މަޝްހޫރު ދީނީ އިލްމްވެރިޔާ ޑރ. ބިލާލު ފިލިޕްސް މާދަމާ ރާއްޖެ ވަޑައިގަންނަވަނީ

މަޝްހޫރު ދީނީ އިލްމްވެރިޔާ ޑރ. ބިލާލް ފިލިޕްސް ބުދަ ދުވަހު ރާއްޖެ ވަޑައިގަންނަވާނެ ކަމަށް ޕީސް ފައުންޑޭޝަނުން ބުނެފި އެވެ.

ރާއްޖޭގެ މަދަނީ ޖަމްއިއްޔާއެއް ކަމަށްވާ ޕީސް ފައުންޑޭޝަންގެ ޖެނެރަލް ސެކެރެޓަރީ މުހައްމަދު ސޮބާހު "ރާއްޖެއެމްވީ"އަށް ވިދާޅުވީ ބުދަ ދުވަހު ޑރ. ބިލާލު ފިލިސް ރާއްޖެ ވަޑައިގަންނަވާނެ ކަމަށާއި އެމަނިކުފާނުގެ މި ދަތުރުގައި މާލެ ސިޓީގެ އިތުރުން ފުވައްމުލަކު ސިޓީ ހަރަކާތްތަކެއް ހިންގުމަށް ރާވާފައިވާ ކަމަށެވެ.

އެގޮތުން މިމަހުގެ 13 ވާ ބުރާސްފަތި ދުވަހުގެ ރޭ އިސްލާމީ މަރުކަޒުގެ ޖުމްހޫރީ މައިދާނުގެ ކުރިމަތީގައި އޮންނަ މައިޒާނުގައި އާއްމުންނަށް ހުޅުވާލައިގެން ދީނީ ނަސޭހަތް ދިނުން އޮންނާނެއެވެ. މި "ޕަބްލިކް ޓޯކް"ގެ މައުލޫއަކީ "ޓްރޫލީ ސަކްސަސްފުލް ޕީޕަލް" އެވެ.

މީގެ އިތުރުން، މިމަހުގެ 14 ވާ ހުކުރު ދުވަހު އިސްލާމީ މަރުކަޒުގައި ހުކުރު ޚުތުބާ ވިދާޅުވާނީ ވެސް ޑރ. ބިލާލް އެވެ. ހުކުރު ހުތުބާގެ މައުލޫއަކީ "ދަ ގްލޭޑް ޓައިޑިންގްސް" އެވެ.

ސޮބާހު ވިދާޅުވީ ޑރ. ބިލާލު ފިލިޕްސް ފުވައްމުލަކަށް ވަޑައިގެންނެވުމަށް ހަމަޖެހިފައިވަނީ މިމަހުގެ 14 ވަނަ ދުވަހުގެ ރޭ ކަމަށެވެ. އަދި މިމަހުުގެ 15 ވަނަ ދުވަހުގެ ރޭ ފުވައްމުލަކުގައި އާއްމުންނަށް ހުޅުވާލައިގެން ދިނީ ދަރުސެއް ބޭއްވުމަށް ނިންމާފައިވާއިރު އެދަރުސްގެ މައުލޫއަކީ "ހޫ އިޒް ޔުއާރ ލޯޑް" އެވެ.

ސޮބާހު ވިދާޅުވީ ޑރ. ބިލާލު ފިލިޕްސްގެ މިދަތުރުފުޅުގައި މާލޭގައި ހުންނަ ބައެއް ސްކޫލްތަކުގައި ހަރަކާތްތަކާއި އިތުރު ހަރަކާތްތަކެއް ހިންގުމަށް ވެސް ނިންމާފައިވާ ކަމަށެވެ.

ޑރ. ބިލާލު ފިލިޕްސްގެ މިދަތުރަށް ފަހު އެނބުރި ވަޑައިގަތުމަށް ހަމަޖެހިފައި ވަނީ މިމަހުގެ 17 ވަނަ ދުވަހު އެވެ. މިއީ އޭނާ ރާއްޖޭއަށް ވަޑައިގަންނަވާ ހަތަރު ވަނަ ފަހަރެވެ.

އެންމެ ފުރަތަމަ ޑރ. ބިލާލު ފިލިޕްސް އާއި ރާއްޖެ ވަޑައިގަންނަވާފައި ވަނީ ކުރީގެ ރައީސް މުހައްމަދު ނަޝީދުގެ ވެރިކަމުގަ އެވެ. ޖެމައިކާގެ ކިންގްސްޓަން އަށް އުފަން، ކެނަޑާގެ ރައްޔިތެއް ކަމަށްވާ 70 އަހަރުގެ ޑރ. ބިލާލު ޕިލިޕްސްއަކީ ދުނިޔޭގެ އެކި ކަންކޮޅުތަކަށް ވަޑައިގެން އިސްލާމް ދީނާބެހޭ ގިނަ ތަގްރީރުތަކެއް ދެއްވަމުންގެންދަވާ ދީނީ އިލްމުވެރިއެވެ. ޑރ. ބިލާލް ފިލިޕްސް މީގެ ކުރިން ވެސް ރާއްޖެ ވަޑައިގެން ތަގުރީރުތައް ދެއްވާފައި ވެއެވެ.