ކ. މާލެ
|
2 ފެބްރުއަރީ 2017 | ބުރާސްފަތި 23:17
ރާއްޖެޓީވީގެ ސީއޯއޯ ހުސެއިން ފިޔާޒް މޫސާ
ރާއްޖެޓީވީގެ ސީއޯއޯ ހުސެއިން ފިޔާޒް މޫސާ
މުހައްމަދު ޝަރުހާން
ނޫސްވެރިންގެ ޝަރީއަތް
ފިޔާޒުގެ ޝަރީއަތް: މި މަސް ނިމުމުގެ ކުރިން ހުކުމް ކުރާނެ!
 
ޚުލާސާ ބަޔާން އަންނަ ހަފްތާގައި ނަގާނެ
 
ހަތް ހެކިން ހުށަހެޅި އިރު ކޯޓުން ބަލައިގަތީ ތިން ހެކިން

ރާއްޖެޓީވީގެ ޗީފް އޮޕަރޭޓިން އޮފިސަރު ހުސެއިން ފިޔާޒް މޫސާގެ މައްޗަށް ދައުލަތުން އުފުލާފައިވާ އަތްލުމުގެ ކުށުގެ ދައުވާގެ ހުކުމް މި ހިނގާ ފެބްރުއަރީ މަސް ނިމުމުގެ ކުރިން އިއްވާނެ ކަމަށް ގާޒީ ވިދާޅުވެއްޖެ އެވެ.

 

ފިޔާޒުގެ މައްޗަށް ކުރި ދައުވާގައި ބުނެފައިވަނީ، މުލިއާގެ ކައިރިން ފެނުނު ބޮމެއް، މާފަންނު ސްޓޭޑިއަމް ސަރަހައްދުގައި ނައްތާލުމަށް ސަލާމަތީ ބާރުތަކުން ހަރަކާތްތެރިވަމުންދަނިކޮށް، އެ ސަރަހައްދުން ފިޔާޒު ނުގޮސް، ފުލުހެއްގެ މޭ މަތީ ޖަހާފައިވާ ކަމަށެވެ. ނަމަވެސް އެ ދައުވާއަކީ އަސްލެއް ނެތް ދައުވާއެއް ކަމަށް ފިޔާޒު ބުނެ އެވެ.

 

ފިޔާޒުގެ މައްޗަށް ކޮށްފައިވާ ފުލުހެއްގެ ގައިގައި އަތްލުމުގެ ކުށުގެ ދައުވާއަކީ ޖުނަހުގެ ތިން ވަނަ ދަރަޖައިގެ ކުށެކެވެ. އެ ކުށުގެ އަސާސީ އަދަބަކީ އެއް މަހާއި ހަ ދުވަހުގެ ޖަލު ހުކުމެކެވެ.

 

ފިޔާޒުގެ މައްޗަށް ހިންގާ ޝަރީއަތުގައި ބުރާސްފަތި ދުވަހު ބޭއްވި އަޑުއެހުމުގައި ދައުވާ އިން ދިފާއުވުމަށް ހުށަހަޅާފައިވާ ހަތް ހެކިންގެ ތެރެއިން ތިން ހެކިންގެ ހެކި ބަސް ވަނީ ނަގާފަ އެވެ. ބާކީ ހަތަރު ހެކިންގެ ހެކި ބަސް ނުނެގުމަށް ޝަރީއަތުން ވަނީ ނިންމާފަ އެވެ.

 

ފިޔާޒުގެ ދިފާއީ ހެކީންގެ ގޮތުގައި ހެކި ބަސް ދިނީ މާފަންނު ސްޓޭޑިއަމް ސަރަހައްދުން ފިޔާޒުއާއެކު ހައްޔަރުކުރި ރާއްޖެޓީވީގެ ނޫސްވެރިޔާ މުހައްމަދު ވިސާމާއި ލީވާން އަލި ނާސިރުގެ އިތުރުން މުރުޝިދު އަބްދުލްހަކީމް އެވެ. އެ ތިން މީހުން ވެސް ހެކި ބަސް ދީފައިވަނީ ފުލުހެއްގެ ގައިގައި ފިޔާޒް ނުޖަހާ ކަމަށް ބުނެ އެވެ. އަދި ފުލުހުންގެ އަމުރަށް ނުކިޔަމަންތެރިވެ ގަދަހަދާފައި ވެސް ނުވާ ކަމަށް އެ ތިން މީހުން ބުންޏެވެ.

 

ފިޔާޒުގެ މައްޗަށް ދައުވާ ސާބިތުކުރުމަށް ހެކި ބަސް ދިނީ ތިން ފުލުހުންނެވެ. އެ ތިން ފުލުހުންނަކީ ވިސާމާއި ލީވާނުގެ މައްޗަށް ހިންގި ޝަރީއަތުގައި ވެސް ހެކި ބަސް ދިން ތިން ފުލުހުންނެވެ.

 

ހެކީންގެ ހެކި ބަސް ނަގާ ނިމުމުން މައްސަލަ ބައްލަވާ ގާޒީ އާދަމް އާރިފް ވިދާޅުވީ މައްސަލައިގެ ޚުލާސާ ބަޔާން ހުށަހެޅުމަށް އަންނަ ހަފްތާގެ ތެރޭގައި އަޑުއެހުމެއް ތާވަލުކުރައްވާނެ ކަމަށެވެ. އަދި މި މަސް ނިމުމުގެ ކުރިން މައްސަލައިގައި ހުކުމް އިއްވަވާނެ ކަމަށް ވެސް ގާޒީ ވިދާޅުވި އެވެ.

އެންމެ ފަހުން އަޕްޑޭޓް ކުރީ: 2 މަސް ކުރިން
ރިވިއު ކުރީ: ހުސެން ފިޔާޒް
0%
0%
0%
0%
0%
0%
ކޮމެންޓް