"ޓްރިޕަލް އެކްސް: ރިޓާރން އޮފް ދަ އެކްސޭންޑާ ކޭޖް" މުމްބާއީގައި ރިލީޒްކުރިތާ ތިން ދުވަސް ތެރޭ 17.5 ކްރޯޑް ރުޕީސް ލިބިއްޖެއެވެ.

ޑީޖޭ ކަރޫސޯ ޑައިރެކްޓްކޮށް، ޖޮއެ ރޮތް އާއި ވިން ޑީސެލް ޕްރޮޑިއުސްކޮށްފައިވާ މިފިލްމު ވޯލްޑް ވައިޑްކޮށް ރިލީޒްކުރުމަށް ހަމަޖެހިފައިވަނީ މި ޖެނުއަރީ މަހުގެ 20 ވަނަ ދުވަހު އެމެރިކާގައެވެ.

"ޓްރިޕަލް އެކްސް" ފްރެންޗައިސްގެ ތިންވަނަ ސީކުއެލް ކަމުގައިވާ މި ފިލްމު މުމްބާއީގައި ރިލީޒްކުރީ މި މަހުގެ 14 ވަނަ ދުވަހުއެވެ.

ވިން ޑީސަލްއާއެކު ބޮލީވުޑްގެ ޑީވާ ދީޕިކާ ޕަދުކޯން އާއި ނީނާ ޑޮބްރޭވް، ޑޮނީ ޔެންގެ އިތުރުން ކްރިސް ވޫ އަދި ރޫބީ ރޯޒް ފަދަ މަޤްބޫލު ތަރިން ހިމަނައިގެން އުފައްދާފައިވާ މިފިލްމު އިންޑިޔާގައި ރިލީޒްކުރިތާ ތިންވަނަ އަށް ވީ ދުވަހު ފިލްމަށް ވަނީ 17.5 ކްރޯޑް ރުޕީސްގެ އާމްދަނީއެއް ލިބިފައެވެ. 15 ކްރޯޑް ރުޕީސްގެ ފައިދާއެއް މިހާރު ވެސް ފިލްމަށް ލިބިފައިވާ ކަމަށް ޚަބަރުތައް ބުނެއެވެ.

މިފިލްމު ޕްރިމިއާރ ކުރުން ކުލަގަދަކޮށް މުމްބާއީގައި ބާއްވާފައިވާއިރު، ފިލްމުގެ ޕްރޮމޯޝަނަށް ވިން ޑީސަލް ވަނީ ދީޕިކާއާ އެކު މިދިޔަ ހަފްތާ ތެރޭގައި މުމްބާއީއަށް ގޮސްފައެވެ.

"ޓްރިޕަލް އެކްސް: ރިޓާން އޮފް ދަ އެކްސޭންޑަރ ކޭޖް" އާއި ދާދި އެއްދުވަހެއްގައި ރިލީޒްކުރި ހިންދީ ފިލްމު "އޯކޭ ޖާނޫ" އަށް މިހާތަނަށް ލިބިފައިވަނީ 13.80 ކްރޯޑް ރުޕީސްއެވެ.