އަބްދުﷲ ސައީދާއި އަލީ ހަމީދުގެ ފަނޑިޔާރުކަން ގެއްލިއްޖެ
އުއްތަމަ ފަނޑިޔާރު ކަމާއި ފަނޑިޔާރު ކަމުގެ މަގާމު ހުސްވީ އަލީ ހަމީދާއި އަބްދުﷲ ސައިދަށް ކުރި ހުކުމް ނިހާއީ ހުކުމަކަށް ވުމުން
އަބްދުﷲ ސައީދާއި އަލީ ހަމީދު:- އެ ބޭފުޅުންގެ މަގާމު މިއަދު ވަނީ ގެއްލިފައި
އުއްތަމަ ފަނޑިޔާރުގެ މަގާމުގައި ހުންނެވި އަބްދުﷲ ސައީދާއި ސުޕްރީމް ކޯޓުގެ ފަނޑިޔާރުކަމުގައި ހުންނެވި އަލީ ހަމީދުގެ މައްޗަށް ޖިނާއީ ކުށެއް ސާބިތުވާ ކަމަށް ކްރިމިނަލް ކޯޓުން ކޮށްފައިވާ ހުކުމް ސުޕްރީމް ކޯޓުން ދެމެހެއްޓުމާއެކު އެ ހުކުމަކީ ނިހާއީ ހުކުމަކަށްވެ އެ ބޭފުޅުންގެ މަގާމު ގެއްލިއްޖެ އެވެ.
ފަނޑިޔާރުންގެ ގާނޫނަށް އެންމެ ފަހުން ގެނައި އިސްލާހުގައިވާ ގޮތުން ޖިނާއީ ކުށެއް ސާބިތުވާ ކަމަށް ކުރާ ހުކުމަކީ ނިހާއީ ހުކުމަކަށް ވެއްޖެ ނަމަ އެ ފަނޑިޔާރަކު އޮޓަމެޓިކުން ފަނޑިޔާރެއްގެ މަގާމުން ވަކިވާނެ އެވެ. ފަނޑިޔާރުންގެ ގާނޫނަށް ގެނައި މި އިސްލާހު ބާތިލު ކުރަން ސުޕްރީމް ކޯޓަށް ދުސްތޫރީ މައްސަލައެއްގެ ގޮތުގައި ހުށަހެޅުމުން އެ ކޯޓުން ވެސް ވަނީ އެ އިސްލާހް ރަނގަޅު ކަމަށް ނިންމަވާފަ އެވެ.
މިދިޔަ މަހުގެ 13 ވަނަ ދުވަހު ފަނޑިޔާރުންގެ ގާނޫނަށް މަޖިލީހުން ގެނައި އިސްލާހުގައި ބުނެފައިވާ ގޮތުން ފަނޑިޔާރެއްގެ މައްޗަށް ތުހުމަތު ކުރެވި، ހައްޔަރު ކޮށްފިނަމަ ފަނޑިޔާރު ކަމުގެ މަގާމުން ސަސްޕެންޑް ކުރެވޭނެއެވެ. ފަނޑިޔާރެއްގެ މައްޗަށް ޖިނާއީ ކުށެއް ސާބިތުވެ، ނިހާއީ ހުކުމެއްގެ ގޮތުގައި އެ ހުކުމް ކަނޑައަޅައިފި ނަމަ އެ ފަނޑިޔާރަކު މަގާމުން ވަކިވާނެއެވެ. ސަރުކާރުގެ ފަރާތުން ހުށަޅައި، ސަރުކާރު މެމްބަރުންގެ ވޯޓުން ފާސްކުރި އެ ބިލް ރައީސް އަބްދުﷲ ޔާމީން ތަސްދީގު ކުރައްވާފައި ވަނީ މިދިޔަ މަހުގެ 14 ވަނަ ދުވަހުއެވެ.
ފަނޑިޔާރުންތަކަކަށް ނުފޫޒު ފޯރުވި ކަމަށް ބުނެ އަބްދުﷲ ސައީދާއި އަލީ ހަމީދު ޖަލަށްލާން ކްރިމިނަލް ކޯޓުން ކުރި ހުކުމާއި ޖެމްސްގެ ހިދުމަތް މެދުކަނޑާލި ކަމަށްބުނާ މައްސަލައިގައި އަބްދުﷲ ސައީދަށް ކޮށްފައިވާ ހުކުމަށް ހައި ކޯޓުން ތާއިދުކޮށްފައިވަނީ ރަނގަޅަށް ކަމަށް ބުނެ އެ މައްސަލަ ނުބަލަން ސުޕްރީމް ކޯޓުން ނިންމީ ބުދަ ދުވަހު އެވެ.
ސުޕްރީމް ކޯޓުން މި ގޮތަށް ނިންމީ ރަސްމީ ހަސިއްޔަތުން ކުރަން ޖެހޭ ކަމަކަށް ނުފޫޒު ފޯރުވުމުގެ ކުށް ސާބިތުވާ ކަމަށް ކަނޑައަޅައި އަބްދުﷲ ސައީދާއި އަލީ ހަމީދު އެއް އަހަރާއި ދެ މަހަށް ޖަލަށްލާން ކުރި ހުކުމަށާއި ދައުލަތުގެ މަސައްކަތަށް ހުރަސް އެޅުމުގެ ކުށް ސާބިތުވާ ކަމަށް ކަނޑައަޅައި އުއްތަމަ ފަނޑިޔާރު ހަތަރު މަހަށް ޖަލަށްލާން ކޮށްފައިވާ ހުކުމް އިސްތިއުނާފުގެ ކުރަން ހުށަހެޅުމުންނެވެ. ސުޕްރީމް ކޯޓުން ނިންމާފައިވަނީ ހައި ކޯޓުން އެ މައްސަލައިގައި ނިންމާފައިވާ ގޮތް ބާތިލް ކޮށްދޭން ހުށަހަޅާފައިވާ ސަބަބުތަކަށް ބަލާއިރު އެ ކޯޓުން ކޮށްފައިވާ ހުކުމް ރަނގަޅު ނޫން ކަމަށް ބަލަން ޖެހޭ އެއްވެސް އަސާސެއް ނެތް ކަމަށެވެ. އަދި އެ މައްސަލައިގައި ހައި ކޯޓުން ކޮށްފައިވާ ހުކުމަކީ ޝަރުއީ އަދި ގާނޫނީ ހަމަތަކާ އެއްގޮތައް ކޮށްފައިވާ ހުކުމެއް ކަމަށް ސުޕްރީމް ކޯޓުން އެ ނިންމުމުގައި ކަނޑައަޅާފައިވެ އެވެ.
ސުޕްރީމް ކޯޓަށް ހުށަހެޅި އިސްތިއުނާފުގެ މައްސަލަ ބަލައިގަތުމާމެދު ނިންމާފައިވާ އެ ނިންމުމުގައި ސުޕްރީމް ކޯޓުން އިތުރަށް ބުނެފައިވަނީ ދެ ފަނޑިޔާރުންނަށް އިއްވާފައިވާ ހުކުމަށް ބަދަލު ގެންނަން ޖެހޭނެ ފަދަ ޝަރުއީ އަދި ގާނޫނީ އެއްވެސް ސަބަބެއް އެ ކޯޓަށް ހުށައަޅުއްވާފައިނުވެ އެވެ. އެހެން ކަމުން އެއީ ކޯޓުތަކާއި ބެހޭ ގާނޫނުގެ 16 ވަނަ މާއްދާ އާއި ސުޕްރީމް ކޯޓުގެ ގަވާއިދުގެ 42 ވަނަ މާއްދާގެ ދަށުން ހުއްދަ ދޭން ޖެހޭ މައްސަލައެއް ނޫން ކަމަށް ނިންމާފައިވަނީ ސުޕްރީމް ކޯޓުގެ ފަނޑިޔާރުންގެ މަޖިލީހުން ކަމަށެވެ.
އަބްދުﷲ ސައީދާއި އަލީ ހަމީދުގެ މައްޗަށް ޖުމްލަ ތިން މައްސަލައެއްގައި މިހާރު ހުކުމް އައިސްފައިވާއިރު އެ ބޭފުޅުންގެ މައްޗަށް ކޮށްފައިވާ އެއް އަހަރާއި ހަތް މަހާއި ހަ ދުވަހަށް ޖަލު ހުކުމާމެދު އަދި ހައި ކޯޓުން ގޮތެއް ނުނިންމަ އެވެ.
ސުޕްރީމް ކޯޓުގައި މިހާރު ތިއްބަވަނީ ތިން ފަނޑިޔާރުންނެވެ. އަދި އިތުރު ފަނޑިޔާރުންނާއި އުއްތަމަ ފަނޑިޔާރަކު ވަރަށް އަވަހަށް އައްޔަން ކުރާނެ ކަމަށް ބެލެވެ އެވެ.
