ޔަމަނުގެ ސޮކޮޓްރާއަށް ޔޫއޭއީ ސިފައިން އަރައިފި
3 މެއި 2018 | ބުރާސްފަތި 14:45ޔަމަނު ހަނގުރާމައިގައި ޔޫއޭއީއިން މަސައްކަތްކުރަނީ އެމީހުންގެ ބާރު ޔަމަނުގައި ގަދަކުރުމަށް
ޔޫއޭއީ ސިފައިން ތަމްރީންތަކެއްގައި
އެފްރިކާގެ އައްސޭރިފަށާއި ކައިރީގައިވާ ޔަމަނުގެ ޖަޒީރާއެއްކަމަށްވާ ސޮކޮޓްރާއަށް ޔުނައިޓެޑް އަރަބް އެމިރޭޓްސް (ޔޫއޭއީ)ގެ ސިފައިން އަރައިފިއެވެ.
މީޑިއާ ރިޕޯޓްތައް ބުނާ ގޮތުން ސޮކޮޓްރާއަށް ހުއްދައަކާއި ނުލައި ޔޫއޭއީގެ އަސްކަރީ 4 މަތިންދާބޯޓުގައި 100 އަށްވުރެ ގިނަ ސިފައިން ވަނީ އަރާފައެވެ. ބުދަ ދުވަހު ޔޫއޭއީ ސިފައިން ސޮކޮޓްރާއަށް އަރައި، އެރަށުގެ އެއަރޕޯޓް ބަލަހައްޓަން ތިބި ޔަމަނު ސަރުކާރުގެ ސިފައިން އެތަނުން ވަނީ ފައްސާލާފައެވެ.
މަތިންދާބޯޓުތަކުގައި ޓޭންކްފަދަ ބަރު ހަތިޔާރާއިއެކު ޔޫއޭއީ ސިފައިން ސޮކޮޓްރާއަށް އެރި އިރު، އެރަށުގައި މީގެ ކުރިންވެސް ޔޫއޭއީ ސިފައިން ކޮންމެވެސް ވަރަކަށް ތިއްބެވެ.
ޔޫއޭއީ ސިފައިން އެރުމާއި ގުޅިގެން ސޮކޮޓްރާގެ އެތައް ހާސް ބަޔަކު ނިކުމެ އެކަމާއި ދެކޮޅަށް އިހުތިޖާޖްކޮށްފައިވެއެވެ. ޔޫއޭއީ ސިފައިން ސޮކޮޓްރާއަށް އަރާފައި މިވަނީ ބައިނަލްއަޤްވާމީ މުޖްތަމައުން ބަލައިގެންފައިވާ ޔަމަނުގެ ސަރުކާރުގެ ބޮޑުވަޒީރު އަހުމަދު ބިން ދަޣަރު އާއި އޭނާގެ ސަރުކާރުގެ 10 ވަރަކަށް ވަޒީރުން އެރަށަށް ވަޑައިގަތުމާއި ދިމާކޮށެވެ.
ޔަމަނުގެ ދާޚިލީ ހަނގުރާމައިގެ ތެރެއަށް ޔޫއޭއީއިން ވަދެފައިވާއިރު، އެޤައުމުން ގެންދަނީ ޔަމަނުގެ ހަނގުރާމައިގައި އެޤައުމުގެ ރައީސް އަބޫރައްބު މަންސޫރު ހާދީގެ ސިފައިންނާއި ދެކޮޅަށް ހަނގުރާމަވެރިން ތަމްރީންކޮށް ނެރެމުންނެވެ. ޤަތަރު މައްސަލަ ފަދަ އެތައް މައްސަލައެއްގައި ސަޢޫދީއާއި ޔޫއޭއީގެ ޚިޔާލު އެއްގޮތްނަމަވެސް، ޔަމަނުގެ ހަނގުރާމައިގައި ދެޤައުމުން ވާގިވެރިވަނީ ދެ ފަރާތަށެވެ. ސަޢޫދީއިން ހޫޘީ ހަނގުރާމަވެރިންނާއި ދެކޮޅަށް ހަނގުރާމަކުރަމުންދާ އަބޫރައްބު މަންސޫރު ހާދީގެ ސިފައިންނަށް ވާގިވެރިވަމުން ދިޔަނަމަވެސް، ޔޫއޭއީ އިން ގެންދަނީ ޔަމަނުގައި އަތް ގަދަކުރުމަށް މަސައްކަތްކުރަމުނެވެ.
ސޮކޮޓްރާގައިވެސް ޔޫއޭއީން މިހާރު ވަނީ ހަނގުރާމަވެރިން ތަމްރީނުކޮށްފައެވެ.
ޔޫއޭއީއިން ވަނީ ސޮކޮޓްރާގައި އަސްކަރީ އޮޕަރޭޝަންތައް ހިންގާކަމަށް އެއްބަސްވެފައެވެ. އެޤައުމުން ބުނާ ގޮތުގައި އެމީހުން ވަނީ 99 އަހަރުގެ މުއްދަތަކަށް ސޮކޮޓްރާ އާއި އެރަށް ކައިރީގައި އޮތް އަބްދުލްކޫރީ ނަމަކަށް ކިޔާ ޖަޒީރާ ކުއްޔަށް ހިފާފައެވެ. އެރަށުގެ ބޮޑެތި އިމާރާތްތަކާއި މަގުތަކުގައި ޔޫއޭއީ ދިދަ ނަގާފައިވާއިރު، އަބޫދާބީގެ ވަލީޢަޙުދު މުޙައްމަދު ބިން ޒައިދު އަލްނަޙްޔާންގެ ފޮޓޯތައް ވަނީ ހަރުކޮށްފައެވެ.
60 ހާހެއްހާ މީހުންގެ އާބާދީއެއް އޮންނަ ސޮކޮޓްރާއަކީ ދުނިޔޭގެ އެހެން އެއްވެސް ތަނަކުން ނުފެންނަ ބާވަތްތަކުގެ ސޫފާސޫފިތަކާއި ގަސްގަހާގެހި ފެންނަ ރަށެކެވެ. އަދި ފާއިތުވި 2 ޤަރުނުގައި ސޮކޮޓްރާ އޮތީ ޔަމަނުގެ ބެލުމުގެ ދަށުގައެވެ. ޔަމަނުގެ ޓޫރިޒަމް މިނިސްޓްރީއިން ތުހުމަތުކުރާ ގޮތުގައި އެރަށުގެ ރައްޔިތުން އަމިއްލަ މިނިވަންކަން އިއުލާންކުރުމަށް ޔޫއޭއީއިން ވަނީ ބާރު އަޅާފައެވެ.
