އައިޖީއެމްއެޗްގެ އިންޓަރންޝިޕްގެ ދެވަނަ ބުރު ފަށަނީ

އައިޖީއެމްއެޗްގެ އިންޓަރންޝިޕް ޕްރޮގްރާމްގެ ދެވަނަ އިންޓޭކްގައި ބައިވެރިވުމުގެ ފުރުސަތު ހުޅުވާލައިފިއެވެ.

އައިޖީއެމްއެޗުން ބުނީ މެޑިކަލް އިންޓަރންޝިޕްގެ ފުރުސަތު ހުޅުވާލާފައިވާ އިރު 12 ޖޫން އިން ފެށިގެން 03 ޖުލައި ގެ ނިޔަލަށް އެޕްލިކޭޝަން ހުށަހެޅުމުގެ ފުރުސަތު ހުޅުވާލާފައިވާ ކަމަށެވެ. މި ފުރުސަތުގެ ތެރެއިން ފަސް މީހަކަށް ޖާގަ ލިބިގެންދާނެ ކަމަށް އައިޖީއެމްއެޗުން ބުނެއެވެ.

Advertisement

މި އިންޓަރންޝިޕް ޕްރޮގްރާމުގައި ބައިވެރިވެވެނީ އެމްބީބީއެސް ފުރިހަމަކޮށް މޯލްޑިވްސް މެޑިކަލް އެންޑް ޑެންޓަލް ކައުންސިލް އިން ދޫކުރައްވާ "ޕްރޮވިޝަނަލް ރެޖިސްޓްރޭޝަން ފޮރ އިންޓާރންޝިޕް" ސެޓްފިކެޓް ލިބިފައިވާ ފަރާތްތަކަށް ކަމަށް އައިޖީއެމްއެޗް އިން ބުނެއެވެ.

މެޑިކަލް އިންޓަރންޝިޕަށް އެދޭ ފަރާތްތަކުން އީ-މެއިލް ކުރެއްވުމުން އެޕްލިކޭޝަން ފޯމް ހުށަހެޅޭ އިރު ރަސްމީ ބަންދު ނޫން ކޮންމެ ދުވަހެއްގެ ހެނދުނު 09:00 އިން 12:00 އަށް މެޑިކަލް އިންޓަރންޝިޕް އޮފީހުން އެޕްލިކޭޝަން ފޯމް ލިބެން ހުންނާނެ ކަމަށް ވެސް އައިޖީއެމްއެޗުން ބުނެއެވެ.

އިންޓަރންޝިޕަށް ކުދިން ހޮވުމުގައި ފޯމު ހުށަހަޅާފައިވާ ތަރުތީބަށް ބެލޭނެ ކަމަށް ވެސް އެ ހޮސްޕިޓަލުން ބުނެއެވެ.

އައިޖީއެމްއެޗްގެ މެޑިކަލް އިންޓަރންޝިޕަށް ކުރިމަތިލުމަށް ހުޅުވާލާފައިވާ އިރު މިއަހަރުގެ ޖެނުއަރީ މަހު ވެސް އިންޓަރންޝިޕަށް ފުރުސަތު ހުޅުވާލިއެވެ. އެ ފުރުސަތުގެ ދަށުން ހަ ފަރާތަކަށް ފުރުސަތު ދެވިގެންދިޔައެވެ.

ޑޮކްޓަރުކަން ކިޔަވާ ފަރާތްތަކުން ޑޮކްޓަރަކަށް ވުމަށްޓަކައި އެމްބީބީއެސް ކިޔެވުމަށް ފަހު އެއް އަހަރުގެ ޓްރެއިނިންއެއް ހަދަންޖެހެއެވެ.

އޭރު އިންޓަރންޝިޕް ހަދަންފެށި ހަ ފަރާތުގެ ތެރޭގައި ހިމެނެނީ ފަސް ދިވެހިންނާއި ރާއްޖެއިން ބޭރުގެ އެއް ފަރާތް ކަމަށެވެ. އޭގެ ތެރޭގައި ހިމެނެނީ ތިން އަންހެނުންނާއި ތިން ފިރިހެނުންނެވެ