ކެންޑިޑޭޓުންނަށް ހަމަހަމަ ފުުރުސަތު މިސަރުކާރަކަށް ހޯދައެއް ނުދެވޭނެ: ހަސަން ލަތީފު
12 ޖުލައި 2018 | ބުރާސްފަތި 04:10އިބޫއަށް ޒުވާން ގްރޫޕަކުން ހަމަލާ ދޭން މަސައްކަތްކުރި މައްސަލަ ފުލުހުން އެކަށީގެންވާ ގޮތުގައި ތަހުގީގެއް ނުކުރޭ
އެމްޑީޕީގެ ޗެއާރޕާސަން ހަސަން ލަތީފު
ރިޔާސީ އިންތިހާބުގައި ވާދަކުރައްވާނެ ކެންޑިޑޭޓުންގެ ގޮތުގައި ސިޔާސީ ޕާޓީތަކުން އާންމުކޮށްފައިވާ ފަރާތްތަކަށް ހަމަހަމަ އުސޫލަކުން އަމަލު ކުރުމުގެ ފުރުސަތު ރައީސް ޔާމިންގެ ސަރުކާރަށް ނުދެވޭނެ ކަމަށް އެމްޑީޕީގެ ޗެއާރޕާސަން ހަސަން ލަތީފު ވިދާޅުވެއްޖެއެވެ.
ރާއްޖެޓީވީގެ "ފަލަ ސުރުހީ" ޕްރޮގްރާމްގައި ވާހަކަ ދައްވަމުން ހަސަން ލަތީފު ވިދާޅުވީ ހަމަހަމަ އުސޫލަކުން އަމަލުކުރުމަށް ބަންޑާރަ ނާއިބު މުހައްމަދު އަނިލް ފުލުހުންނަށާއި ހޯމް މިނިސްޓްރީއަށާއި ހައުސިން މިނިސްޓްރީއަށް އެންގެވި ނަމަވެސް އެގޮތަށް އެކަން ނުހިނގާނެ ކަމަށާއި، އެފުރުސަތު މިސާރުކާރަށް ހޯދައި ނުދެވޭނެ ކަމަށެވެ.
ގުޅިފައިވާ ޕާޓީތަކުގެ ކެންޑިޑޭޓް އިބްރާހިމް މުހައްމަދު ސޯލިހުގެ ކެންޕެއިންގެ ހަރަކާތްތައް ހިންގެވުމަށް އަންގާރަ ދުވަހު ހުޅުމާލެއަށް ވަޑައިގެން އުޅުއްވަނިކޮށް ޒުވާން ގްރޫޕަކުން ހަމަލާ ދޭން މަސައްކަތްކޮށް، ކަޅުތެޔޮ ޖެހި މައްސަލައަށް އަލިއަޅުއްވަލައިވަމުން ހަސަން ލަތީފު ވިދާޅުވީ މިމައްސަލަ ފުލުހުން އެކަށީގެންވާ ގޮތުގައި ތަހުގީގު ނުކުރާ ކަމަށެވެ. އަދި މިމައްސަލަ ތަހުގީގު ކުރަންޖެހޭ އަވަސްމިނުގައި ކުރާތަން ނުފެންނަ ކަމަށް އޭނާ ވިދާޅުވިއެވެ.
މީގެ އިތުރުން ހަސަން ލަތީފު ވިދާޅުވީ ސިޔާސީ ޕާޓީއެއްގެ ހައިސިއްޔަތުން ކުރަންޖެހޭ މަސައްކަތް އެމްޑީޕީން ކުރާނެ ކަމަށާއި، އެޕާޓީން ކުރިއަށް ގެންދާ ސިޔާސީ ހަރަކާތްތަކަކީ ސުލްހަވެރިކަމާ އެކު ކުރިއަށް ގެންދާ ހަރަކާތްތަކެއް ކަމަށެވެ.
އެގޮތުން އެމްޑީޕީން ކުރިއަށް ގެންދިޔަ ޕްރައިމަރީގެ އިންތިޚާބުގައި 43،000 ވުރެ ގިނަ މެންބަރުންގެ ވޯޓުން ރައީސް ނަޝީދު ހޮވިވަޑައިގެންނެވި ކަމަށާއި، ނަމަވެސް އެމަނިކުފާނަށް ރިޔާސީ އިންތިޚާބުގައި ވާދަކުރުމުގެ ފުރުސަތު މިސަރުކާރުން ބަންދުކޮށްފައިވާ ކަމަށް ހަސަން ލަތީފު ވިދާޅުވިއެވެ. އަދި ވިދާޅުވީ ރައީސް ނަޝީދަށް ވާދަ ނުކުރެވޭ ގޮތަށް ބާއްވާ ރިޔާސީ އިންތިޚާބެއްގައި ހަމަހަމަ ފުރުސަތު ލިބޭނެ ކަމަށް ގަބޫލުނުކުރާ ކަމަށެވެ.
"ރައީސް ނަޝީދަށް ވާދަނުކުރެވޭ ގޮތަށް ބާއްވާ އިންތިޚާބެއްގައި ހަމަހަމަ ފުރުސަތުދޭ ވާހަކަ ހަގީގަތުގައި ބަންޑާރ ނާއިބު ދައްކަވައިގެން ނުވެސް ވާނެ. އެފުރުސަތު ހަމަހަމައެއް ނޫން. އެފުރުސަތު ހަމަހަމަކަމަށް އަޅުގަނޑުމެންނަށް ގަބޫލުކުރެވޭނީ ޕީޕީއެމްގެ ފަރާތުން، ރައީސް ޔާމިންގެ ފެކްޝަނުން އެބޭފުޅުން އެންމެ އެދޭ ކެންޑިޑޭޓް ނޫން ކެންޑިޑޭޓެއް ވާދަކުރައްވަންޏާ. އެހެން ނޫން ނަމަ ހަމަހަމަ ކަމަށް ގަބޫކުރާނީ ކިހިނެތްތޯ؟" ހަސަން ލަތީފު ވިދާޅުވިއެވެ.
ހަސަން ލަތީފު ވިދާޅުވީ ހަމަހަމަ ފުރުސަތުގެ ވާހަކަދައްކަން ޖާގަ ވެސް ނެތް ކަމަށާއި، އެމްޑީޕީގައި ހިމެނޭ 52،000 އަށް ވުރެ ގިނަ މެންބަރު ތިބިއިރު، ގިނަ މެންބަރުން ބޭނުންވާ ލީޑަރު ރިޔާސި އިންތިޚާބަށް ނެރެވެން ނެތް ކަމަށެވެ. އެހެންކަމުން ހަމަހަމަ ކުރާނެ ގޮތެއް ނުވިސްނޭ ކަމަށް ހަސަން ލަތީފު ވިދާޅުވިއެވެ.
ހަސަން ލަތީފު ވިދާޅުވީ ކެންޑިޑޭޓުންނަށް ރައްކާތެރިކަމާއި ހިމާޔަތް ދިނުމަކީ ބަންޑާރަ ނާއިބު އަންގަވައިގެން ކުރަންޖެހޭ ކަމެއް ނޫން ކަމަށާއި އަސާސީ ހައްގުތަކަކީ ދޭންޖެހޭ ހައްގުތަކެއް ކަމަށެވެ. އަދި ކޮންމެ ރައްޔިތެއް ވެސް ރައްކާތެރިކޮށްދިނުމަކީ ފުލުހުންގެ ޒިންމާއެއް ކަމަށާއި ތަނެއްގައި ކަމެއް ހިނގައިގެން އުޅޭ އިރު އެ މައްސަލަ އަދި ހުށަނާޅައޭ ބުނެ އެކަމަށް އެޓެންޑްނުވެ ނުތިބެވޭނެ ކަމަށް ވެސް ހަސަން ވިދާޅުވިއެވެ.
ހަސަން ވިދާޅުވީ އެގޮތަށް ތޮޔޮ ފޮދެއް ބުރައިގެން ފަހަތަށް ޖެހޭނެކަމަށް ހީކުރުމަކީ މޮޔަކަމެއް ކަމަށާއި ރިޔާސީ ކެންޑިޑޭޓް އިބްރާހީމް މުހައްމަދު ސޯލިހު ވެސް އަދި އެމްޑީޕީ ވެސް ފަހަތަށް ނުޖެއްސޭނެ ކަމަށެވެ.
