ރަހީން ސްޓޭޓްގައި މިޔަންމާ ސިފައިން ހިންގި އޮޕަރޭޝަން ނިންމާލައިފި

މިޔަންމާގައި ރޮހިންޔާ މުސްލިމުން ދިރިއުޅެމުންދާ ރަހީން ސްޓޭޓުގައި މިޔަންމާ ސިފައިން ހިންގި އޮޕަރޭޝަން ނިންމާލައި ފައިބައިފިއެވެ.

ރަހީން ސްޓޭޓްގައި ހިންގަމުންދިޔަ އޮޕަރޭޝަން މިޔަންމާ ސިފައިން ހުއްޓާލި ކަމަށް ބުދަ ދުވަހު ސީނިއާ އޮފިޝަލަކު ކަށަވަރުކޮށްދީފައިވާއިރު، މިޔަންމާ ސިފައިން ރަހީން ސްޓޭޓްގައި ހަތަރު މަސްވަންދެން ހިންގި އަމަލުތަކަކީ އިންސާނިއްޔަތާ ދެކޮޅަށް ހިންގާފައިވާ ޖަރީމާތަކަކަށް ވުން އެކަށީގެންވާ ކަމަށް އދ. އިން ވަނީ ބުނެފައެވެ.

މިޔަންމާ ސިފައިން ހިންގި އޮޕަރޭޝަނުގައި އެއްވެސް ގޮތެއް ފޮތެއް ނުބަލައި މުސްލިމުން މަރައި، ބޮޑެތި ޖިސްމާނީ އަނިޔާތައްކޮށް، އަންހެނުންގެ އިއްފަތް ފޭރި އަދި މުސްލިމުންގެ އަވަށްތަކުގައި ރޯކުރި ރޯކުރުމުގެ ސަބަބުން ގިނަ ބައެއްގެ ފާޑުކިޔުން ވަނީ އަމާޒުވެފައެވެ.

މިޔަންމާގެ ސަރުކާރުން ބުނެފައިވަނީ މިޔަންމާގެ ސިފައިން ރަހީން ސްޓޭޓް އިން ފޭބިއަސް ރަހީން ސްޓޭޓުގެ ކަންކަން ބެލެހެއްޓުމުގައި ފުލުހުން ހަރަކާތްތެރިވާނެ ކަމަށެވެ.

މިޔަންމާ ސިފައިން ރަހީން ސްޓޭޓުގައި ހިންގި އަނިޔާވެރި އަމަލުތަށް މިޔަންމާ ސަރުކާރުން ގެންދަނީ އަބަދުވެސް ދޮގު ކުރަމުންނެވެ.