ހޯމަ 17 ޖޫން 2019
01 އަދަ
1440 ޝައްވާލް 13
ފަތިސް 04:36
އިރުއަރާ 05:54
މެންދުރު 12:11
އަސްރު 15:35
މަޣްރިބް 18:20
އިޝާ 19:38
ދުނިޔެ - ލޮމްބޮކްއަށް އައި ބިންހެލުން

ލޮމްބޮކްއަށް އައި ބިންހެލުން: ފަރުބަދަމަތީގައި ތާށިވި މީހުން ސަލާމަތްކޮށްފި

  • މި ބިންހެލުމުގައި 14 މީހުން މަރުވި
  • ބިންހެލުން އައީ 6.4 މެގްނިޓިއުޑްގައި

އަބުދުﷲ މުހައްމަދު
8Abbo

ކ. މާލެ 1 އޯގަސްޓު 2018 | ބުދަ 07:47 1,644

މައުންޓް ރިންޖާނީގައި 500 އަށް ވުރެ ގިނަ ޓޫރިސްޓުން ތާށިވި ކަމަަށް އޮފިޝަލުން ބުނޭ - ހިންދުސްތާނީ ޓައިމްސް

އިންޑޮނީޝިއާގެ މެދުތެރޭގެ ރަށެއް ކަމަށްވާ ލޮމްބޮކަށް 6.4 މެގްނިޓިއުޑްގައި އާދީއްތަ ދުވަހު އައި ބިންހެލުމަށް ފަހު، ފަރުބަދަ މަތީގައި ތާށިވެ ނުފޭބިފައި ތިބި 500 އަށް ވުރެ ގިނަ މީހުން ސަލާމަތްކޮށްފިއެވެ.

މައުންޓް ރިންޖާނީގައި ތާށިވެފައި ތިބި މީހުން ސަލާމަތް ކުރުމަށް, މީހުން ސަލާމަތް ކުރުމުގައި މަސައްކަތްކުރާ އެތައް ސަތޭކަ މީހުން މަސައްކަތްކޮށްފައި ވެއެވެ.

ކަމާ ބެހޭ އިދާރާތަކުން ބުނާ ގޮތުގައި 500 އަށް ވުރެ ގިނަ ޓޫރިސްޓުން ފަރުބަދަ މަތިން ބާލާފައިވެއެވެ. އޭގެ ތެރޭގައި ގިނައީ ބޭރު ގައުމުތަކުގެ ޓޫރިސްޓުންނެވެ.

މަރުވި މީހުންގެ ތެރޭގައި ފަރުބަދައަށް އެރި މެލޭޝިއާގެ ޓޫރިސްޓަކު ހިމެނެއެވެ. އޭގެ އިތުރުން ވެއްޓުނު ހިލަތަކުން ޖެހި އިންޑޮނީޝިއާގެ ޒުވާނަކު ވަނީ މަރުވެފައެވެ.

މައުންޓް ރިންޖާނީގައި ތާށިވެފައި ތިބި ޓޫރިސްޓުންގެ ތެރޭގައި ފްރާންސާއި، ތައިލެންޑާއި، ނެދަލޭންޑާއި، މެލޭޝިއާގެ ޓޫރިސްޓުން ހިމެނެއެވެ.

ފަތުރުވެރިންގެ މެދުގައި މަގުބޫލު ލޮމްބޮކްގައި ހުންނަ މައުންޓް ރިންޖާނީއަކީ ވެސް ފަރުބަދައަށް އަރާ އުޅޭ ފަރާތްތަކުގެ މެދުގައި މަގުބޫލު ތަނެކެވެ.

އާދީއްތަ ދުވަހު އައި ބިންހެލުން އައިސްފައި ވަނީ ފަރުބަދައިގެ ބުޑުންނެވެ. އެ ބިންހެލުމުގައި މަދުވެގެން 14 މީހުން މަރުވެ 160 އަށް ވުރެ ގިނަ މީހުން ޒަޚަމްވިއެވެ.

އެތައް ހާސް ގެއެއް ހަލާކުވި އިރު އެތައް ސަތޭކަ ބަޔަކު ގެދޮރު ގެއްލުނެވެ. ބިންހެލުމަށް ފަހު އައި ގުޑުންތަކުގެ އަސަރު ލޮމްބޮކްގެ އިތުރުން އަވަށްޓެރި ބާލީ އަށް ވެސް ކޮށްފައި ވެއެވެ.

ދުނިޔޭގެ އެކި ކަންކޮޅުތަކުގެ ޓޫރިސްޓުން ޝައުގެވެރިވާ ލޮމްބޮކް އޮންނަނީ ޓޫރިސްޓް މަންޒިލެއް ކަމަށްވާ ބާލީގެ އިރުން 40 ވަރަކަށް ކިލޯމީޓަރު ދުރުގައެވެ.

އެންމެ ފަހުން އަޕްޑޭޓް ކުރީ: 4 ހަފްތާކުރިން | ރިވިއު ކުރީ: އަލީ ޔޫސުފް

މި ލިޔުން ކިޔާލުމުން

ޚަބަރެއް ނުވަތަ މައުލޫމާތެއް ރާއްޖެއެމްވީ އަށް ދެއްވުމަށް [email protected] އަށް އީމެއިލް ކުރައްވާ ނުވަތަ 9110099 ނަންބަރަށް ގުޅުއްވާ.

ކޮމެންޓް