ރައީސް މައުމޫން ބަންދުން ދޫކޮށްދިނުމަށް އެދުން: އާލާސްކަންފުޅާ ގުޅޭ އަޑުއެހުން ސިއްރުކޮށްފި
28 މެއި 2018 | ހޯމަ 14:21މައުމޫންގެ އާލާސްކަންފުޅާ ގުޅޭ ޒާތީ މައުލޫމާތުތަކެއް އަޑުއެހުމުގައި ވަނީ ހިއްސާކޮށްފައި
ރައީސް މައުމޫން ފުލުހުންގެ ލޯންޗުން ފައިބައިވަޑައިގަންނަނަވަނީ
ކުރީގެ ރައީސް މައުމޫން އަބްދުލްގައްޔޫމްގެ މައްޗަށް ދައުލަތުން އުފުލާފައިވާ ޓެރަރިޒަމްގެ ދައުވާގެ އަޑުއެހުމަށް ފަހު، އެ މަނިކުފާނު ބަންދުން ދޫކޮށްދިނުމަށް ނުވަތަ ގޭބަންދަށް ބަދަލުކޮށްދިނުމަށް އެދި ރައީސް މައުމޫންގެ އާލާސްކަންފުޅާ ގުޅޭ ޒާތީ މައުމޫމާތު އެ އަޑުއެހުމުގައި އެމަނިކުފާނުގެ ގާނޫނީ ވަކީލުން ހިއްސާކުރުމުގެ ފުރުސަތަށް އެދެފިއެވެ.
ރައީސް މައުމޫންގެ އާލާސްކަންފުޅާ ގުޅޭ ގިނަ ކަންތައްތަކެއް، ޑޮކްޓަރުން ދެއްވާފައިވާ އިރުޝާދުތަކަށް ރިއާޔަތްކޮށް އެ އަޑުއެހުމުގައި އިއްވާފައި ވެއެވެ. ގާނޫނީ ވަކީލުންނާއި އާއިލާ އިން ބުނެފައިވާ ގޮތުގައި އެމަނިކުފާނަށް ކުރިމަތިވެވަޑައިގެންފައިވާ މައްސަލައަކީ ބެނިން ޕްރޮކްސިމަލް ޕޮޒިޝަނަލް ވާޓީގޯ (ބީޕީޕީވީ) ނަމަކަށް ކިޔާ ހާލަތެކެވެ. އެ ހާލަތު މެދުވެރި ވަނީ އުމުރުން ދުވަސްވުމުގެ ސަބަބުންނާއި ބޮލަށް ލިބޭ ގެއްލުމެއްގެ ސަބަބުންނެވެ. ބީޕީޕީވީއަކީ ކަންފަތުގެ އެތެރެއަށް ދިމާވާ މައްސަލައެއްގެ ސަބަބުން ކުރިމަތިވާ ހާލަތެކެވެ. އެ ހާލަތު ކުރިމަތިވުމުން ބޮލަށް ގެންނަ ހަރަކާތެއްގެ ސަބަބުން ބެލެންސުން ނެއްޓި މީހާ ވެއްޓޭ ގޮތް މެދުވެރިވެދާނެއެވެ. އަދި އެ ހާލަތު ކުރިމަތިވާ މީހާއަށް އޭނާގެ ވަށައިގެން ހުންނަ އެއްޗެހި އެބުރޭހެން ހީވެދާނެއެވެ. އޭގެ އިތުރުން ސްޓްރޯކް ޖެހުން ފަދަ ނުރައްކާތެރި ސިއްހީ މައްސަލަތައް ކުރިމަތިވެދާނެއެވެ.
އެހެންކަމުން ޑޮކަޓަރުން ލަފާދެއްވާފައި ވަނީ 24 ގަޑިއިރު ރައީސް މައުމޫންގެ އަރިހުގައި އެމަނިކުފާނުގެ ހާލު ބެއްލެވުމަށް މީހަކު ބެހެއްޓުމަށެވެ.
ނަމަވެސް ވަކީލުން ވިދާޅުވީ ރައީސް މައުމޫނާ މެދު ފުލުހުން އަމަލު ކުރަމުންދަނީ ރަނގަޅަށް ކަމަށާއި އެހެން ނަމަވެސް 24 ގަޑިއިރު ރައީސް މައުމޫންގެ ސިއްހީ ހާލަތު ބެލުމަކީ ފުލުހުންނަށް އެހާ ފަސޭހަ ކަމަކަށް ނުވާނެ ކަމަށެވެ.
އެހެންކަމުން އެމަނިކުފާނު ބަންދުން ދޫކޮށްދިނުމަށާއި ބަންދުން ދޫކޮށްދެވެން ނެތް ނަމަ، ގޭބަންދަށް ބަދަލުކޮށްދިނުމަށް ވެސް ވަކީލުން އެދިލެއްވިއެވެ.
ނަމަވެސް ޕްރޮސެކިއުޓަރ ޖެނެރަލްގެ އޮފީހުގެ ވަކީލުން ގެންދެވީ ރައީސް މައުމޫން ބަންދުން ދޫކޮށްލައިފި ނަމަ މިމައްސަލައިގެ ހެއްކަށް ނުފޫޒު ފޮރުވުމުގެ ފުރުސަތު އޮތް ކަމަށް ބުނަމުންނެވެ. އެހެންކަމުން ރައީސް މައުމޫން ޖަލު ބަންދުން ދޫކޮށްދިނުމާ ދެކޮޅަށް ޕީޖީ އޮފީހުގެ ވަކީލުން ގެންދެވީ ވަކާލާތު ކުރައްވަމުންނެވެ.
ޕީޖީ އޮފީހުގެ ވަކީލުން ރައީސް މައުމޫން ދޫކޮށްލެއްވުމަށް ތަކުރާރުކޮށް ދެކޮޅު ހެއްދެވުމުން ރައީސް މައުމޫންގެ ވަކީލުން ވިދާޅުވީ ރައީސް މައުމޫންގެ އާލާސްކަންފުޅާ ގުޅޭ ޒާތީ މައުލޫމާތުތަކެއް މިއަޑުއެހުމުގައި ހިއްސާކުރަން ބޭނުންވާ ކަމަށާއި އެހެންކަމުން އެ އަޑުއެހުން ސިއްރުކޮށް ދިނުމަށް އެދިލެއްވިއެވެ.
އެހެންކަމުން މިމައްސަލަ ބައްލަވާ ކްރިމިނަލް ކޯޓުގެ އިސްގާޒީ އަހުމަދު ހައިލަމް، އެޑުއެހުން ސިއްރު ކުރުމަށް ނިންމެވިއެވެ.
މިދިއަ ފެބްރުއަރީ މަހުގެ 05 ވަނަ ދުވަހުގެ ރޭ ސަރުކާރުން ކުއްލި ނުރައްކަލުގެ ހާލަތު އިއުލާން ކުރުމަށް ފަހު، ހަމަ އެރޭ ވަނީ ރައީސް މައުމޫނާއި އުއްތަމަ ފަނޑިޔާރު އަބްދުﷲ ސައީދާއި ސުޕްރީމް ކޯޓުގެ ފަނޑިޔާރު އަލީ ހަމީދު ހައްޔަރު ކޮށްފަ އެވެ. އަދި އޭގެފަހުންވެސް ސިޔާސީ ގިނަ ބަޔަކު ހައްޔަރުކޮށް، ސަރުކާރު ވައްޓާލަން އުޅުނުކަމަށް ބުނެ 09 ބޭފުޅެއްގެ މައްޗަށް ޓެރަރިޒަމްގެ ދައުވާ އުފުލާފައި ވެއެވެ.
