ރައީސް މައުމޫނު ފަހަތަކަށް ނުޖެހޭނެ: ގުޅިފައިވާ ޕާޓީތައް
6 ޖޫން 2018 | ބުދަ 05:38ރައީސް މައުމޫން ޖަލުގައި އޮންނަވާތާން 120 ދުވަސް
ރައީސް މައުމޫނު ނޫސްވެރިންނައް މައުލޫމާތު ދެއްވަނީ - ފައިލް ފޮޓޯ
ކުރީގެ ރައީސް މައުމޫނު އަބްދުލްޤައްޔޫމް ހުކުމަކާ ނުލައި ޖަލަށް ލާފައިވާތާ އަންގާރަ ދުވަހަށް ހަތަރުމަސް ވެފައިވާއިރު ރައީސް މައުމޫނު ކުރައްވަމުން ގެންދަވާ އިސްލާހީ މަސައްކަތް ހުއްޓަވާނުލައްވާނެ ކަމަށާއި، ރައީސް މައުމޫނު އިސްލާހީ މަސައްކަތް ހުއްޓަވާލައްވާނެ ކަމަށް ދެކުމަކީ މޮޔަ ކަމެއް ކަމަށް އިދިކޮޅު ޕާޓީތަކުން ބުނެފިއެވެ
އިދިކޮޅު ފަރާތްތަކުން މިހެން ބުނީ މިދިޔަ ފެބްރުއަރީ 5 ވަނަ ދުވަހު ކުއްލި ހާލަތު އިއުލާނު ކުރުމަށް ފަހު އެރޭ މެންދަމު ރައީސް މައުމޫނު ހައްޔަރުކޮށްގެން ގެންގޮސް ޖަލަށް ލާފައިވާތާ 120 ދުވަސް ވުމާ ގުޅިގެން އެކަން ކުށްވެރިކޮށް އިދިކޮޅު ޕާޓީތަކުން ނެރުނު ނޫސްބަޔާނެއްގައެވެ.
ޕާޓީތަކުގެ ބަޔާނުގައި ބުނެފައި ވަނީ އެއްވެސް އަސާސެއް ނެތް ދޮގު ތުހުމަތުތަކެއްގެ މައްޗަށް ބިނާކޮށް ރައީސް މައުމޫނު "ޤާނޫނާ ޚިލާފަށް އަނިޔާވެރި ގޮތުގައި ހައްޔަރުކުރި" ދުވަހުން ފެށިގެން މިއަދަށް 120 ދުވަސް ހަމަވެގެން ދިޔައިރު ރައީސް މައުމޫންގެ ހަމައެކަނި ކުށަކީ ދިވެހި ޤައުމު ބިނާކުރުމުގެ މަސައްކަތުގައި ދެމިހުންނެވުމާއި އަދި ދިވެހި ރައްޔިތުންނަށް ޤާނޫނު އަސާސީން ކަށަވަރު ކޮށްދީފައިވާ އަސާސީ ޙައްޤުތައް ކަށަވަރުކޮށްދިނުމުގެ އިޞްލާޙީ މަސައްކަތުގައި އެމަނިކުފާނު ޢަމަލީ ގޮތުން ބައިވެރިވެވަޑައިގަތުން ކަމުގައެވެ.
ގުޅިފައިވާ ޕާޓީތަކުން ބުނީ ޕްރޮސެކިއުޓަރ ޖެނެރަލްގެ ފަރާތުން ރައީސް މައުމޫންގެ މައްޗަށް ދަޢުވާކުރަނީ 2013 ވަނަ އަހަރުން ފެށިގެން ދިވެހިރާއްޖޭގައި އުފެދިފައިވާ ސަރުކާރު ވައްޓާލަން މަސައްކަތް ކުރެއްވުމުގެ ދަޢުވާ ކަމަށާއި 2013 ވަނަ އަހަރު ރައީސް މައުމޫން ޢަބްދުލްޤައްޔޫމް ކުރެއްވީ ކޮން މަސައްކަތްތަކެއްތޯ ބަލާއިރު ފެންނަނީ، ވަރުބަލިކަމެއް ނެތި ދިވެހިރާއްޖޭގެ އެކިއެކި ރަށްރަށަށް ވަޑައިގެން މިހާރު ވެރިޔަކަށް ހުންނެވި ޢަބްދުﷲ ޔާމީނަށް ކެމްޕެއިން ކޮށްދެއްވި މަންޒަރުތައް ކަމަށެވެ. ތަފާތު އެކި ޕޯޑިއަމްތަކުގައި ވާހަކަފުޅު ދައްކަވައި ޕީޕީއެމްގެ ކެންޑިޑޭޓް ޢަބްދުﷲ ޔާމީނަށް ވޯޓު ދެއްވުމަށް ގޮވާލެއްވި އަޑުތައް ކަމަށާއި މިކަން މިގޮތަށް އޮތުމުން މީގެ މާނައަކީ، ޕްރޮސެކިއުޓަރ ޖެނެރަލްގެ ފަރާތުން ރައީސް މައުމޫން ޢަބްދުލްޤައްޔޫމްގެ މައްޗަށް ޓެރަރިޒަމްގެ ދަޢުވާ އުފުލާފައި މިވަނީ ޕީޕީއެމްގެ ކެންޑިޑޭޓް ޔާމީނަށް 2013 ވަނަ އަހަރުގެ ރިޔާސީ އިންތިޚާބު ކާމިޔާބުކޮށް ދެއްވުމަށް މަސައްކަތް ކުރެއްވުމުން ކަމަށެވެ. އަދި އެންމެ ބޮޑު ޓެރަރިޒަމްގެ ޢަމަލަކީ ވެސް އެއީ ކަމަށް އިދިކޮޅު ޕާޓީތަކުގެ ބަޔާނުގައި ވެއެވެ.
ރައީސް މައުމޫނުގެ މައްޗަށްކުރާ ދަޢުވާއަކީ އެއްވެސް އަސާސެއް ނެތް ދޮގު ދަޢުވާއެއްކަން ފާޅުކޮށް އެނގޭ ކަމަށާއި މުޅި ދަޢުވާގައި ދައްކާފައިވާ ހުރިހާ ވާހަކަތަކަކީ ވެސް ހަދަހަދައިގެން ދައްކާފައިވާ ޚިޔާލީ ވާހަކަތަކެއްކަން އޮޅުމެއް ނެތި ހާމަވާ ކަމަށް ވެސް ބަޔާނުގައި ވެއެވެ.
ސަރުކާރަށް އޮތް އެންމެ ބޮޑު ގޮންޖެހުމަކީ ދިވެހި ލޮބުވެތި ރައްޔިތުންގެ ތާއީދު އެއްވެސް މިންވަރަކަށް ހޯދިފައިނުވުން ކަމަށާއި އަދި ކުރިއަށް އޮތްތަނުގައި ވެސް އެ ތާއީދު ލިބިގެންދާނޭ އެއްވެސް މަގެއް ވެސް ނެތުން ކަމަށް ފާހަގަކޮށް އިދިކޮޅު ޕާޓީތަކުގެ ބަޔާނުގައި ބުނެފައި ވަނީ މި ޙަޤީޤަތް ފެނުމުން ކުރެވޭ ހަމައެކަނި ކަމަކީ މިހާރުގެ ސަރުކާރުގެ އަނިޔާވެރިކަމާއި، ކޮރަޕްޝަނާއި އަދި ފަސާދައިގެ ވާހަކަތައް ހާމަކުރާ ހަމަކޮންމެ މީހަކު ޖަލަށްލުން ކަމުގައެވެ.
"ރައްޔިތުންގެ ލޯތްބާއި ތާއީދު ލިބިފައިވާ 4 ލީޑަރުން ޖަލަށް ލުމުން، އެ 4 ލީޑަރުންނަށް ދިވެހި ލޮބުވެތި ރައްޔިތުން ކުރާ ތާއީދު މި ސަރުކާރަށް ލިބިގެންދާނެ ކަމަށް ދުށުމަށް ވުރެ މޮޔަކަމެއް އެއްވެސް މީހަކު ނުކުރާނެއެވެ. ރައީސް މައުމޫން ޢަބްދުލްޤައްޔޫމްގެ އިތުރުން، ރައީސް މުޙައްމަދު ނަޝީދު، ޖޭޕީގެ ލީޑަރ އޮނަރަބްލް ޤާސިމް އިބްރާހީމް އަދި އަދާލަތުޕާޓީގެ ރައީސް ޝެއިޚް އިމްރާން ޢަބްދުﷲ ޖަލަށްލުމުގެ ނަތީޖާއަކީ، ދެންނެވުނު 4 ލީޑަރުންނަށް ދިވެހި ރައްޔިތުން ކުރާ ތާއީދު ކުރިއަށް ވުރެވެސް އިތުރުވެގެން ދިޔުމެވެ. އަދި މި ސަރުކާރަށް ކުރާ ތާއީދު މުޅިންކަހަލަ ގޮތަކަށް ފުހެވިގެން ދިޔުމެވެ" އިދިކޮޅު ޕާޓީތަކުގެ ނޫސްބަޔާނުގައި ވެއެވެ.
ޙުކުމެއް ނެތި 120 ދުވަސް ވަންދެން ބަންދުގައި ބެހެއްޓުމަކުން ރައީސް މައުމޫން ޢަބްދުލްޤައްޔޫމްގެ އަޒުމަކަށް ކުޑަވެސް ގުޑުމެއް ނާންނަ ކަމަށާއި އިދިކޮޅު އަނެއް ތިން ލީޑަރުންނާ އެކު ފެއްޓެވި މަސައްކަތުގައި އެންމެ ފިޔަވަޅެއް ވެސް ފަހަތަށް ޖެހިވަޑައެއް ނުގަންނަވާނެ ކަމަށް ވެސް ބަޔާނުގައި ވެއެވެ.
މީގެ އިތުރުން ރައީސް މައުމޫން ބަންދުގައި ބަހައްޓައިގެން ރިޔާސީ އިންތިޚާބު ކާމިޔާބުވެދާނެ ކަމަށް ދުށުމަކީ ކުށް ހީއެއް ކަމަށާއި އިޞްލާޙީ މަސައްކަތްތައް ހުއްޓުވާލެވިދާނެ ކަމަށް ދުށުމަކީ މޮޔަކަމެއް ކަމަށް ވެސް އެ ބަޔާނުގައި ވެއެވެ.
އެ ބަޔާނުގައި ބުނެފައި ވަނީ އަނިޔާވެރިކަމާއި، ފަސާދަ އާއި ކޮރަޕްޝަނުން ރައްޔިތުންގެ ތާއީދާއި ލޯބި ލިބިދާނެ ކަމަށް ދުށުމަކީ ވެސް ސިޔާސީ ގޮތުން ކުފޫ ހަމަނުވާކަން އަންގައިދޭ ކަމެއް ކަމަށާއި މާތް ﷲ ގެ ވާގިފުޅާއެކު، އަނެއް 3 ލީޑަރުންނާއެކު ރައީސްމައުމޫން ފެއްޓެވި މި މަސައްކަތްތައް ނިންމާލައްވާނީ ދިވެހި ރައްޔިތުންނަށް ކާމިޔާބު ހޯއްދަވާ ދެއްވުމަށްފަހުކަމަށާއި ރައީސް މައުމޫނާއި ސިޔާސީ ގޮތުން ހައްޔަރުކޮށްފައިވާ ހުރިހާ ބޭފުޅުން މިހާރުން މިހާރަށް ދޫކޮށްލުމަށް ގޮވާލާ ކަމުގައެވެ.
