ޔަމަން ހަނގުރާމަ: ސައުދީއާއި ގުޅިފައިވާ ފައުޖުތަކުން ހުދައިދާ ބަނދަރަށް ހަމަލާދޭންފަށައިފި
ޔަމަން ހަނގުރާމަ ފަށާފައިވަނީ 2015 ވަނަ އަހަރުގެ މާޗް މަހު
ޔަމަނާއި ސައުދީގެ ގުޅިފައިވާ ކޯލިޝަނުގެ ސިފައިންވަނީ ހުދައިދާ ސަރަހައްދު ހިފާފައި
ހޫޘީ ހަނގުރާމަވެރިންގެ ފައުޖުތަކަށް ތަން ދޫކޮށް ދިއުމަށް ދިން މުހުލަތު ހަމަވިއިރުވެސް އަޅާނުލުމުން، ސައުދީގެ މަދަދާއިއެކު ހަނގުރާމަ ކުރަމުންދާ ފައުޖުތަކުން ހުދައިދާގެ މައި ބަނދަރަށް ހަމަލާދޭން ފަށައިފިއެވެ.
ސަރަހައްދީ މީޑިއާތަކުން ބުނާގޮތުގައި ހަނގުރާމަވެރިންގެ އަމާޒުތަކަށް ކަނޑާއި ވައިގެ މަގުންވަނީ ބޮން އަޅާފައެވެ.
އެހީދޭ ފަރާތްތަކުންވަނީ އެ ސިޓީއަށް ހަމަލާދީފިނަމަ، މިލިއަނެއްހާ މީހުންގެ ތެރެއިން ތިންބައިކުޅަ އެއްބައި މީހުން ޒަޚަމްވެ އިންސާނީ ކާރިސާއެއް އުފެދިދާނެކަމުގެ އިންޒާރު ދީފައެވެ.
އެ ބަނދަރަކީ ޔަމަނަށް އިންސާނީ އެހީ ފޯރުކޮށްދޭ މައި މަގެވެ.
ހަނގުރާމައިގެ ސަބަބުން ސުންނާފަތިވެފައިވާ ޔަމަނުގައި ހަތް މިލިއަނަށްވުރެ ގިނަ މީހުން ކާބޯތަކެތީގެ އެހީއަށް ބަރޯސާވެއެވެ.
ސައުދީގެ އަލް އަރަބިއްޔާ ނެޓްވަރކްގައި ރިޕޯޓް ކޮށްފައިވާގޮތުގައި ހުދައިދާ " މިނިވަންކުރުމަށް" އޮޕަރޭޝަން ފަށާފައިވަނީ ވަޔާއި ކަނޑުގެ ސިފައިންގެ މަދަދާއިއެކު އެއްގަމުމަގުން ވަރުގަދަ ހަމަލާތަކެއްގެ ތެރެއިންނެވެ.
ސިޓީގެ ބޭރުން ގޮވުންތަކުގެ އަޑުއިވެމުންދާ ކަމަށް އެ ނޫހުން ރިޕޯޓްކޮފައިވެއެވެ.
ޔަމަނުގެ ރައީސް އަބްދުރައްބޫ މަންސޫރު ހާދީ ނެރުއްވާފައިވާ ބަޔާނެއްގައި ބުނެފައިވަނީ ހަނގުރާމަވެރިން ފޮނުވާލުމަށް ސިޔާސީގޮތުން ކުރި ހުރިހާ މަސައްކަތެއް ނާކާމިޔާބު ވެފައިވާކަމަށެވެ.
ޔަމަނުގެ ދާޚިލީ ހަނގުރާމައިގައި މި ވޭތުވެދިޔަ ތިން އަހަރުގެ ތެރޭގައި 10،000 އަށް ވުރެ ގިނަ މީހުން މަރުވެފައިވާއިރު އދން ބުނެފައިވަނީ މިއީ ދުނިޔެއަށް މިހާރު ކުރިމަތިވެފައިވާ އެންމެ ބޮޑު އިންސާނީ ކާރިސާ ކަމަށެވެ.
