ބުދުތައް ބެހެއްޓުމުން ދީނީ އިލްމުވެރިންގެ ނުރުހުން
25 ޖުލައި 2018 | ބުދަ 08:39އިސްލާމްދީނަށާއި ރައްޔިތުންނަށް ވެވޭ ވަރަށްބޮޑު ޚިޔާނާތެއް
ދީނީ އިލްމުވެރިޔާ އިލްޔާސް ހުސައިން
ފެއާމޮންޓް ސިއްރު ފެންފުށި ރިސޯޓުގެ މޫދު އަޑީގައި ބުދުތަކެއް ބެހެއްޓުމުން ދީނީ އިލްމުވެރިން ނުރުހުން ފާޅުކުރައްވައިފިއެވެ.
މަޝްހޫރު ދީނީ އިލްމުވެރިޔާ ޝެއިޚް އިލްޔާސް ހުސައިން ކުރައްވާފައިވާ ޓްވީޓެއްގައި ވިދާޅުވީ މިހާ ފާޅުކަން ބޮޑު ގޮތެއްގައި ތަރައްގީގެ ނަމުގައި މިފަދަ ބޮޑެތި މުންކަރާތްތައް ހިންގުމަކީ ރައްޔިތުންނަށް އޮޅުވާލުމުގެ އިތުރުން އިސްލާމްދީނަށާއި ރައްޔިތުންނަށް ވެވޭ ވަރަށްބޮޑު ޚިޔާނާތެއްކަމަށެވެ. އެހެން ކަމުން ވަގުތުން މިކަންތައް ހުއްޓާލާ ﷲ އަށް ބިރުވެތި ވުމަށް އޭނާ ގޮވާލެއްވި އެވެ.
ދީނީ އިލްމުވެރިޔާ އަލީ ޒައިދު ވިދާޅުވީ ރިސޯޓުތަކުގައިވިޔަސް އަދި ދައުލަތުގެ އެހެން ތަނެއްގައި ވިޔަސް ކުރާ ނުބައި އަމަލުތަކާއި މުންކަރާތްތައް ހުއްޓުވުމުގެ ފުރިހަމަ ބާރު ދީނުގައި ދެއްވާފަ އޮތީ ކަމާބެހޭ ވެރިންނަށްކަމަށެވެ. ރާއްޖޭގެ އެއްވެސް ތަނެއްގައި ބުދު ބެހެއްޓިޔަ ނުދީ އެކަމަށް ފިޔަވަޅުއެޅުމަށް ސަރުކާރަށް އިލްތިމާސް ކުރައްވާކަމަށް ޒައިދުގެ ޓްވީޓުގައި ވިދާޅުވިއެވެ.
ދީނީ އިލްމުވެރިންގެ އިތުރުން އާންމުންވެސް ދަނީ ރިސޯޓުގައި ބުދު ބެހެއްޓުމާއި ގުޅިގެން ނުރުހުން ފާޅުކުރަމުންނެވެ. ސާކް ސަމިޓާ ދިމާކޮށް އެމްޑީޕީ ސަރުކާރުން އައްޑޫގައި ބެހެއްޓި މޮނިއުމެންޓްތަކާ ދެކޮޅަށް އަޑުއުފުލި ޝެއިޚުން މިއަދު ކޮބައިތޯ ދަނީ ސުވާލުކުރަމުންނެވެ.
ފެންފުށި ރިސޯޓުގައި ދަ ކޮރަލޭރިއަމްގެ ނަމުގައި އިންސާނުންނާ ވައްތަރު ގޮތަށް ހަދާފައިވާ ބުދުތައް މޫދުގައި ބަހައްޓާފައި ހުންނަނީ ދަގަނޑުން ހަދާފައިވާ ފްރޭމެއްގެ ތެރޭގައެވެ. އިނގިރޭސިވިލާތަށް ނިސްބަތްވާ މަޝްހޫރު ނެޗުރަލިސްޓް އަދި އާޓިސްޓެއް ކަމަށްވާ ޖޭސަން ޑިކެއާސް އުފެއްދި މިގެލަރީ ހުންނަނީ ސިއްރު ފެންފުށީގެ ފަޅުތެރޭގައި ކަމަށް ވާއިރު މޫދުގެ ދިރުންތަކާއި އިންސާނުންނާ އޮތް ގުޅުން މިތަނުގައި ދައްކުވައިދީފައި ވަނީ އިންސާނުންނާ ވައްތަރު ގޮތަށް ހަދާފައި ހުރި ބުދުތަކާއި އަދި ހަރުކޮށްފައިވާ މުރަކަތަކުންނެވެ.
