އިބޫ އާއި އަލީ ވަހީދު ބައްދަލުކުރައްވައިފި

ގުޅިފައިވާ އިދިކޮޅު ސިޔާސީ ޕާޓީތަކުގެ ރިޔާސީ ކެންޑިޑޭޓް އިބްރާހިމް މުހައްމަދު ސޯލިހު (އިބޫ) އާއި ޖުމްހޫރީ ޕާޓީގެ ރައީސް އަލީ ވަހީދު އިނގިރޭސި ވިލާތުގައި ބައްދަލު ކުރައްވައިފިއެވެ.

އަލީ ވަހީދު މިކަން ހާމަކޮށްފައި ވަނީ ހުކުރު ދުވަހު ކުރެއްވި ޓްވީޓެއްގައެވެ. އަލީ ވަހީދު ވިދާޅުވީ އިބޫއާ ބައްދަލުވުމަކީ ލިބުނު ވަރަށް ބޮޑު އުފަލެއް ކަމަށާއި އިބޫގެ ރަނިން މޭޓް ފައިސަލް ނަސީމްއާއެކު ޖުމްހޫރީ ޕާޓީގެ ބާނީ ގާސިމް އިބްރާހިމް އާއި, ކުރީގެ ރައީސް މުހައްމަދު ނަޝީދާއި، ކުރީގެ ރައީސް މައުމޫން އަބްދުލް ޤައްޔޫމާއި، އަދާލަތު ޕާޓީގެ ރައީސް ޝެއިޚް އިމްރާމް އަބްދުﷲ، ދިވެހި ރާއްޖެ ދިވެހި ރައްޔިތުންނަށް އަނބުރާ ހޯއްދަވައިދެއްވާނެ ކަމަށެވެ.

އިނގިރޭސިވިލާތަށް ވަޑައިގެން ދަރިކަނބަލުންގެ ގްރެޖުއޭޝަންގައި ބައިވެރިވެ ވަޑައިގަތުމަށް ވަޑައިގެން އުޅުއްވާ ގުޅިފައިވާ އިދިކޮޅު ސިޔާސީ ޕާޓީތަކުގެ ރިޔާސީކެންޑިޑޭޓް އިބޫ ރާއްޖެއިން ބޭރުގައި ހުންނެވި ނަމަވެސް އިދިކޮޅު ޕާޓިތަކުގެ ކޭމްޕޭން ދަނީ ހުއްޓުމެއްނެތި ކުރިއަށް ދަމުންނެވެ.