ސަރުކާރު ޖަވާބުދާރީ ކުރުވަން މަޖިލީހުން ހުރަސް އަޅާ: އިބޫ

ސަރުކާރު ޖަވާބުދާރީ ކުރުމަކީ ރައްޔިތުންގެ މަޖިލީހުގެ ޒިންމާއަކަށް ވިޔަސް، އެކަން ކުރުމުގައި މަޖިލީހުން ގިނަ ހުރަސްތައް ކުރިމަތި ކުރުވާކަމަށް މަޖިލީހުގެ މައިނޯރިޓީ ލީޑަރު އަދި އެމްޑީޕީ ޕާލަމެންޓްރީ ގްރޫޕްގެ ލީޑަރު އިބްރާހީމް މުހައްމަދު ސޯލިހު (އިބޫ) ވިދާޅުވެއްޖެ އެވެ.

އެމްޑީޕީ ޕާލަމެންޓްރީ ގްރޫޕުން ބުދަ ދުވަހު ބޭއްވި ބައްދަލުވުމަށްފަހު އިބޫ ވިދާޅުވީ ސަރުކާރު ދިފާއު ކުރުމަށްޓަކައި މަޖިލީހުން ކުރަމުންދާ ކަންތައްތައް އެދަނީ ފެންނަމުން ކަމަށާއި ސަރުކާރުން ހިންގާ ކަންކަން ހާމަ ނުކުރުމަކީ މިސަރުކާރުގެ ސިޔާސަތެއް ކަމަށެވެ. މަޖިލީހުގެ ޖަލްސާތައް ނުބާއްވަނީ ވެސް ސަރުކާރުން ގެންގުޅޭ ކަންކަން ހާމަ ނުކުރުމުގެ އެ ސިޔާސަތުގެ ދަށުން ކަމަށް އިބޫ ވިދާޅުވި އެވެ.

އިބޫ ވިދާޅުވީ މި ސަރުކާރަށް ގޮންޖެހުމެއް އަންނަ ނުވަތަ ސަރުކާރު ޖަވާބުދާރީވާންޖެހޭ ކަހަލަ އެއްވެސް ކަމެއްގައި މި ސަރުކާރުން ކުރިމަތި ނުލާ ކަމަށާއި މަޖިލީހުގެ މެޖޯރިޓީ އޮތީ ސަރުކާރުގެ އަތުގައި ކަމަށެވެ.

މަޖިލީހުގެ ޖަލްސާތައް ނުބާއްވަނީ ކިއްވެތޯ ނޫސްވެރިޔަކު ކުރި ސުވާލަކާއި ގުޅިގެން އިބޫ ވިދާޅުވީ ރައްޔިތުންގެ މަޖިލިސް ބާއްވާކަން ނުވަތަ ނުބާއްވާކަންވެސް މިހާރު ގިނަ ފަހަރު ނޭނގޭ ކަމަށާއި ރައްޔިތުންގެ މަޖިލީހުގެ ރައީސް އުޅުއްވާ ތަނެއް މަޖިލީހުގެ މެމްބަރުންނަށް އެއްވެސް އެނގިވަޑައިނުގަންނަވާ ކަމަށެވެ.

ވަޒީފާގެ ބިރުދައްކައިގެންނާއި މަޖުބޫރު ކޮށްގެން ޕީޕީއެމަށް މެމްބަރުން އިތުރު ކުރުމަށް މަސައްކަތް ކުރަމުންދާތީ އެމައްސަލަ މަޖިލީހަށް ހުށަހަޅާފައިވާއިރު، މިހަފްތާ މަޖިލީހުގެ ޖަލްސާއެއް ބާއްވާފައިވަނީ ހޯމަ ދުވަހު އެކަންޏެވެ.