ޕޯސްޓަރު ހަރުކުރުމުގެ ކުރިން ހުރަސް އަޅާ، އެކަކު ހައްޔަރު ކޮށްފި
ފުލުހުން އަމަލުކުރަނީ ކޮން އުސޫލަކުން ކަމެއް ސާފެއް ނުވޭ
ފުލުހުން މީހަކު އަތުން ޕޯސްޓަރު ނަގަނީ
ރިޔާސީ އިންތިޚާބަށް ތައްޔާރުވުމުގެ ގޮތުން އެމްޑީޕީން ހިންގާ "ޖަޒީރާ ރާއްޖެ" ޕޯސްޓަރުތައް ހިއްޕުމުގެ ހަރަކާތަށް ފުލުހުން ހުރަސް އަޅާ އެކަކު ހައްޔަރު ކޮށްފިއެވެ.
ބުދަ ދުވަހުގެ ހަވީރު އެމްޑީޕީން މ. ރީނދޫމާގެ، ކަންމަތީގައި ޕޯސްޓަރު ހަރުކުރުމުގެ ހަރަކާތް ފެށުމުގެ ކުރިން ފުލުހުން ވަނީ އެ ސަރަހައްދަށް ގޮސް، އެތާނގައި ތިބި މީހުން ދުރަށް ޖައްސާފައެވެ. އަދި އެތާނގައި ހަރަކާތްތެރިވި ދެ އަންހެން މީހުން ގެންގުޅުނު ފޮށިތައް ވެސް ދިނުމަށް ފުލުހުން ވަނީ އެދިފައެވެ. އެހެންނަމަވެސް އެ ފޮށިތަކެއް ފުލުހުންނާއި ހަވާލެއް ނުކުރެއެވެ.
އެމްޑީޕީގެ ޗެއަރޕާސަންގެ ނާއިބު އަލީ ނިޔާޒާއި، މައްޗަށް ގޯޅި ދެކުނު ދާއިރާގެ މެމްބަރު މާރިޔާ އަހުމަދު ދީދީގެ އިތުރުން އެ ޕާޓީގެ ބައެއް ސަޕޯޓަރުން ބައިވެރި މި ހަރަކާތް ކުރިއަށް ގެންދިއުމަށް ފުލުހުން އެއްވެސް ވަރަކަށް ފުރުސަތު ދީފައެއް ނުވެއެވެ.
ޕޯސްޓަރުތައް ހަރުކުރުމުގެ ހަރަކާތައް ފުލުހުން ހުރަސް އެޅުމާއި ގުޅިގެން މާލޭ ސިޓީގެ މޭޔަރު ޝިފާ މުހައްމަދު ވިދާޅުވީ ކޮންމެ މީހަކު ބޭނުންވާ ފިކުރަކަށް ތާއީދު ކުރުމަށާއި އެ ފިކުރެއް ޕްރޮމޯޓް ކުރުމަށް މަސައްކަތް ކުރުމުގެ ފުރުސަތު ކޮންމެ މީހަކަށް ލިބެންވާނެ ކަމަށެވެ.
އެމްޑީޕީން ޕޯސްޓަރުތައް ހަރުކުރަން އުޅުމުން ފުލުހުން ވަނީ އެ ޕޯސްޓަރުތައް އެމީހުން އަތުން ޖަހައިގަނެ، ވީދާލާފައެވެ. އަދި ޕޯސްޓަރުތައް ހިފައިގެން އެ ސަރަހައްދުގައި މަޑުކޮށްލައިގެން ތިބި މީހުންގެ އަތުން ވެސް ފުލުހުން ވަނީ ޕޯސްޓަރު ޖަހައިގަނެފައެވެ.
އެމްޑީޕީގެ ޗެއަރޕާސަންގެ ނާއިބު އަލީ ނިޔާޒު ވިދާޅުވީ އެ ޕޯސްޓަރުތަކުގައި އެއްވެސް ގޯސް އެއްޗެއް ލިޔެފައި ނޯންނާނެ ކަމަށާއި ޕޯސްޓަރުގައި ހިމަނާފައިވާ ކަންތައްތަކަކީ މި ސަރުކާރުން ރާއްޖެއަށް ބޭނުންނުވާ ކަންތައްތަކެއްގެ ގޮތުގައި އަމަލުތައް ހުންނަ ގޮތުން ސިފަ ކުރެވޭ ކަމަށެވެ.
ފުލުހުން ވަނީ އަންގާރަ ދުވަހު އެމްޑީޕީން ކުރިއަށް ގެންދިޔަ ޕޯސްޓަރު ހަރުކުރުމުގެ ހަރަކާތަށް ހުރަސް އަޅާ ރައްޔިތުންގެ މަޖިލީހުގެ ކުރީގެ މެމްބަރު މުހައްމަދު ރަޝީދު (ބޮންޑާ) އާއި އެމްޑީޕީގެ ޔޫތުވިންގު މެމްބަރު މައިމޫން ހައްޔަރުކޮށްފައެވެ. އެހެން ނަމަވެސް އެ ދެމީހުން ވަނީ ފަހުން ދޫކޮށްލާފައެވެ.
ސަރުކާރަށް ތާއީދުކުރާ ފަރާތްތަކުން ގޭގެއަށް ގޮސް ހިންގާ ކެމްޕެއިނަށް ހުރަސް ނާޅާއިރު އެ ފަރާތްތަކަށް ފުލުހުން ގެންދަނީ އެހީތެރިކަން ވެސް ފޯރުކޮށްދެމުންނެވެ.
