އަރިދަފުސް ރޯގާ އާއި އިންފްލުއެންޒާ ޖެހިގެން މިދިޔަ ހަފްތާގައި 6000 މީހުންނަށް ވުރެ ގިނައިން ރިޕޯޓްކޮށްފައިވޭ: އެޗްޕީއޭ
އަރިދަފުސް ރޯގާ އާއި އިންފްލުއެންޒާ ޖެހިގެން މިދިޔަ ހަފްތާގައި 6669 މީހުން މިދިޔަ ހަފްތާގައި ރިޕޯޓްކޮށްފައިވޭ
ބަލި މީހަކަށް ފަރުވާދެނީ: ހުން ފެތުރޭ މިންވަރު އިތުރުވެފައި ވާތީ ސަމާލުވުުމަށް އިލްތިމާސްކޮށްފައިވޭ
އަރިދަފުސް ރޯގާ އާއި އިންފްލުއެންޒާ ޖެހިގެން މިދިޔަ ހަފްތާގައި 6669 މީހުން މިދިޔަ ހަފްތާގައި ރިޕޯޓްކޮށްފައިވާ ކަމަށް ހެލްތް ޕްރޮޓެކްޝަން އެޖެންސީ އިން ބުނެފިއެވެ.
އަރިދަފުސް ރޯގާ އާއި ޑެންގީގެ އެންމެ ފަހުގެ މައުލޫމާތު ފޯރުކޮށްދިނުމަށް އެ އެޖެންސީން ހޯމަ ދުވަހު ނެރުނު ބަޔާނުގައިވަނީ މެއި މަހުގެ ތެރޭގައި ފެތުރުނު ރޯގާގައި އެންމެ ގިނައިން ރިޕޯޓްކޮށްފައިވާ ހަފްތާގައި މުޅިއަކު 14,300 މީހުން ރިޕޯޓްކޮށްފައިވާ ކަމަށެވެ. އަދި އިންފްލުއެންޒާ އަށް ޓެސްޓް ކުރުމަށް ސާމްޕަލް ނެގި މީހުންގެ ނިސްބަތަށް ބަލާއިރު 69 އިންސައްތަ މީހުން އިންފްލުއެންޒާ A އަށް ޕޮޒިޓިވްވެފައިވާ ކަމަށާއި ތަފާސް ހިސާބުތަކަށް ބަލާއިރު މިދުވަސްވަރު ގިނައިން ފެންނަމުންދަނީ އިންފްލުއެންޒާ A ގެ ވައްތަރެއް ކަމުގައިވާ H3N2 ކަމުގައި ވެސް ބަޔާނުގައިވެއެވެ. އަދި ވޭތުވެދިޔަ ހަފްތާގައި އިންފްލުއެންޒާ ޖެހުނު އުމުރުން ދުވަސްވީ ބަލި މީހަކު ވަނީ މަރުވެފައެވެ.
ޑެންގީ ހުމުގެ ހާލަތަށް ބަލާއިރު ވޭތުވެދިޔަ ދެ ހަފްތާ ތެރޭގައި ޑެންގީ ޖެހިގެން ރިޕޯޓްކޮށްފައިވާ މީހުންގެ އަދަދު ދަށްވެފައިވާއިރު ވޭތުދިޔަ ހަފްތާގައި ޑެންގީ ބަލި ޖެހިގެން 96 މީހުން ވަނީ ރިޕޯޓްކޮށްފައެވެ.
މީގެ އިތުރުން ބަލި ކޮންޓްރޯލް ކުރުމަށްޓަކައި އެޗްފީއޭގެ ފަރާތުން ފަރުވާ ކުރުމާ ބެހޭ އުސޫލުތައް ހުރިހާ ސިއްހީ ހިދުމަތްދޭ ތަންތަނަށް ހިއްސާކޮށް، ބޭހާއި ޓެސްޓް ކުރުމަށް ބޭނުންވާ ތަކެތި ހުރިހާ ސިއްހީ ހިދުމަތްދޭ ތަންތަނުގައި ހުރިކަން ކަށަވަރު ކުރުމުގެ އިތުރުން އާންމުން ހޭލުންތެރިކުރުމުގެ ގޮތުން ކަމާބެހޭ މައުލޫމާތު މީޑިއާ މެދުވެރިކޮށް ހިއްސާ ކުރަމުންދާ ކަމަށް ވެސް ބަޔާނުގައިވެއެވެ. އަދި ދިވެހި ރެޑް ކްރެސެންޓްގެ އެހީގައި ރާއްޖޭގައި ދިރިއުޅޭ ބިދޭސީންނަށް ރާއްކާތެރިވުމުގެ މައުލޫމާތު ވެސް އެޗްޕީއޭ އިން ދަނީ ހިއްސާ ކުރަމުންނެވެ.
ހެލްތް ޕްރޮޓެކްޝަން އޭޖެންސީން ވަނީ އާންމު މައުލޫމާތުގެ ގޮތުގައި ހިއްސާކުރަމުން އަންނަ ރައްކާތެރިވުމުގެ ފިޔަވަޅުތައް އެޅުން މުހިންމުކަން ފާހަގަކޮށްފައެވެ.
ރައްކާތެރިވުމުގެ ފިޔަވަޅުތަކަކީ:
- ރޯގާ ޖެހިގެން އުޅޭ ނަމަ ކެއްސާ، ކިނބިހި އަޅާއިރު ރުމާ ނުވަތަ ޓިޝޫފަދަ އެއްޗަކުން އަނގަމަތި ފޮރުވުން. އަދި އަނގަމަތި ފޮރުވަން ބޭނުން ކުރާ ތަކެތި ހާމައަށް ނުބެހެއްޓުން
- އާންމު ސާފުތާހިރުކަމަށް، ޚާއްސަކޮށް ސައިބޯނި ލައިގެން އަތްދޮވުން ފަދަ ކަންކަމަށް ސަމާލުކަން ދިނުން
- ބަލިނަމަ މީހުން އެއްވެ އުޅޭތަންތަނަށް ނުދިއުން
- ބަލިނަމަ ކުޑަކުދިންނާ ދުރުގައި ހުރުން
- ދުންފަތުގެ އިސްތިއުމާލް ކުޑަކުދިން ކައިރީ، އެ ކުދިން ތިބޭ ތަންތަނުގައި ނުކުރުން
- ބަލި ޖެހުމުން، ނުރައްކާ ފުރުސަތު ބޮޑުމީހުންގެ ތެރެއިން އުމުރުން 5 އަހަރުގެ ދަށު ކުދިން، މާބަނޑު މީހުން، އުމުރުން ދޮށީ މީހުންނާއި ދިގު މުއްދަތަކަށް ފަރުވާކުރާ ބަލިމީހުން އިންފުލުއެންޒާއިން ރައްކާތެރިވުމަށް ވެކްސިން ޖެހުން، އަދި ބައްޔެއް މިފަރާތްތަކަށް ޖެހިއްޖިއްޔާ ވީހާ ވެސް އަވަހަކަށް ޑޮކްޓަރަށް ދެއްކުން
- ބަލި މީހާ ޑޮކްޓަރަށް ދައްކަން ދާއިރު ވީހާވެސް މަދު މީހުން ދިއުމާއި ހޮސްޕިޓަލުގައި ބާއްވައިފައި އޮންނަ މީހަކަށް ޒިޔާރާތް ކުރަން ކޮންމެހެން ޖެހިއްޖެ ހާލަތެއްގައި މެނުވީ ކުޑަ ކުދިންނާއި އުމުރުން ދުވަސްވީ މީހުންނާއި މާބަނޑު މީހުން ނުދިއުން
ކޮންމެ އަހަރަކުވެސް މޭ މަހާއި އޯގަސްޓް މަހާއި ދެމެދު ރާއްޖޭގައި ޑެންގީ ފެތުރޭ މިންވަރު އިތުރުވެގެންދާއިރު، މި އަހަރު ވެސް އެ މުއްދަތުގައި ރާއްޖޭގެ އެކި ހިސާބުތަކުގައި އެ ބަލި ފެތުރޭ މިންވަރު އިތުރުވެގެންދާނެ ކަމަށް އެޗްޕީއޭއިން ވަނީ ލަފާކޮށްފައެވެ.
