމުންނެވެ. މޮޑްރިޗް ވެސް އެހެން ކްލަބަކަށް ބަދަލުވާން ބޭނުންވާ ކަމުގެ އަޑުތަކެއް ފެތުރިފައިވާއިރު އޭނާ ހޯދުމަށް އެންމެ ބޮޑަށް މަސައްކަތްކުރަމުން ދަނީ އިޓަލީގެ އިންޓަރ މިލާނުންނެވެ.
އެެހެން ނަމަވެސް ރެއާލްގެ ރައީސް ފްލޮރެންޓީނޯ ޕެރޭޒް ވަނީ މޮޑްރިޗް ވިއްކާލާނީ އޭނާގެ ރިލީޒް ފީ ދެއްކުމަށް އޭނާ ގަންނަން ބޭނުންވާ ކްލަބްއިން ހުށަހެޅުމުން ކަމަށް ވިދާޅުވެފައެވެ. ރެއާލްއިން މޮޑްރިޗްގެ ރިލީޒް ފީއެއްގެ ގޮތުގައި ކަނޑައަޅާފައިވަނީ 750 މިލިއަން ޔޫރޯއެވެ.
އޭނާ ރެއާލް އާއެކު ހަދާފައިވާ އެއްބަސްވުން ހަމާވާނީ 2020 ވަނަ އަހަރުއެވެ. މޮޑްރިޗް މިވަގުތު ހުރީ ވާރލްޑް ކަޕަށްފަހު އޭނާގެ ޗުއްޓީގައެވެ.
ޕެރޭޒް މިހެން ވިދާޅުވުމާއެކު އިންޓަރއިން މޮޑްރިޗް ހޯދުމަށް ކުރަމުންދާ މަސައްކަތްތައް ނިމުމަކަށް އަންނާނެ ކަމަށް ބެލެވެއެވެ. އޭނާގެ އިތުރުން އިންޓަރއިން އަންނަނީ ބަޔާން މިއުނިކްގެ މިޑްފީލްޑަރު އަރުތޫރޯ ވިޑާލް ހޯދުމަށް ވެސް މަސަައްކަތްކުރަމުންނެވެ.
