ބްރެޒިލްގެ ރިއޯ ޑި ޖެނޭރޯ ސްޓޭޓްގެ މަގުތަކަށް 10،000 ސިފައިން ނެރެނީ
މަގުތަކަށް ސިފައިން ނެެރެނީ ކުށްތައް އިތުރުވަމުން ދާތީ
ސިފައިން ރިއޯގެ މަގުތަަކަށް ނެރުނީ ކުށްތައް އިތުރުވަމުން ދާތީ
ރާވައިގެން ކުރާ ބޮޑެތި ކުށްތަކާ ދެކޮޅަށް މަސައްކަތް ކުރުމަށްޓަކައި ބްރެޒިލްގެ ސްޓޭޓެއްް ކަމަށްވާ ރިއޯ ޑި ޖެނޭރޯ ގެ މަގުތަކަށް 10,000 ސިފައިން ނެރުމުގެ މަސައްކަތް ފަށައިފިއެވެ.
މިގޮތުން ރިއޯ ޑި ޖެނޭރޯ ގެ މަގުތަކަށް ވަނީ ހުކުރު ދުވަހު 8,500 ސިފައިން ނެރެފައެވެ. ރިޕޯޓުތައް ބުނާ ގޮތުން އެ ސިފައިންނަށް އެހީވުމަށް ފުލުހުންނާއި އަދި ޕެޓްރޯލް އޮފިސަރުން ވެސް ބައިވެރިވާނެއެވެ.
ގާތްގަނޑަކަށް މީގެ އަހަރެއްހާ ދުވަސްކުރިން ރިއޯ ޑި ޖެނޭރޯ ގައި އޮލިމްޕިކްސް ކުޅިވަރު މުބާރާތް ނިމުނު ފަހުން ހަމަނުޖެހުންތައް ވަނީ އިތުރުވާން ފަށާފައެވެ. މިއަހަރުގެ މިހާތަނަށް އެ ސްޓޭޓުގައި ހިނގި ހަމަނުޖެހުންތަކުގައި ވަނީ 90 ފުލުހުން މަރުވެފައެވެ.
ބްރެޒިލްގެ ޑިފެންސް މިނިސްޓަރު ވިދާޅުވީ ރިއޯ ޑި ޖެނޭރޯ ސްޓޭޓުގެ މަގުތަކަށް ނެރުނު ސިފައިން އިންޓެލިޖެންސް އޮޕަރޭޝަންސްތައް ހިންގާނެ ކަމަށާއި, ޑްރަގް ޓްރެފިކިން އަދި އެހެނިހެންވެސް ކުށްތަކާއި ދެކޮޅަށް އޮޕަރޭޝަންސްތައް ހިންގާނެ ކަމަށެވެ.
ބްރެޒިލްގެ ރައީސް މިޝެލް ޓެމާ ނެރުއްވި ގަރާރަކުން ސިފައިންނަށް ރިއޯ ޑި ޖެނޭރޯ ސްޓޭޓުގައި މިއަހަރު ނިމެންދެން ހަރަކާތްތެރި ވެވޭނެއެވެ.
