ބައިނަލް އަގުވާމީ މުޖުތަމައުއިންވެސް ވަކި ފަރާތަކަށް ބުރަ ނުވެ ހަމަހަމަކަން އިސްކުރުމަށް ދިވެހި ސަރުކާރުން ގޮވާލައިފި އެވެ.

އިދިކޮޅު ސިޔާސީ ފަރާތްތަކަށް ބިރު ދެއްކުން ހުއްޓާލުމަށް ޔޫރަޕްގެ އިއްތިހާދާއި، އެމެރިކާ، ކެނެޑާ، ނޯވޭ އަދި ސްވިޓްޒަލެންޑުގެ އެމްބަސީން ނެރެފައިވާ ގުޅިފައިވާ ބަޔާނަށް ރައްދުދީ ރާއްޖޭގެ ފޮރިން މިނިސްޓްރީން ހޯމަ ދުވަހު ނެރެފައިވާ ބަޔާނެއްގައި ބުނެފައިވަނީ، އިދިކޮޅު ފަރާތްތަކަށްވެސް ޤާނޫނީ އިމުގެ ތެރެއިން ސިޔާސީ ޙަރަކާތް ހިންގުމުގެ ޖާގަ އެބައޮތް ކަމަށެވެ.

"ޤާނޫނީ އިމުގެ ތެރޭގައި މަސައްކަތްކުރާ އިދިކޮޅު ޙަރަކާތަކީ ޑިމޮކްރަސީއެއްގެ މުހިއްމު ބައެއް ކަމަށް ޤަބޫލު ކުރަން" ސަރުކާރުގެ ބަޔާނުގައިވެއެވެ.

ޤާނޫނީ އިމުގެ ތެރެއިން ދިވެހިރާއްޖޭގައި ސިޔާސީ ޙަރަކާތް ހިންގުމުގެ ޖާގަ އެބައޮތް ކަމަށާއި، އަދި ރާއްޖޭގެ މައްސަލަތައް ޙައްލު ކުރުމަކީ ހަމައެކަނި ސަރުކާރުގެ މަސްއޫލިއްޔަތެއް ނޫން ކަމަށް ބަޔާނުގައި ބުނެފައިވެއެވެ. އޭގެއިތުރުން މައްސަލަތައް ޙައްލުކުރުމުގައި ރާއްޖޭގެ އިދިކޮޅު ފަރާތްތަކުގެ ވެސް ޒިންމާއެއް އެބައޮތް ކަމަށް ބަޔާނުގައިވެއެވެ. އެގޮތުން ސިޔާސީ ޕާޓީ ތަކުގެ މަޝްވަރާއަށް މިހާރުވެސް ގޮވާލާފައިވާނެކަމަށް ސަރުކާރުން ވަނީ ފާހަގަކޮށްފައެވެ.

ފޮރިން މިނިސްޓްރީން ބުނީ، ބައިނަލްއަޤްވާމީ މުޖުތަމައުންވެސް ވަކި ފަރާތަކަށް ނުޖެހި ދިވެހިރާއްޖޭގައި ހުރި މައްސަލަތައް ދެނެގަނެ އެކަންކަން ޙައްލުކުރުމުގައި ދިވެހިރާއްޖޭގެ ސަރުކާރަށް އެހީތެރިވުމުގެ މުހިއްމުކަން މި ދަނޑިވަޅުގައި ބޮޑުކަމަށް ދެކޭކަމަށެވެ.

މީގެ 10 ވަރަކަށް އަހަރުކުރިން ރާއްޖޭގައި އޮތް ސިޔާސީ ހަލަބޮލިކަން ކުޑަކޮށް ޒަމާންވީ ސިޔާސީ މައްސަލަތަކުން އެކަހެރިވެ، އިޤްތިޞާދީ ބޮޑު ބަދަލަކަށް ދިވެހިރާއްޖެ މިސްރާބު ޖަހާފައިވާތީ، އެކަމުގެ ފައިދާ ދިވެހި ރައްޔިތުންނަށް ކުރަމުން އަންނަ ދަނޑިވަޅުގައި އިދިކޮޅު ފަރާތްތަކުން ކުރާ މަސައްކަތަކީ ތަރަށްގީއަށް ހުރަސް އެޅުމަށް ކުރާމަސަައްކަތްތަކެއްކަމަށް ދިވެހި ސަރުކާރުން ވަނީ ތުހުމަތުކޮށްފައެވެ.

ފޮރިން މިނިސްޓްރީން ބުނީ، ތަރައްގީއަށް ހުރަސް އެޅުމަށް ސީދާ ގޮތުންނާއި ނުސީދާ ގޮތުން ކުރަމުންދާ މަސައްކަތުގެ ސަބަބުން ގެއްލުންވަމުންދާނީ ދިވެހި ރައްޔިތުންނަށް ކަމަށެވެ.

ޖުމްހޫރީ ޕާޓީގެ ލީޑަރު ގާސިމް އިބްރާހިމް ހައްޔަރުކުރުމާ އެކު ރާއްޖޭގެ ސިޔާސީ މަސްރަހު ހަލަބޮލިވެފައިވަނިކޮށް، ޔޫރަޕްގެ އިއްތިހާދުންނާއި، ކެނެޑާ, ނޯވޭ، ސްވިޒަލޭންޑްގެ އިތުރުން އެމެރިކާ ގުޅިގެން ހޮނިހިރު ދުވަހު ނެރުނު ބަޔާނުގައި، ގާނޫނީ އިމުގެ ތެރެއިން މަސައްކަތްކުރާ އިދިކޮޅު ސިޔާސީ ފަރާތެއް އޮތުމަކީ ވަރުގަދަ ޑިމޮކްރަސީއަކަށް ލާޒިމް ކަމެއް ކަމަށާއި، އެކަމަށް ސަރުކާރުން ޖާގަ ދޭން ޖެހޭކަމަށް ވަނީ ގޮވާލާފައެވެ. އަދި ރާއްޖޭގައި އަސާސީ ހައްގުތައް ކަށަވަރުކޮށްދޭ މިންވަރު ގާތުން ބަލަމުންދާނެ ކަމަށާއި، އަދި ވަކިން ޚާއްސަކޮށް ކުރިއަށް ލޯކަލް ކައުންސިލްތަކުގެ އިންތިޚާބުގެ ކަންކަން ކުރިއަށްދާ ގޮތް ގާތުން ބަލާ ފާރަވެރިވާނެކަމަށް އީޔޫގެ ގުޅިފައިވާ ބަޔާނުގައި ވަނީ، ސަރުކާރަށް އެލާޓްކޮށްފައެވެ.