ޑިކްޓޭޓަރަކަށް އަލި ކުރިމަގެއް ހޯދައެއް ނުދެވޭނެ، މާޒީން ދަސްކުރޭ: ނިޔާޒް
ނިޔާޒް ގެންދަވަނީ ފުޅާ ދާއިރާއެއްގައި ސަރުކާރަށް ފާޑު ވިދާޅުވަމުން
ކުރީގެ އޯޑިޓަރ ޖެނެރަލް ނިޔާޒް އިބްރާހިމް
ޑިކްޓޭޓަރަކު ރައްޔިތުންނަށް އަލި މުސްތަގުބަލެއް ހޯދައި ނުދޭނެ ކަމަށާއި، މާޒީން ފިލާވަޅު ދަސްކުރަން ޖެހޭ ކަމަށް ކުރީގެ އޯޑިޓަރ ޖެނެރަލް ނިޔާޒް އިބްރާހިމް ވިދާޅުވެއްޖެއެވެ.
ހޮނިހިރު ދުވަހުގެ ހެނދުނު ނިޔާޒް ކުރެއްވި ޓްވީޓެއްގައި ވިދާޅުވީ، ޑިކްޓޭޓަރަކު ރައްޔިތުންނަށް އަލި މުސްތަގުބަލެއް ހޯދައިދީފާނެ ކަމަށް އިތުބާރު ކޮށްގެން ނުވާނެ ކަމަށާ، ދިވެހި ރައްޔިތުން މާޒީގެ ތަޖުރިބާއިން ފިލާވަޅު ދަސްކުރަން ޖެހޭ ކަމަށެވެ.
ވަކި ފަރާތަކަށް ނިސްބަތް ނުކޮށް، ރައްޔިތުންނަށް ދެއްވި ނަޞޭހަތެއްގެ ގޮތުގައި ނިޔާޒް މިފަދަ ޓްވީޓްއެއް ކުރައްވާފައިވާއިރު، ފަހަކަށް އައިސް ނިޔާޒް ދަނީ ވަރަށް ބޮޑަށް ސަރުކާރަށް ފާޑު ވިދާޅުވަމުންނެވެ. އަދި ޚާއްސަކޮށް ސަރުކާރާއި މެދު ކުރެވޭ ކޮރަޕްޝަންގެ ތުޙުމަތުތަކާއި ގުޅޭގޮތުން ނިޔާޒް ގެންދަވަނީ ސޯޝަލް މީޑީއާގައި ވަރަށް ފުޅާ ދާއިރާއެއްގައި ވާހަފުޅު ދައްކަވަމުންނެވެ.
ދިވެހި ސަރުކާރުގެ ތެރެއިން ހިންގާފައިވާ ކޮރަޕްޝަނާއި ގުޅޭގޮތުން އަލްޖަޒީރާއިން ތައްޔާރުކުރި ޑޮކިއުމެންޓްރީ، 'ސްޓީލިންގ ޕެރަޑައިސް' އަށް އިންޓަރވިއުވެސް ދެއްވާފައިވާ ނިޔާޒް، އޯޑިޓަރ ޖެނެރަލްގެ މަޤާމުގައި ހުންނަވަނިކޮށް، އެބޭފުޅާ އެ މަޤާމުން ދުރުކޮށްފައިވަނީ، ނިޔާޒް މަޤާމުން ވަކިވާގޮތަށް، ރައްޔިތުންގެ މަޖިލީހުން، އެއްރެއެއްގެ ދަންވާން ގާތްވެފައިވަނިކޮށް އޯޑިޓް ޤާނޫނަށް ގެނައި އިސްލާހަކުންނެވެ.
ނިޔާޒް މަޤާމުން ވަކިކުރީ ސަރުކާރުގެ ތެރޭގައި ހިންގާ ކޮރަޕްޝަންގެ އަމަލުތަކާއިމެދު ނިޔާޒް ހިތްހަމަނުޖެހިވަޑައިގެން އެކަން ރައިސާއި ހިއްސާކުރައްވާފައިވަނިކޮށް، ސަރުކާރުގެ ތެރެއިން އެކި ބޭފުޅުން، އެބޭފުޅުންގެ ކޮރަޕްޝަން ފޮރުވުމަށް ކަމަށް އޭރު ތުޙުމަތު ކުރެވިގެން ދިޔައެވެ.
