ރައީސް މައުމޫނަށް ވަކީލުން އައްޔަން ކުރަން ފުރުސަތު ދިން ގޮތާއި އަޑުއެހުންދާ ގޮތުން ބޮޑެތި ޝަކުވާތަކެއް
ވަކީލުން އައްޔަން ކުރުމަށް ދިނީ ކުޑަ ވަގުތު ކޮޅެއް
ކުރީގެ ރައީސް މައުމޫނުގެ އަބްދުލް ގައްޔޫމު
ކުރީގެ ރައީސް މައުމޫނުގެ އަބްދުލް ގައްޔޫމުގެ މައްޗަށް އުފުލާފައިވާ އަދުލު އިންސާފު ގާއިމު ކުރުމަށް ހުރަސްއެޅުމުގެ ކުށުގެ ދައުވާގެ މައްސަލައިން އެމަނިކުފާނުގެ ގާނޫނީ ވަކީލުން ވަކިވެވަޑައިގެންނެވުމުން އަލުން ވަކީލުން އައްޔަން ކުރައްވަން ދެއްވި ވަގުތާ ޝަރީއަތް ކުރިއަށް ގެންދާ ގޮތާމެދު ރައީސް މައުމޫނު ބޮޑެތި ކަންބޮޑުވުންތަކެއް ފާހަގަ ކުރައްވައިފި އެވެ.
އުއްތަމަ ފަނޑިޔާރު އަބްދުﷲ ސައީދާއި ސުޕްރީމް ކޯޓުގެ ފަނޑިޔާރު އަލީ ހަމީދާއި ރައީސް މައުމޫނުގެ މައްޗަށް އުފުލާފައިވާ ދައުވާއާ ގުޅިގެން ޝަރީއަތުގެ ފުރަތަމަ އަޑުއެހުން ބޭއްވުމަށް ހަމަ ޖައްސާފައި އޮތީ އަންގާރަ ދުވަހުގެ ރޭ 21.30ގަ އެވެ. އެހެން ނަމަވެސް ޝަރީއަތް ފެށުމުގެ ކުރިން މި މައްސަލައިން ރައީސް މައުމޫނުގެ ގާނޫނީ ވަކީލު މައުމޫނު ހަމީދާއި އިބްރާހިމް ޝަމީލާއި މުހައްމަދު ފައިސަލް ތަނާޒުލު ވެފައިވާ ކަން ކޯޓަށް ވަނީ އަންގާފަ އެވެ. ގާނޫނީ ވަކީލެއް ނެތި ޝަރީއަތުގެ އަޑުއެހުމުގައި އިންނަވައި ރައީސް މައުމޫނު ވިދާޅުވީ އެމަނިކުފާނުގެ ވަކީލުން މައްސަލައިން ތަނާޒުލުވީ މި ޝަރީއަތްތައް ހިންގަމުންދަނީ ގާނޫނު އަސާސީއާ ގާނޫނުތަކާއި ހިލާފަށް ކަމަށްވާތީ ކަމަށެވެ. މި ޝަރީއަތް ހިންގަމުންދަނީ ވަކި މީހެއްގެ ނުފޫޒުން ކަމަށާއި އެމަނިކުފާނުގެ ހައްގަށް ބެލުމެއް ނެތި ކަމަށް ވެސް ރައީސް މައުމޫނު ވިދާޅުވި އެވެ.
މި މައްސަލައަށް އެހެން ވަކީލަކު އައްޔަން ކުރުމަށްޓަކައި، ގާނޫނުގައި ދެވޭނެ އެންމެ ދިގު މުއްދަތު ދިނުމަށް ރައީސް މައުމޫނު އެދިވަޑައިގެންނެވުމުން މައްސަލަ ބައްލަވަން އިންނެވި ގާޒީ ހަސަން ނަޖީބު ވިދާޅުވީ ވަކީލުން ތަނާޒުލުވިކަން އަންގަވައި ސިޓީ ފޮނުއްވީ ނުރަސްމީ ގަޑިއެއްގައި ކަމަށެވެ. އެހެން ނަމަވެސް ތަނާޒުލުވުން ގަބޫލު ކޮށްފިކަމަށާއި ދެން މި މައްސަލައިގައި އެ ވަކީލުން ބަލައި ނުގަންނާނެ ކަމަށްވެސް ގާޒީ ވިދާޅުވި އެވެ.
ޝަރީއަތް ކުރިއަށް ދާއިރުވެސް މައުމޫނަށް ވަކީލަކު އައްޔަން ކުރަން ފުރުސަތު އޮންނާނެ ކަމަށް ވިދާޅުވެ ޝަރީއަތުގެ އަޑުއެހުން ކުރިއަށް ގެންދަވާތީ މައުމޫނު ވަނީ އެކަމާ ހިތްހަމަ ނުޖެހުން ފާޅުކުރައްވައި ވާހަކަ ދައްކަވާފަ އެވެ. އެހެން ނަމަވެސް ގާޒީ ތަކުރާރުކޮށް ވިދާޅުވީ ޝަރީއަތް ކުރިއަށްދާއިރު ވަކީލަކު އައްޔަން ކުރުމަށް ފުރުސަތު އެބަ އޮތް ކަމަށާއި އަދި ދެން އޮންނަ އަޑުއެހުމަކަށް ވެސް ވަކީލުން އައްޔަން ކުރެއްވޭނެ ކަމަށެވެ. އެހެން ނަމަވެސް ރައީސް މައުމޫނު ވިދާޅުވީ އެންމެ މިނެޓެއް ވެސް ގާނޫނީ ވަކީލެއްގެ އެހީތެރިކަން ނުލިބޭ ގޮތައް ކުރިއަށް ގެންދިއުމަކީ ގާނޫނާ ހިލާފު ކަމެއް ކަމަށެވެ.
ގާޒީގެ ނިންމެވުމަށް އެއްވެސް ބަދަލެއް ނުގެންނެވިއިރު ގާނޫނީ ވަކީލަކު އައްޔަން ކުރުމަށް ފުރުސަތު ދިނުމަށް ޝަރީއަތް މެދުކަނޑާލުމަށް ނުވަތަ ފަސް ކުރުމަށް އިއުތިރާޒް ނުކުރައްވާ ދައުވާ ކުރާ ދައުލަތުގެ ވަކީލުން ވެސް ވިދާޅުވި އެވެ. އެހެން ނަމަވެސް ޝަރީއަތް ކުރިއަށް ގެންދަވާތީ ރައީސް މައުމޫނު ވަނީ ގާނޫނީ ވަކީލެއްގެ ހައްގު ދިނުމަށް ދައުލަތުން ވެސް އިއުތިރާޒު ނުކުރާ ކަމަށް ވިދާޅުވުމުން ވެސް ޝަރީއަތުގެ އަޑުއެހުން ކުރިއަށް ގެންދަވާތީ އެކަން ފާހަގަ ކުރައްވާފަ އެވެ. ރައްދުގައި ގާޒީ ވިދާޅުވީ މައްސަލަ ބަލަނީ ދައުލަތުން ނޫން ކަމަށާއި ގާޒީ ކަމަށެވެ. އެހެން ވިދާޅުވުމުން މައުމޫނު ވިދާޅުވީ އެހެން ނަމަވެސް މައްސަލައިގައި ދެ ހަސްމުން އެއް ގޮތަކަށް އެދޭ ނަމަ އެކަމެއް ކުރައްވަން ވާނީ އެގޮތަކަށް ކަމަށާއި އިސްލާމީ އަދި ގާނޫނީ އުސޫލަކީ ވެސް އެއީ ކަމަށެވެ.
ރައީސް މައުމޫނު ވަކީލަކު އައްޔަން ކުރެއްވުމަށް ގާނޫނުގައި ބުނާ އެންމެ ދިގު މުއްދަތު ދެއްވުމަށް އެދިވަޑައިގެންނެވުމުން ގާޒީ ވިދާޅުވީ ޖެހިގެން އަންނަ ދުވަހުގެ މެންދުރު ފަހު 13.30ގެ ކުރިން ވަކީލުން އައްޔަން ކުރެއްވުމަށްފަހު ކޯޓަށް އަންގަންވަން ވާނެ ކަމަށެވެ. އެހެން ކަމުން އެމަނިކުފާނަށް ރަސްމީ ގަޑީގެ ތެރެއިން ވަކީލުން އައްޔަން ކުރުމަށް ލިބިވަޑައިގެންނަވާނީ ދެތިން ގަޑިއިރެވެ. އެއީ ގާނޫނީ ވަކީލަކު އައްޔަން ކުރުމަށް އެކަށީގެންވާ ވަގުތެއް ނޫން ކަމަށް ރައީސް މައުމޫނު ފާހަގަ ކުރައްވައި އެއަށް ވުރެ ދިގު މުއްދަތެއް ދެއްވުމަށް ތަކުރާރުކޮށް އެދިވަޑައިގެންނެނަމަވެސް ގާޒީގެ އެ ނިންމުމަށް ބަދަލެއް ނުގެންނެވި އެވެ.
މިއަޑުއެހުމުގައި އުއްތަމަ ފަނޑިޔާރާއި އަލީ ހަމީދަށް ދިފާއު ހުށަހެޅުމަށާއި ހެކި ހުށަހެޅުމަށް ފުރުސަތު ދިންއިރު ވަކީލެއް ނެތި އިންނެވި ރައީސް މައުމޫނު ވެސް ހެކި ހުށަހެޅުމަށް ގާޒީ އެންގެވި އެވެ. ނަމަވެސް މައުމޫނު ވިދާޅުވީ ހެއްކާ ބެހޭ ހުރިހާ ލިޔުންތަކާއި އެ މައުލޫމާތު ހުންނާނީ އެމަނިކުފާނުގެ ކުރީގެ ވަކީލުންގެ އަތުގައި ކަމަށެވެ. އެހެން ކަމުން މި އަޑުއެހުމުގައި ހެކި ހުށަނޭޅުއްވޭނެ ކަމަށް ވިދާޅުވުމުން ގާޒީ ވިދާޅުވީ ބުދަ ދުވަހުގެ މެންދުރު ފަހު 14.00 ގައި ކުރިން ލިޔުމުން ހެކި ހުށައެޅިދާނެ ކަމަށެވެ. ނަމަވެސް ރައީސް މައުމޫނު ވަނީ އެމަނިކުފާނަކީ ބަންދުގައި ހުންނަވާ ބޭފުޅަކަށްވާތީ އާއި ވަކީލުން ނެތުމުން އެއީ އެކަން ކުރެވޭނެ ހާ ވަގުތުކޮޅެއް ނޫން ކަމަށް ވިދާޅުވެފަ އެވެ. ނަމަވެސް ގާޒީގެ އެ ނިންމުމަށް ބަދަލެއް ނުގެންނެވި އެވެ. އެހެން ކަމުން ރައީސް މައުމޫނަށް ހެކި ހުށަޅުމަށް ލިބިވަޑައިގަންނަވާނީ ރަސްމީ ގަޑީގެ ތެރެއިން ހަތަރު ގަޑިއިރެއްހާއިރެވެ.
ރައީސް މައުމޫނާމެދު މި ގޮތައް އަމަލު ކުރެއްވުން ދިޔައިރު އުއްތަމަ ފަނޑިޔާރާއި ފަނޑިޔާރު އަލީ ހަމީދުގެ ގާނޫނީ ވަކީލުންގެ ވަނީ ރައީސް މައޫމޫނުގެ ދިފާއީ ވަކީލުންނަށް ފުރުސަތު ނުދީ ޝަރީއަތް ކުރިއަށް ގެންދަވާތީ ގާނޫނީ މައްސަލަތައް ފާހަގަ ކުރައްވާފަ އެވެ. އަދި ރައީސް މައުމޫނުގެ ވަކީލަކު ނެތި މި ޝަރީއަތުގެ އަޑުއެހުން ކުރިއަށް ގެންދަވަނީތޯ ސާފުކުރުމުން ގާޒީ ވަނީ ޝަރީއަތް ކުރިގެންދަނީ ރައީސް މައުމޫނުވެސް ހިމަނައިގެން ކަމަށް ވިދާޅުވެފަ އެވެ.
ރައީސް މައުމޫނުގެ މައްޗަށް ޓެރަރިޒަމްގެ ދައުވާއެއް ވެސް ކްރިމިނަލް ކޯޓުގައި ހިނގަމުންދާއިރު މިއީ ކޯޓުގައި ހިނގަމުންދާ މައްސަލައަކާ މެދު އެހާ ފާޅުކަން ބޮޑު ގޮތެއްގައި ޝަރީއަތުގެ މަޖިލީހުގައި ރައީސް މައުމޫނު ފާޑު ވިދާޅުވި ފުރަތަމަ ފަހަރެވެ.
