ދެކުނު އޭޝިއާގެ ޖޫނިއަރ އެތުލެޓިކްސް ޗެމްޕިއަންޝިޕްގައި ރާއްޖެއިން ބްރޯންޒް މެޑަލް ހޯދައިފި

ސްރީ ލަންކާގައި މިހާރު ކުރިޔަށްދާ ދެކުނު އޭޝިއާގެ ޖޫނިއަރ އެތުލެޓިކްސް މުބާރާތުގައި ރާއްޖޭގެ ފިރިހެން އެތުލީޓުންގެ ޓީމުން ބްރޯންޒް މެޑަލް ހޯދައިފިއެވެ.

ރާއްޖޭގެ އެތުލީޓުން ބްރޯންޒް މެޑަލް ހޯދާފައިވަނީ ހަތަރެއް ގުނަ 100 މީޓަރު ދުވުމުގައެވެ. މި ދުވުމުގެ އެއްވަނަ އިންޑިއާއިން ހޯދިއިރު ދެވަނަ ހޯދާފައިވަނީ ޕާކިސްތާނެވެ. ރާއްޖެއަށް ތިންވަނަ ލިބުނުއިރު ރޭސް ފެށިއިރު އެއްވަނައިގައި އޮތް ސްރީ ލަންކާ ޑިސްކޮލިފައިވީ އެ ގައުމުގެ ބައިވެރިޔެއްގެ އަތުން ބެޓަން ވެއްޓުމާއި ގުޅިގެންނެވެ.

މި މުބާރާތުގައި ރާއްޖޭގެ އުއްމީދީ ދުވުންތެރިޔާ މުހައްމަދު ނާއިލް ވަނީ 400 މީޓަރު ދުވުމުގެ އިވެންޓްގެ ފައިނަލްގައި ވާދަކޮށް ފަސްވަނައަށް ރޭސް ނިންމާފައެވެ. އޭނާ މި އިވެންޓް ނިންމާފައިވަނީ 48.67 ސިކުންތުންނެވެ. ނާއިލް 400 މީޓަރު ދުވުމުގެ ފައިނަލަށް ދަތުރުކުރީ އޭނާ ވާދަކުރި ހީޓުގެ ދެވަނަ ހޯދައިގެންނެވެ. ހީޓުގެ ދެވަނަ އޭނާ ހޯދީ 49.62 ސިކުންތުން ރޭސް ނިންމައިގެންނެވެ. މި އިވެންޓްގެ ފައިނަލްގައި ހުރިހާ މެޑަލްއެއް ވެސް ގެންދިޔައީ ސްރީ ލަންކާގެ އެތުލީޓުންނެވެ.

މޯލްޑިވްސް އޮލިމްޕިކް ކޮމިޓީގެ ސްކޮލާޝިޕްގެ ދަށުން ބޮޓްސްވާނާގައި ތަމްރީންތައް ފުރިހަމަކުރަމުން އަންނަ ނާއިލްއަކީ މިހާރު ރާއްޖޭގައި ހުރި އެންމެ އުއްމީދީ އެތުލީޓެވެ. ޖޫނިއަރ ގިނަ ކެޓަގަރީތަކެއްގެ ރެކޯޑު ވެސް އޭނާ އަތުގައި އޮންނައިރު އޭނާ ވަނީ މިއަހަރު ލަންޑަންގައި ބޭއްވި އައިއޭއޭއެފް ވޯލްޑް އިންޑޯ ޗެމްޕިއަންޝިޕްގައި 400 މީޓަރު ދުވުމުގެ ރާއްޖޭގެ ރެކޯޑު ވެސް މުގުރާލާފައެވެ.

ނާއިލްގެ އިތުރުން އަހުމަދު އަލީވެސް ވަނީ 400 މީޓަރު ހީޓް އެކެއްގައި ވާދަކޮށްފަ އެވެ. އޭނާ ފައިނަލް ބުރަށް ކޮލިފައިވެފައެއް ނުވެ އެވެ. ރާއްޖޭގެ ވިޝާން އަބްރާހީމް ވެސް މިއަދު ވަނީ 100 މީޓަރު ދުވުގެ ހީޓް ދޭއްގައި ވާދަކޮށްފަ އެވެ. އޭނާ ވެސް ފައިނަލް ބުރަށް ގޮސްފައެއް ނުވެ އެވެ.

ލަންކާގައި މިހާރު ކުރިއަށްދާ ދެކުނު އޭޝިއާގެ ޖޫނިއަރ އެތުލެޓިކްސް ޗެމްޕިއަންޝިޕްގައި ރާއްޖޭގެ އަށް އެތުލީޓަކު އަންނަނީ ވާދަކުރަމުންނެވެ.