އެމްއެމްޕީއާރުސީގެ 80 މިލިއަން ޑޮލަރުގެ ޚިޔާނާތާ ގުޅޭގޮތުން ކުރީގެ ނައިބު ރައީސް އަހުމަދު އަދީބު ހާމަކޮށްދެއްވީ މުހިއްމު މައުލޫމާތުތަކެއް ކަމަށާއި އަސްލު ވަގު ހައްޔަރުކޮށް ތަހުގީގު ފެށުމަށް ގޮވާލާކަމަށް ރައްޔިތުންގެ މަޖިލީހުގެ މަޑުއްވަރީ ދާއިރާގެ މެންބަރު މުހައްމަދު އަމީތު ވިދާޅުވެއްޖެއެވެ.
އަމީތު އާދީއްތަ ދުވަހު ކުރެއްވި ޓްވީޓެއްގައި ވިދާޅުވީ "80 މިލިއަން ޑޮލަރުގެ ޚިޔާނާތާ ގުޅޭގޮތުން އަދީބު ހާމަކޮށްދެއްވީ މުހިއްމު މައުލޫމާތު ތަކެއް ކަމަށެވެ. އަސްލު ވަގު ހައްޔަރުކޮށް ތަހުގީގު ފެށުމަށް ގޮވާލާ ކަމަށެވެ.
އަމީތު އެޓްވީޓުގައި އިތުރަށް ވިދާޅުވީ އަދީބުގެ ސަލާމަތާމެދު ކަންބޮޑުވާ ކަމަށާއި މޯލްޑިވްސް ޕޮލިސް ސަރވިސްއިން ރައްކާތެރިކަމުގެ ފިޔަވަޅު އަޅުއްވައިދެއްވުމަށް އެދޭ ކަމަށެވެ.
80m dollaruge khiyaanaathaa gulhey gothun Adeeb haama kohdhevvee muhimmu mauloomaathu thakeh. Aslu #vagu hayyaru koh thahugeegu feshumah govaalan.
— Mohamed Ameeth (@MohamedAmeeth) July 22, 2018
Adeeb ge salaamathaa medu kanbodu van. @PoliceMv in rakkaatheri kamuge fiyavalhu alhuvvaa dhevvun edhen.
އަމީތު މިމޭރުމުން ވިދާޅުވެފައި މިވަނީ އެމްއެމްޕީއާރުސީގެ ހިޔާނާތުގެ 80 މިލިއަން ޑޮލަރު ގުނީ ރައީސް އަބްދުﷲ ޔާމީންގެ ގެކޮޅުގައި ކަމަށް ތުހުމަތުކުރައްވައި، ކުރީގެ ނައިބު ރައީސް އަހުމަދު އަދީބު ކްރިމިނަލް ކޯޓުގައި އާދީއްތަ ދުވަހު ވާހަކަ ދައްކަވާފައި ވަނިކޮށެވެ. ނަމަވެސް އަމީތުގެ ޓްވީޓުގައި ވަކި ބޭފުޅެއްގެ ނަމެއް ވިދާޅުވެފައެއް ނުވެއެވެ.
ރައީސް ޔާމީނާ އެންމެ ބޮޑު ގާތްކަމެއް ކުރިން އޮތް އަދީބު ވިދާޅުވީ އެމްއެމްޕީއާރުސީން ރަށްތައް ދޫކޮށްގެން ލިބުނު 80 މިލިއަން ޑޮލަރު ގެންގޮސް ރައީސް ޔާމީންގެ އޭރުގެ އަމިއްލަ ގެކޮޅު ކަމަށްވާ ގ. ދޫވެހީގައި ގުނި އިރު އެތަނުގައި ފައިސާ ގުނަން ހާއްސަ ކޮޓަރިއެއް ވެސް ހުންނަ ކަމަށެވެ.
ޓޫރިޒަމްގެ ގާނޫނާ ހިލާފަށް 10 ރަށެއް ދޫކުރި ކަމުގެ ޝަރީއަތުގައި އާދީއްތަ ދުވަހު އޭނާ ވިދާޅުވި ގޮތުގައި ގައުމު ހިންގަވަން ހަވާލުކުރުމާއެކު ރައީސް ޔާމީން ހަވާލުވެވަޑައިގަތީ "ޑޮލަރު ގުނުމު"ގެ މަސައްކަތާ އެވެ. އޭރު ދޫވެހީގައި ވަކިން ހުންނަ ކޮޓަރީގައި ފައިސާ ގުނަން ބަންގްލަދޭޝް މީހަކު ހުންނަ ކަމަށް ވެސް، 33 އަހަރުގެ ޖަލު ހުކުމެއް މިހާރު ވެސް ތަންފީޒުކުރައްވަމުން ގެންދަވާ އަދީބު ވިދާޅުވިއެވެ.
އޭނާ ވިދާޅުވީ އެމްއެމްޕީއާރުސީގެ 80 މިލިއަން ޑޮލަރުގެ ތެރެއިން އެއް މިލިއަން ޑޮލަރު ޖަމާކުރީ ރައީސް ޔާމީންގެ އެކައުންޓަކަށް ކަމަށެވެ. އެހެންކަމުން އޭނާގެ މައްޗަށް ދައުވާކުރީ އެ "ވައްކަންތައް ފޮރުވަން" ކަމަށް ވެސް އަދީބު ވިދާޅުވި އެވެ.
