ދީނީކަންކަން ކުރިއަރުވާ ފަންޑުގެ އެއް މިލިއަން ރުފިޔާއަށް ވީނުވީއެއް ނޭނގޭ!
22 ޖޫން 2017 | ބުރާސްފަތި 11:27ހަރަދުކުރި ފައިސާގެ ތަފްސީލް ތަކުރާރުކޮށް ދޭން އެދުމުން ދީފައެއްނުވޭ
އޮޑިޓާ ޖެނެރަލް ހަސަން ޒިޔަތް
މިނިސްޓްރީ އޮފް އިސްލާމިކް އެފެއާޒްގައި ދީނީކަންކަން ކުރިއެރުވުމަށް އެހީވާ ޓްރަސްޓް ފަންޑުން ޤަވާއިދާ ޚިލާފަށް އެއްމިލިއަން ރުފިޔާ ނަގާފައިވާ ކަމަށާއި އެފައިސާއަށް ވީނުވީއެއް ހާމަކޮށްދީފައި ނުވާކަމަށް އޮޑިޓަރ ޖެނެރަލް ވިދާޅުވެއްޖެއެވެ.
އޮޑިޓަރ ޖެނެރަލް ހަސަން ޒިޔަތު މިހެން ވިދާޅުވީ އިސްލާމިކް މިނިސްޓްރީގެ މިދިޔަ އަހަރުގެ މާލީ އޮޑިޓް ރިޕޯޓުގައެވެ.
އެރިޕޯޓުގައި ވިދާޅުވެފައިވާ ގޮތުގައި އިސްލާމިކް މިނިސްޓްރީގައި އުފައްދާފައިވާ ދީނީ ކަންކަން ކުރިއެރުވުމަށް އެހީވާ ޓްރަސްޓް ފަނޑުން މާލިއްޔަތު ޤަވާއިދާ ޚިލާފަށް އެއް މިލިއަން ރުފިޔާ ޚަރަދު ކުރުމަށް ނަގާފައިވާއިރު އެފައިސާއިން ޚަރަދު ކުރި ގޮތުގެ ތަފްސީލް ތަކުރާރުކޮށް އެދުމުންވެސް ފޯރުކޮށްދީފައި ނުވާ ކަމަށެވެ.
އަދި މަސައްކަތް ނިންމިކަން ލިޔެކިޔުމުން ޔަޤީން ކުރެވެން ނެތި ޖުމްލަ 210855 (ދެ މިލިއަން އެއް ސަތޭކަ އަށް ހާސް ފަސް ސަތޭކަ ފަންސާސް ފަހެއް) ޚަރަދު ކޮށްފައިވާކަންވެސް ފާހަގަ ކުރެވިފައިވާކަމަށް އޮޑިޓް ރިޕޯޓުގައި ވިދާޅުވެފައިވެއެވެ.
މީގެ އިތުރުން މާލިއްޔަތު ޤަވާއިދުގައި ބުނާ ގޮތައް މަސައްކަތަކުން ނިމުނު ބައެއްގެ އަގު ހޯދުމަށް ވަކިވަކި ބިލުން ހުށަހެޅުމުން މަސައްކަތް ކުރަމުންދާ ގޮތް ބެލުމާއި ހަވާލުވެފައިވާ އިންޖިނޭރަކު ނުވަތަ ކޮންސަލްޓަންޓަކު ނުވަތަ އެމަސައްކަތް ސްޕޮވައިޒް ކުރުމާ ހަވާލުވެ ހުރި ފަރާތުން އެމަސައްކަތަކީ ކޮށް ނިމިފައިވާ މަސައްކަތެއް ކަމަށް ސޮއިކުރުމުން އެބިލެއްގެ ޖުމްލަ އަގުގެ ތެރެއިން އެޑްވާންސް ފައިސާއާ ރިޓެންޝަންއަށް ނިސްބަތުން ޖެހޭ އަދަދު ކެނޑުމަށްފަހު އެބިލަކަށް ފައިސާ ދެވިދާނެ ކަމަށް ބަޔާންކޮށްފައި ވިއަސް މިދިޔަ ައަހަރު ފައިސާ ދޫކޮށްފައިވާ މަޝްރޫޢު ތަކުގެ ތެރެއިން ހަތް މަޝަރޫއަކަށް ޖުމްލަ 1513411 (އެއް މިލިއަން ފަސް ސަތޭކަ ތޭރަ ހާސް ހަތަރު ސަތޭކަ އެގާރަ ) ރުފިޔާ ކޮންޓްރެކްޓަރ ހުށަހަޅާފައިވާ ބިލްތަކުން އުނިކޮށްފައި ނުވާކަމަށްވެސް އޮޑިޓް ރިޕޯޓުގައި ފާހަގަ ކުރައްވާފައި ވެއެވެ.
