ރިޔާސީ އިންތިހާބުގައި ވާދަ ކުރައްވާ ކެންޑިޑޭޓުންގެ ގޮތުގައި ސިޔާސީ ޕާޓީތަކުން މިހާތަނަށް އާންމު ކޮށްފައިވާ ބޭފުޅުންނަށް ހަމަހަމަ އުސޫލަކުން އަމަލު ކުރުމަށް ފުލުހުންނަށާއި ހޯމް މިނިސްޓްރީއަށާއި ހައުސިން މިނިސްޓްރީއަށް ބަންޑާރަ ނާއިބު މުހައްމަދު އަނިލް އަންގަވައި ނެރުއްވި ބަޔާން ފެންނަނީ ބައިނަލްއަގްވާމީ މުޖުތަމައަށް ވަކިން ޚާއްސަކޮށް ވިލާތުގެ އިއްތިހާދަށް އޮޅުވާލުމަށް ކުރިއާލައި ނެރެފައިވާ އެއްޗެއްގެ ގޮތުގައިކަމަށް މޯލްޑިވިއަން ޑެމޮކްރެޓިކް ޕާޓީން ބުނެފިއެވެ.
ފުލުހުންނަށާއި ހޯމް މިނިސްޓްރީ އާއި ހައުސިން މިނިސްޓްރީގެ އިތުރުން ޕީއެސްއެމަށް ވަކިވަކިން އަނިލް ބުދަ ދުވަހު ފޮނުއްވެވި ސިޓީފުޅަށް ފަހު، ބަންޑާރަ ނާއިބުގެ އޮފީހުން ނެރުނު ބަޔާނުގައި ބުނެފައި ވަނީ ކެންޑިޑޭޓުންގެ ގޮތުގައި ޕާޓީތަކުން ކަނޑައަޅާފައިވާ ބޭފުޅުންނާއި އެ ބޭފުޅުންގެ ރަނިންގމޭޓަށް ދައުލަތުގެ ހަރަދުގައި ސަލާމަތާއި ރައްކާތެރިކަމުގެ ހިދުމަތް ދިނުމަށް އެ އިދާރާތަކަށް އަންގަވާފައިވާ ކަމަށެވެ.
އާދީއްތަ ދުވަހު އެމްޑީޕީން ނެރުނު ބަޔާނެއްގައި ބުނެފައި ވަނީ އަސާސީ ހައްގުތައް ނަގާލުމާއި، ތަފާތުކުރުމާއި، އިދިކޮޅު ފަރާތްތަކުގެ ހަރަކާތްތައް ހިންގުމަށް ގާނޫނާއި ޚިލާފަށް ހުރަސްއަޅަމުން ގެންދިއުމުގެ ސަބަބުން އެ ބޭފުޅެއްގެ މައްޗަށް ފިޔަވަޅު އެޅުމަށް ނިންމާފައިވާ ބަންޑާރަ ނައިބު މުހައްމަދު އަނިލް އާއި އެ މަނިކުފާނާއި އެކުގައި މަސައްކަތްކުރައްވާ ވަޒީރުން ކުރައްވަމުން ގެންދަވާ އަދި ކުރައްވާފައިވާ ކަމަށް ޖުމްލަ އެގާރަ ކަމެއް ފާހަގަކުރައްވާފައެވެ.
އެމްޑީޕީގެ ބަޔާނުގައި ފާހަގަކޮށްފައިވާ ކަންކަމުގެ ތެރޭގައި އިދިކޮޅު ފަރާތްތަކުން އިޚްތިޔާރު ކުރާ ކެނޑިޑޭޓަކަށް އިންތިޚާބުގައި ވާދަކުރުމުގެ ފުރުސަތު ނު ދިނުމާއި އިދިކޮޅު ލީޑަރުން ހިމެނޭ ގޮތުން އިދިކޮޅު އެތައް ސަތޭކަ ބަޔަކު ހައްޔަރުކުރުން ހިމެނެއެވެ.
ފުލުހުންނާއި އަސްކަރިއްޔާއަށް ގާނޫނާ ޚިލާފަށް ސުޕްރީމް ކޯޓަށް ވަނުމަށް އަމުރުކުރި ކުރުމާއި ރައްޔިތުންގެ މަޖިލީހަށް އަސްކަރިއްޔާ ވައްދައި ގާނޫނާ ޚިލާފަށް މެމްބަރުން ނެރުން ވެސް ފާހަގަކޮށްފައި ވެއެވެ.
އެންމެނަށް ބައިވެރިވެވޭ މިނިވަން އިންސާފުވެރި އިންތިޚާބަކަށް ފުރުސަތު ދިނުމަށް ދެކޮޅު ހެއްދެވި ހެއްދެވުމުގެ ސަބަބުން ބައިނަލްއަގްވާމީ ފަރާތްތަކުން މިހާރު ދެކެމުންދާ ގޮތުގެ ސަބަބުން ރައީސް ޔާމީންގެ ސަރުކާރުން ކަންބޮޑުވާކަން އެނގޭކަމަށް ވެސް އެމްޑީޕީގެ ބަޔާނުގައި ބުނެފައިވެއެވެ.
އެ ޕާޓީން ބުނެފައި ވަނީ އެ ކަންބޮޑުވުންތަކާ އެކު ހަރުދަނާ ފިޔަވަޅުތަކެއް އަޅާނެކަމަށް އުއްމީދު ކުރާކަމަށެވެ. އޭގެ ތެރޭގައި ސިޔާސީ ކުށްވެރިން ކަމަށް ބުނާ ބޭފުޅުން ދޫކޮށްލުމާއި، މަދަނީ އަދި ސިޔާސީ ހައްގުތައް އިއާދަކުރުމާއި ލަދެއްނެތި ސިޔާސީ ކޮށްފައިވާ މުއައްސަސާތައް އިސްލާހު ކުރުން ހިމެނޭކަމަށް އެ ޕާޓީން ބުނެފައިވެއެވެ.
އެމްޑީޕީން އިނގިރޭސި ބަހުން މި ބަޔާން ނެރެފައި ވަނީ ދިވެހި ދައުލަތުގެ ވެރިންނަށް ފިޔަަވަޅު އެޅުމަށް ހޯމަ ދުވަހަށް އީޔޫއިން އެޖެންޑާކޮށްފައިވަނިކޮށެވެ.
