ރިލީޒްކުރިތާ ދެ ދުވަސް ތެރޭ ފިލްމަށް 12.47 ކްރޯޑް ރުޕީސްގެ އާމްދަނީ
އިންޑިޔާއިން ބޭރުން ލިބުނު އާމްދަނީއާއެކު 13.22 ކްރޯޑް ރުޕީސް މިހާތަނަށް ވަނީ ލިބިފައި
ފިލްމު "އޯކޭ ޖާނޫ" ގެ ޕޯސްޓަރެއް
"އޯކޭ ޖާނޫ" ރިލީޒްކުރިތާ ދެ ދުވަސްތެރޭ ފިލްމަށް 12.47 ކްރޯޑް ރުޕީސްގެ އާމްދަނީއެއް ލިބިއްޖެއެވެ.
ޝާދް އަލީ ޑައިރެކްޓްކޮށް މަނީ ރަތްނަމް އާއި ކަރަން ޖޯހަރް ޕްރޮޑިއުސްކޮށްފައިވާ މި ފިލްމް ރިލީޒްކޮށްފައި ވަނީ މި ޖެނުއަރީ މަހުގެ 13 ވަނަ ދުވަހުއެވެ. މިފިލްމަށް އިންޑިޔާއިން ބޭރުން ލިބުނު އާމްދަނީއާ އެކު ޖުމްލަ 13.22 ކްރޯޑް ރުޕީސް ލިބިފައިވާއިރު، ފައިދާގެ ގޮތުގައި ލިބިފައިވަނީ 8.98 ކްރޯޑް ރުޕީސްއެވެ.
އިންޑިޔާގައި އެކަނި ފިލްމަށް ފުރަތަމަ ދުވަހު 4.08 ކްރޯޑް ރުޕީސް ލިބުނުއިރު، ދެވަނަ ދުވަހު ލިބިފައިވަނީ 4.90 ކްރޯޑް ރުޕީސްއެވެ. 1،400 ސްކްރީނުގައި ރިލީޒްކުރި މި ފިލްމު އިންޑިޔާގެ އިތުރުން އެމެރިކާ، ކެނެޑާ، އޮސްޓްރޭލިއާ، އިނގިރޭސިވިލާތް އަދި ނިއުޒިލޭންޑްގައި ވެސް ވަނީ ރިލީޒްކޮށްފައެވެ.
މަނީ ރަތްނަމްގެ ތަމަޅަ ފިލްމު "އޯ ކަދަލް ކަމަނީ" ގެ އޮފިޝަލް ހިންދީ ރީމޭކެއް ކަމަށްވާ "އޯކޭ ޖާނޫ" އަކީ ޒުވާން ފުރައިގެ ޖޯޑުތައް "ރިލޭޝަންޝިޕެއް" ގައި އުޅެމުން ދިމާވާ ތަފާތު ގޮންޖެހުންތަކާ އެކު ތަފާތު ލޯބީގެ ރަހަތައް ދައްކުވައިދޭ ފިލްމެކެވެ. މިފިލްމުގައި އަދިތްޔާ ރޯއީ ކަޕޫރާއެކު ޝްރައްދާ ކަޕޫރު ލީޑް ރޯލުން ފެނިގެންދާނެއެވެ.
