އިންޑިއާގެ ކެެރެލާ ސްޓޭޓު އޮތީ "އެލާޓް" ގައި ކަމަށާއި ކަމާބެހޭ ފަރާތްތަކުން ދަނީ "މީހުންގެ ފުރާނަތައް ނުގެއްލޭނެ ގޮތަށް ކުރެވޭނެހާ ކަމެއް ކުރަމުން" ކަމަށް ކެރެލާގެ ހެލްތް މިނިސްޓަރު ވިދާޅުވެއްޖެއެވެ.
ކެރެލާގެ ހެލްތު މިނިސްޓަރު ކޭކޭ ޝައިލަޖާ އަލްޖަޒީރާ އަށް މިމޭރުމުން އިންޓަވިއު ދެއްވިއިރު، 18 މީހަކު ވަނީ ނިޕާ ވައިރަސް އަށް ޕޮޒިޓިވްވެފައެވެ. އަދި އޭގެތެރެއިން 17 މީހަކު ވަނީ މަރުވެފައެވެ.
ނިޕާ ވައިރަސް ފެތުރުމުގެ ސަބަބުން 2379 މީހަކު ވަނީ ކެރެލާގެ ގޭތަކުގައި ކަރަންޓީން ކޮށްފައެވެ. އަދި ކެރެލާގެ މަލާބާރް ސަރަހައްދުގައި 2000 އަށް ވުރެ ގިނަ މީހުން ތިބީ މެޑިކަލް އޮބްޒަވޭޝަނުގައެވެ.
ކެެރެލާގެ ޑައިރެކްޓާ އޮފް ހެލްތު ސާރވިސަސް އާރްއެލް ސަރިތާ ހޯމަ ދުވަހު ވިދާޅުވީ ޖޫން 1 ކުން ފެށިގެން ނިޕާ ވައިރަސްގެ އާ ކޭސްތަކެއް ރިޕޯޓުކޮށްފައި ނުވާ ކަމަށެވެ.
އިންޑިއާގެ ކެރެލާ ސްޓޭޓުގައި މިހާރު ފެތުރެމުންދާ ނިޕާ ވައިރަސް ފެތުރޭ މިންވަރު މިހާރު ހުރީ ކަންބޮޑުވާ ދަރަޖައެއްގައި ނޫން ކަމަށާއި މިހާރު ނިޕާ ވައިރަސްގެ އާ ކޭސްތަކެއް ރިޕޯޓު ކުރެވެމުން ނުދާ ކަމަށް އާދީއްތަ ދުވަހުވެސް އޮފިޝަލުން ވަނީ ބުނެފައެވެ. އާދީއްތަ ދުވަހު ކަމާބެހޭ އޮފިޝަލުން ބޭއްވި މަތީ ފެންވަރުގެ ރިވިއު މީޓިންއެއްގައި އޮފިޝަލުން މިކަން ހާމަކުރެއްވިއިރު، އާދީއްތަ ދުވަހުގެ ބައްދަލުވުން ޗެއާ ކުރެއްވީ ޗީފް މިނިސްޓަރު ޕިނަރާއި ވިޖަޔަން އެވެ.
އާންމުކޮށް ނިޕާ ވައިރަސް ޖެހެނީ ވާލުގެ ޒަރިއްޔާ އިން ކަމަށް ވެއެވެ. ގައިންގަޔަށް އަރާ މިބަލި އިންޑިއާގައި މިފަހަރު ފުރަތަމައަށް ޖެހުނު މީހުންނަކީ ވާ ދަތް ޖަހާފައިވާ އަނބާއި އެހެނިހެން މޭވާ ކެއުމުގެ ސަބަބުން ވައިރަހުގެ އަސަރު ކުރި މީހުން ކަމަށް ވަނީ ލަފާކޮށްފައެވެ.
މި ބައްޔަކީ ގައިން ގަޔަށް އަރާ ބައްޔެކެވެ. ހަށިގަނޑުގައި ހިއްލާ ދަލާއި، ކުޅުވެސް ހިމެނޭ ގޮތަށް، ބަލި ޖެހިފައިވާ މީހުންގެ ހަށިގަނޑުގައި އުފެދޭ ދިޔަ އަނެކާގެ ގައިގައި ހޭކުމުގެ ސަބަބުން މި ބަލި ފެތުރެއެވެ.
މީގެ އިތުރުން ވާ ކައިފައި، ނުވަތަ ކޮށާފައި ހުންނަ މޭވާ ކެއުމާއި، ބަލި ޖެހިފައިވާ ޖަނަވާރުގެ މަސް ރަނގަޅަށް ނުކައްކައި ކެއުމަކީ ވެސް މި ބަލި ފެތުރިދާނެ ގޮތެކެވެ. މި ވައިރަސް އުފުލާ ވާ އުޅޭ ރުކުގެ ރުކުރާ ބުއިމުން ވެސް މި ބަލި ޖެހުމުގެ ފުރުސަތު އޮވެއެވެ.
ނޭވާލާ ނިޒާމުގެ ބަލިތަކުން ފެށިގެން ސިކުނޑި ދުޅަވުން ފަދަ ކަންކަމާއި ހަމައަށް އިންސާނާއަށް އެކި ގެއްލުންތައް ކުރިމަތި ކުރުވާ މި ބައްޔަކީ އިންސާނުންގެ އިތުރުން ޖަނަވާރުންނަށް ވެސް ޖެހޭ ބައްޔެކެވެ.
