ޕީއެސްއެމްގެ އައު ބޯޑަށް މެމްބަރުން އައްޔަނުކޮށްފި
25 ޖުލައި 2018 | ބުދަ 16:34އައު ބޯޑުގައި ހިމެނެނީ ފަސް މެމްބަރުން
ޕީއެސްއެމްގެ އެމްޑީ ހަލީލް އަދި ޑީއެމްޑީ އިކްރާމް
ޕަބްލިކް ސަރވިސް މީޑިއާ (ޕީއެސްއެމް) ގެ ބޯޑަށް މެމްބަރުން އައްޔަންކުރުމުގައި ރައްޔިތުންގެ މަޖިލީހުގެ ރުހުން ހޯދަން ނުޖެހޭ ގޮތަށް މަޖިލީހުން ބުދަ ދުވަހު ފާސްކުރުމާ އެކު ރައީސުލްޖުމްހޫރިއްޔާ އެ ކުންފުނީގެ އައު ބޯޑު އެކުލަވާލައްވައިފިއެވެ.
ޕްރައިވަޓައިޒޭޝަން އަދި ކޯޕަރައިޓޭޒޭޝަން ބޯޑުގެ ރައީސް މުހައްމަދު ނިޒާރު ވަނީ ޓްވީޓެއް މެދުވެރިކުރައްވައި ޕީއެސްމެގެ އައު ބޯޑު އިއުލާންކުރައްވާފައެވެ. ފަސް މެމްބަރުންގެ މައްޗަށް އެކުލެވޭ ބޯޑުގައި ޕީއެސްއެމްގެ މިހާރުގެ މެނޭޖިން ޑިރެކްޓަރު އިބްރާހިމް ހަލީލް އަދި ޑެޕިއުޓީ މެނޭޖިން ޑިރެކްޓަރު މުހައްމަދު އިކްރާމް އަބްދުއް ލަތީފް ހިމެނެއެވެ.
އެ ދެ ބޭފުޅުންގެ އިތުރުން ބޯޑަށް ޗެއާޕަރސަންގެ ގޮތުގައި މ. ހުކުރަދިގެ މަރިޔަމް އަޒްރާ އަހްމަދާއި ޑިރެކްޓަރުންގެ ގޮތުގައި ގ. ތަލްވާރުގެ އިބްރާހިމް ރަޝީދު އާއި ނ. ވެލިދޫ އާހިޔާ، އާއިޝަތު ހަފީޒް ވަނީ އައްޔަނުކޮށްފައެވެ.
މީގެ ކުރިން ޕީއެސްމްގެ ބޯޑުގެ ޗެއާމަންގެ މަގާމު ފުރުއްވި އިބްރާހިމް އުމަރު މަނިކަށް މިފަހަރުގެ ބޯޑުން ފުރުސަތު ދީފައެއް ނުވެއެވެ. ހަމައެހެންމެ އޭނާގެ އިތުރުން ބޯޑުގައި ކުރިން ހިމެނުނު ހއ. އިހަވަންދޫ ނޫފަރު މަހްމޫދު އަލީ އާއި، މ. ޕެޓީވިލާ އާމިނަތު ޝާޔަން ޝާހިދާއި، ތ. ވިލުފުށީ ހުސްނުހީނާގެ އިބްރާހިމް ހިލްމީގެ އިތުރުން މއ. ޕެންޒީ މުހައްމަދު ޝާގިލް ވެސް މިފަހަރުގެ ބޯޑުގައި ނުހިމެނެއެވެ.
އަލަށް ފާސްކުރެވުނު ގާނޫނުގައި ވާ ގޮތުން ޕީއެސްއެމްގެ ބޯޑަށް މިހާރު މެމްބަރުން އައްޔަންކުރާނީ ރައީސުލްޖުމްހޫރިއްޔާގެ އިރުޝާދުގެ މަތިންނެވެ. މި ފަސް ބޭފުޅުންގެ ދައުރުގެ މުއްދަތަކީ ހަތަރު އަހަރު ދުވަހެވެ.
