ރާއްޖޭގައި ސިޔާސީ އަދި އިޖުތިމާޢީ ގޮތުން އުފެދިފައިވާ މައްސަލަތަކުން އަރައިގަތުމަށް ސިޔާސީ ފަރަތްތަކާއި، މަދަނީ ޖަމިއްޔާތަކުން ގުޅިގެން މަސައްކަތް ކުރުން މުހިއްމު ކަމަށާއި، އެގޮތުން ހުކުރު ދުވަހު އެކުލަވާލި އިދިކޮޅު ކޯލިޝަނަށް މަރުޙަބާ ދަންނަވާ ކަމަށް އަވަށްޓެރި ސްރީލަންކާގެ ކުރީގެ ރައީސާ، ޗަންދްރިކާ ކުމާރަތުންގާ ވިދާޅުވެއްޖެއެވެ.
ވެރިކަންކުރާ ޕީޕީއެމްގެ ރައީސް މައުމޫން ފެކްޝަނާއި، އިދިކޮޅު އެމްޑީޕީއާއި، ޖުމްހޫރީ ޕާޓީ، އަދި އަދާލަތު ޕާޓީ ގުޅިގެން އިސްލާހަށް މަސައްކަތް ކުރުމަށް ހުކުރުދުވަހު އެއްބަސްވުމާއި ގުޅިގެން، ޗަންދްރިކާގެ އޮފީހުން ނެރުއްވި ބަޔާނެއްގައި ވިދާޅުވީ، ޑިމޮކްރަސީ ކަށަވަރުކޮށް، މަދަނީ އަދި ސިޔާސީ ޙައްޤުތައް ރައްކާތެރިކޮށްދީ، ޤައުމުގައި ހަމަޖެހުން ޤާއިމް ކުރުމަށް އުފެއްދި އެ ކޯލިޝަނަށް މަރުޙަބާ ދަންނަވާ ކަމަށެވެ.
ރާއްޖެ އާއި ސްރީ ލަންކާ އާއި ދެމެދު ގާތް ގުޅުމެއް އޮތްކަން ފާހަގަކުރައްވާ އެކަމަނާ ވިދާޅުވީ، ރާއްޖެއާއި ލަންކާ އަކީވެސް، ސިޔާސީ އަދި އިޖުތިމާޢީ ގޮތުން ގިނަ މައްސަލަތަކަކާއި ކުރިމަތިލަމުންދާ ދެ ޤައުމުކަމަށާއި، ފަޤީރުކަމާއި، ނޭއްގާނީ ކަމާއި ދެކޮޅަށް މަސައްކަތްކޮށް، އިންސާފުވެރި، ހަމަހަމަ މުޖުތަމަޢުއެއް ޤާއިމްކޮށް، އިޚްލާސްތެރި، ހެޔޮ ވެރިކަމެއް ޤާއިމް ކުރުމަށް، ސިޔާސީ ފަރާތްތަކާއި، މަދަނީ ޖަމިއްޔާތަކުން ގުޅިގެން މަސައްކަތްކުރަން ޖެހޭ ކަމަށެވެ.
މީގެ އިތުރުން އެކަމަނާ ވިދާޅުވީ، ރައީސް ޔާމީންގެ ސަރުކާރުން، ރާއްޖޭގައި ޑިމޮކްރަސީ ހަރުދަނާކޮށް، ޑިމޮކްރެޓިކް މުއައްސަސާތައް ވަރުގަދަކޮށް، ރައްޔިތުންގެ އަސާސީ ޙައްޤުތައް ކަށަވަރު ކޮށްދިނުމަށް އެންމެ ފުރިހަމައަށް މަސައްކަތް ކުރާނެ ކަމަށް ޤަބޫލުކުރައްވާ ކަމަށެވެ.
އިދިކޮޅު ފަރާތްތަކުން އެކުލަވާލާފައިވާ ކޯލިޝަނަށް ޗަންދްރިކާ މަރުޙަބާ ވިދާޅުވިއިރު، އަވަށްޓެރި ޤައުމުތަކުގެ ސިޔާސީ އިސް ބައެއް އެހެން ފަރާތްތަކުންވެސް ވަނީ އެ މަސައްކަތަށް މަރުޙަބާ ދަންނަވާފައެވެ.
